نئی دہلی:ایف آئی ایچ ہاکی ورلڈ کپ 2026 کے کوالیفائرز کا شیڈول جاری کر دیا گیا ہے۔ ان میچوں کی میزبانی ہندوستان حیدرآباد میں 8 مارچ سے 14 مارچ تک کرے گا۔ انٹرنیشنل ہاکی فیڈریشن کے مطابق ہندوستانی خواتین ٹیم 8 مارچ کو یوراگوئے اور 9 مارچ کو اسکاٹ لینڈ کے خلاف میدان میں اترے گی۔

ایف آئی ایچ کے بیان کے مطابق کوالیفائرز کے میچ 28 فروری سے شروع ہوں گے۔ یہ مقابلے چلی میں 28 فروری سے 8 مارچ تک سانتیاگو میں ہوں گے۔ مصر میں 1 مارچ سے 7 مارچ تک اسماعیلیہ میں میچ کھیلے جائیں گے۔ ہندوستان میں مقابلے 8 مارچ سے 14 مارچ تک حیدرآباد میں منعقد ہوں گے۔

سانتیاگو میں خواتین کے ورلڈ کپ کوالیفائرز میں آسٹریلیا جاپان آئرلینڈ چلی فرانس کینیڈا ملائیشیا اور سوئٹزرلینڈ کی ٹیمیں شامل ہوں گی۔ مردوں کے مقابلوں میں فرانس آئرلینڈ کوریا ویلز اسکاٹ لینڈ کینیڈا پولینڈ اور چلی کی ٹیمیں ورلڈ کپ میں جگہ کے لیے مقابلہ کریں گی۔

حیدرآباد میں خواتین کے ورلڈ کپ کوالیفائرز منعقد ہوں گے۔ یہاں انگلینڈ ہندوستان اسکاٹ لینڈ کوریا اٹلی یوراگوئے ویلز اور آسٹریا کی ٹیمیں ورلڈ کپ میں جگہ حاصل کرنے کی کوشش کریں گی۔

ہندوستانی خواتین ٹیم نے گزشتہ سال اپنے ہی ملک میں ہونے والے ویمنز ایشیا کپ میں چاندی کا تمغہ حاصل کیا تھا۔ تاہم ٹورنامنٹ نہ جیتنے کی وجہ سے اسے براہ راست ورلڈ کپ میں کوالیفائی کرنے کا موقع نہیں مل سکا۔ فائنل میں چین نے ہندوستان کو 4 1 سے شکست دے کر براہ راست کوالیفکیشن حاصل کی تھی۔

مصر میں مردوں کے ہاکی ورلڈ کپ کوالیفائرز میں میزبان مصر کے ساتھ انگلینڈ ملائیشیا پاکستان جاپان آسٹریا چین اور امریکہ کی ٹیمیں شامل ہوں گی۔

یہ کوالیفائرز ایف آئی ایچ ہاکی ورلڈ کپ 2026 کے لیے کوالیفکیشن کا آخری مرحلہ ہیں۔ یہ عالمی ایونٹ بیلجیم اور نیدرلینڈز میں 15 اگست سے 30 اگست 2026 تک منعقد ہوگا۔ مردوں اور خواتین دونوں کے مقابلوں میں 16 16 ٹیمیں حصہ لیں گی۔

ہر زمرے میں 7 ٹیمیں ان کوالیفائرز کے ذریعے ورلڈ کپ کے لیے کوالیفائی کریں گی۔ ہر ٹورنامنٹ میں پہلی دوسری اور تیسری پوزیشن حاصل کرنے والی ٹیمیں براہ راست کوالیفائی کریں گی۔ چوتھی پوزیشن پر رہنے والی ٹیموں میں سے عالمی درجہ بندی میں سب سے اوپر رہنے والی ٹیم ساتویں کوالیفائر ہوگی۔

ان ٹورنامنٹس سے کوالیفائی کرنے والی ٹیمیں ان 18 ٹیموں میں شامل ہوں گی جو پہلے ہی ایف آئی ایچ ہاکی پرو لیگ براعظمی چیمپئن شپس یا میزبان ہونے کی بنیاد پر ورلڈ کپ کے لیے کوالیفائی کر چکی ہیں۔