ممبئی : دیپیندر سنگھ ایری کی جارحانہ نصف سنچری کی بدولت نیپال نے آئی سی سی مینز ٹی ٹوئنٹی ورلڈ کپ میں اپنی تاریخ کی پہلی فتح حاصل کرتے ہوئے منگل کو وانکھیڑے اسٹیڈیم میں اسکاٹ لینڈ کو سات وکٹوں سے شکست دے دی۔

پہلے بیٹنگ کی دعوت ملنے پر اسکاٹ لینڈ نے شاندار آغاز کیا اور پاور پلے میں بغیر کسی نقصان کے 52 رنز بنا لیے۔ تاہم نیپال کے کپتان روہت پوڈیل نے دسویں اوور کی آخری گیند پر جارج منسی کو 27 رنز پر آؤٹ کر کے مائیکل جونز کے ساتھ ان کی 80 رنز کی شراکت توڑ دی۔

اسکاٹ لینڈ نے 15 اوورز میں ایک وکٹ کے نقصان پر 131 رنز بنا لیے تھے۔ مائیکل جونز نے 45 گیندوں پر 71 رنز کی نمایاں اننگز کھیلی جس میں آٹھ چوکے اور تین چھکے شامل تھے۔

میچ کا رخ سولہویں اوور میں بدل گیا جب تجربہ کار سومپال کامی نے دو وکٹیں لے کر نیپال کو مقابلے میں واپس لایا۔ انہوں نے پہلے جونز کو بولڈ کیا اور پھر برینڈن میک مولن کو 25 رنز پر کیچ آؤٹ کرا دیا جس سے اسکاٹ لینڈ کا اسکور 133 رنز پر تین وکٹ ہو گیا۔

آخری پانچ اوورز میں اسکاٹ لینڈ نے 39 رنز بنا کر مجموعی اسکور 170 رنز سات وکٹ تک پہنچایا۔ نیپال کی جانب سے کامی نے چار اوورز میں 25 رنز دے کر تین وکٹیں حاصل کیں۔

171 رنز کے ہدف کے تعاقب میں نیپال کے اوپنرز کشال بھرتیل اور آصف شیخ نے شاندار آغاز کیا اور ابتدائی چھ اوورز میں 56 رنز بنا ڈالے۔ دونوں نے 9 اعشاریہ 1 اوورز میں 74 رنز کی شراکت قائم کی تاہم مائیکل لیسک نے بھرتیل کو 43 رنز پر آؤٹ کر کے شراکت توڑ دی اور بعد میں آصف شیخ کو بھی پویلین بھیج دیا۔

اس کے بعد دیپیندر سنگھ ایری نے 24 گیندوں پر ناقابل شکست 50 رنز کی برق رفتار اننگز کھیلی جس میں چار چوکے اور تین چھکے شامل تھے جبکہ گلسن جھا نے 17 گیندوں پر 24 رنز بنائے۔ دونوں نے چوتھی وکٹ کے لیے 73 رنز کی ناقابل شکست شراکت قائم کی اور نیپال نے 19 اعشاریہ 2 اوورز میں ہدف حاصل کر لیا۔