وڈودرا :گجرات میں ٹیم انڈیا کے اسٹار وکٹ کیپر بلے باز رشبھ پنت کو سائیڈ اسٹرین یعنی اوبلیک مسل میں چوٹ کے باعث بھارت اور نیوزی لینڈ کے درمیان ہونے والی تین میچوں کی ون ڈے سیریز سے باہر کر دیا گیا ہے جو گیارہ جنوری سے شروع ہو رہی ہے۔ ان کی جگہ دھروو جوریل کو نیوزی لینڈ کے خلاف ون ڈے سیریز کے لیے ٹیم میں شامل کیا گیا ہے۔

بی سی سی آئی کی جانب سے جاری میڈیا ایڈوائزری کے مطابق رشبھ پنت کو ہفتے کے روز وڈودرا کے بی سی اے اسٹیڈیم میں نیٹ سیشن کے دوران بیٹنگ کرتے ہوئے یہ چوٹ لگی۔ نیٹ میں بیٹنگ کے دوران پنت کو دائیں جانب اچانک تکلیف محسوس ہوئی جس کے بعد انہیں فوری طور پر ایم آر آئی اسکین کے لیے لے جایا گیا۔ ماہرین سے مشاورت کے بعد بی سی سی آئی کی میڈیکل ٹیم نے تصدیق کی کہ پنت کو سائیڈ اسٹرین ہوئی ہے جس کی وجہ سے انہیں پوری سیریز سے باہر کر دیا گیا ہے۔

مردوں کی سلیکشن کمیٹی کی جانب سے نامزد کیے گئے متبادل دھروو جوریل اب بھارتی اسکواڈ میں شامل ہو چکے ہیں۔

بھارت کی تازہ ون ڈے ٹیم میں شبھمن گل کپتان روہت شرما وراٹ کوہلی کے ایل راہل وکٹ کیپر شریاس ایئر نائب کپتان واشنگٹن سندر رویندر جڈیجہ محمد سراج ہرشیت رانا پرسدھ کرشن کلدیپ یادو نتیش کمار ریڈی ارشدیپ سنگھ یشسوی جیسوال اور دھروو جوریل وکٹ کیپر شامل ہیں۔

رشبھ پنت نے ون ڈے سیریز سے قبل دو ہزار پچیس چھبیس وجے ہزارے ٹرافی کے لیگ مرحلے میں دہلی کی کپتانی کی تھی جہاں انہوں نے سروسز اور ریلوے کے خلاف دو نصف سنچریاں اسکور کیں اور دہلی کو ناک آؤٹ مرحلے تک پہنچانے میں اہم کردار ادا کیا۔

بھارت اور نیوزی لینڈ کے درمیان پہلا ون ڈے میچ بی سی اے اسٹیڈیم کوٹمبی وڈودرا میں کھیلا جائے گا اس کے بعد دوسرا میچ راجکوٹ میں ہوگا جبکہ سیریز کا اختتام تیسرا ون ڈے میچ اندور میں ہوگا۔

قابل ذکر بات یہ ہے کہ اس ون ڈے سیریز کے ذریعے بھارت کے اسٹار بلے باز وراٹ کوہلی اور روہت شرما کی واپسی بھی ہو رہی ہے جو اب خصوصی طور پر ون ڈے فارمیٹ میں کھیل رہے ہیں۔

ون ڈے سیریز کے بعد بھارت اور نیوزی لینڈ کے درمیان پانچ ٹی ٹوئنٹی میچوں کی سیریز کھیلی جائے گی جو بھارت اور سری لنکا میں ہونے والے آئندہ ٹی ٹوئنٹی ورلڈ کپ دو ہزار چھبیس کی تیاری کا حصہ ہوگی۔