نئی دہلی۔ ہندوستان کی آل راؤنڈر دیپتی شرما نے کہا کہ وہ خود کو خوش قسمت سمجھتی ہیں کہ ورلڈ کپ کی آخری گیند انہیں کرنے کا موقع ملا اور یہ لمحہ ہمیشہ ان کے دل میں محفوظ رہے گا کہ فیصلہ کن وکٹ انہوں نے ہی لی تھی۔ جنوبی افریقہ کی آل راؤنڈر نادین ڈی کلارک جو پورے ٹورنامنٹ میں شاندار فارم میں تھیں انہیں آؤٹ کر کے دیپتی نے ہندوستان کو پہلی مرتبہ آئی سی سی ویمنز ورلڈ کپ 2025 کا خطاب دلایا۔

دیپتی نے اس ورلڈ کپ میں شاندار کارکردگی دکھائی۔ سات اننگز میں انہوں نے 215 رنز بنائے ان کا اوسط 30.71 رہا اور اسٹرائیک ریٹ 90.33 رہا۔ تین نصف سنچریاں بنائیں اور بہترین اسکور 58 رہا۔ نو اننگز میں انہوں نے 22 وکٹیں لیں جو ٹورنامنٹ میں سب سے زیادہ تھیں اور فائنل میں نصف سنچری اور پانچ وکٹوں کی آل راؤنڈ کارکردگی دکھا کر ٹیم کو سب سے بڑے موقع پر کامیابی دلائی۔

ای ایس پی این کرک انفو سے گفتگو میں دیپتی نے کہا کہ ابھی بھی جیت کا احساس پوری طرح بیٹھ نہیں پایا ہے لیکن ٹیم اس خوشی کو ہمیشہ سنبھال کر رکھنا چاہتی ہے۔ انہوں نے کہا کہ آخری گیند پھینکنا ان کے لیے یادگار لمحہ ہے۔ نادین ڈی کلارک پورے ٹورنامنٹ میں اچھا کھیل رہی تھیں اس لیے ان کی وکٹ بہت اہم تھی۔ جب صرف ایک وکٹ رہ گئی تھی تو ہم چاہتے تھے کہ جلد مقابلہ ختم ہو جائے۔

دیپتی نے کہا کہ کپتان ہرمن پریت کور کا وہ جشن جو انہوں نے فیصلہ کن کیچ پکڑنے کے بعد منایا وہ ان کے ذہن میں ہمیشہ کے لیے نقش ہو گیا ہے۔ ساتھ ہی انہوں نے آل راؤنڈر آمن جوت کور کے اس شاندار کیچ کی بھی تعریف کی جس سے جنوبی افریقہ کی کپتان لورا وولوارٹ آؤٹ ہوئیں۔ دیپتی نے اسے آمن جوت کا کپیل دیو لمحہ قرار دیا بالکل اسی طرح جیسے کپیل دیو نے 1983 کے فائنل میں ویو رچرڈز کا فیصلہ کن کیچ پکڑا تھا۔

دیپتی نے بتایا کہ ٹیم کا اعتماد پہلے ہی میچ سے مضبوط تھا۔ وہ ہر میٹنگ میں اپنے منصوبے طے کرتی تھیں اور فائنل کو ایک عام میچ کی طرح کھیلنے کا فیصلہ کیا تھا تاکہ دباؤ کم رہے۔ انہوں نے کہا کہ ٹیم کا ماحول پرسکون تھا اور سب کا دھیان سات آٹھ گھنٹے کی بہترین کارکردگی پر تھا۔

دیپتی نے مزید بتایا کہ اس مرتبہ اگرچہ کئی کھلاڑی کم عمر تھیں لیکن سب اپنے کردار اپنی جگہ اور اپنے منصوبے کے بارے میں صاف ذہن رکھتی تھیں۔ نوجوان اسپنر شری چارنی اکثر انہیں آ کر سوال کرتی تھیں کہ مختلف حالات میں وہ کس طرح منصوبہ بناتی ہیں۔ سب کا مقصد صرف ٹیم کی کامیابی تھا۔

انہوں نے بتایا کہ سیمی فائنل میں جب وہ دفاعی چیمپئن کے سامنے تھیں تو انہوں نے اسے بھی فائنل سمجھ کر کھیلا کیونکہ سات مرتبہ کی چیمپئن ٹیم کے خلاف ذہنی طور پر مختلف سطح پر جانا ضروری تھا۔ انہوں نے کہا کہ اگر ہم سیمی فائنل جیت جائیں تو ہم چیمپئن بن سکتے ہیں اس لیے سارا دھیان اسی پر تھا۔ ہم جانتے تھے کہ اگر ہم اپنی بہترین کرکٹ کھیلیں تو یہ ممکن ہے۔ ہمیں اس بات کا بھی احساس تھا کہ اگر کوئی ٹیم ہے جس سے آسٹریلیا محتاط رہتی ہے تو وہ ہندوستان ہے اور یہ یک طرفہ مقابلہ کبھی نہیں ہوگا۔ یہی بتاتا ہے کہ ہندوستانی خواتین کی کرکٹ کتنی ترقی کر چکی ہے