دھرم شالہ: ممبئی انڈینس نے ایک سنسنی خیز ہائی اسکورنگ مقابلے میں پنجاب کنگس کو 6 وکٹوں سے شکست دے دی۔ ممبئی کی فتح میں تلک ورما کی جارحانہ نصف سنچری اور ریان رکلٹن کی تیز رفتار اننگز نے اہم کردار ادا کیا۔

اس شکست کے ساتھ پنجاب کنگس کو مسلسل پانچویں ناکامی کا سامنا کرنا پڑا اور ٹیم 13 پوائنٹس کے ساتھ پلے آف کی دوڑ میں دباؤ کا شکار ہو گئی ہے جبکہ چنئی سپر کنگس اور راجستھان رائلز اس کے قریب پہنچ گئے ہیں۔

201 رنز کے ہدف کے تعاقب میں ممبئی انڈینس کی شروعات محتاط رہی لیکن ریان رکلٹن نے جلد ہی جارحانہ انداز اپناتے ہوئے تیز رفتار 48 رنز بنائے۔ دوسری جانب روہت شرما 25 رنز بنا سکے۔

بعد ازاں تلک ورما نے شاندار بیٹنگ کرتے ہوئے صرف 33 گیندوں پر 75 رنز کی دھواں دار اننگز کھیلی۔ انہیں ول جیکس کا بھرپور ساتھ ملا جنہوں نے صرف 10 گیندوں پر 25 رنز اسکور کیے۔ دونوں نے آخری اوورز میں جارحانہ بیٹنگ کرتے ہوئے ممبئی کو ایک گیند باقی رہتے کامیابی دلائی۔

اس سے قبل پنجاب کنگس نے پہلے بیٹنگ کرتے ہوئے 20 اوورز میں 8 وکٹ پر 200 رنز بنائے۔ پربھسمرن سنگھ نے 32 گیندوں پر 57 رنز کی شاندار اننگز کھیلی جبکہ آخر میں عظمت اللہ عمرزئی نے 17 گیندوں پر 38 رنز بنا کر ٹیم کو مضبوط اسکور تک پہنچایا۔

ممبئی کی جانب سے شاردل ٹھاکر سب سے کامیاب بولر رہے جنہوں نے 4 وکٹ حاصل کیے جبکہ دیپک چاہر نے 2 کھلاڑیوں کو آؤٹ کیا۔