ممبئی: لیجنڈری کرکٹر سنیل گاوسکر نے آئی پی ایل دو ہزار چھبیس میں تیزی سے بڑھتے ہوئے بڑے اسکور کے تعاقب کے رجحان پر روشنی ڈالتے ہوئے کہا ہے کہ کوئی بھی ہدف اب ناقابل حصول نہیں رہا۔

اسٹار اسپورٹس پر گفتگو کرتے ہوئے انہوں نے کہا کہ جب ٹیمیں دو سو ساٹھ سے زائد رنز کا ہدف آسانی سے حاصل کرنے لگتی ہیں تو اس کا اثر پورے ٹورنامنٹ پر پڑتا ہے اور دیگر ٹیموں کا اعتماد بھی بڑھ جاتا ہے۔ انہوں نے کہا کہ رائل چیلنجرز بنگلور نے گجرات ٹائٹنز کے خلاف اور پنجاب کنگز نے دہلی کیپیٹلز کے خلاف جس طرح بڑے اہداف حاصل کیے اس کے بعد دیگر ٹیموں کا حوصلہ بھی بڑھ گیا۔

انہوں نے کہا کہ اب متعدد مواقع پر دو سو سے زائد اور یہاں تک کہ دو سو بیس سے زائد رنز کے ہدف بھی باآسانی حاصل کیے جا رہے ہیں جس سے ظاہر ہوتا ہے کہ ٹیموں کو اپنی صلاحیتوں پر کتنا اعتماد ہے۔

گاوسکر نے ابھرتے ہوئے نوجوان کھلاڑی ویبھَو سوریاونشی کی بھی تعریف کی اور ان کی بے خوف بیٹنگ کو سراہا۔ انہوں نے کہا کہ وہ میدان کا بہترین استعمال کرتے ہیں اور گیند کو نہایت خوبصورتی سے کھیلتے ہیں۔

ویبھَو سوریاونشی نے آئی پی ایل دو ہزار چھبیس میں تاریخ رقم کرتے ہوئے صرف ایک سو سڑسٹھ گیندوں میں چار سو رنز مکمل کیے جو ایک ریکارڈ ہے۔ اس سے قبل یہ ریکارڈ آندرے رسل کے پاس تھا جنہوں نے دو ہزار انیس میں ایک سو اٹھاسی گیندوں میں یہ کارنامہ انجام دیا تھا۔ اس فہرست میں ابھشیک شرما نکولس پورن اور گلین میکسویل بھی شامل ہیں۔

پندرہ سالہ سوریاونشی نے نو میچوں میں چار سو رنز بنائے ہیں جن کی اوسط چوالیس اعشاریہ چوالیس اور اسٹرائیک ریٹ دو سو اڑتیس اعشاریہ صفر نو ہے۔ انہوں نے دو نصف سنچریاں اور ایک سنچری بھی اسکور کی ہے۔

میچ کی بات کریں تو پنجاب کنگز نے پہلے بیٹنگ کرتے ہوئے دو سو بائیس رنز بنائے جس میں مارکس اسٹوئنس اور پربھسمرن سنگھ کی نصف سنچریاں شامل تھیں۔

جواب میں راجستھان رائلز نے شاندار بیٹنگ کا مظاہرہ کرتے ہوئے ہدف حاصل کر لیا جس میں یشسوی جیسوال ڈونوون فریرا اور شبھم دوبے نے اہم کردار ادا کیا۔

اس شکست کے باوجود پنجاب کنگز تیرہ پوائنٹس کے ساتھ سرفہرست ہے جبکہ راجستھان رائلز بارہ پوائنٹس کے ساتھ تیسرے مقام پر آ گئی ہے۔