وشاکھاپٹنم :  یشسوی جیسوال کی شاندار پہلی ون ڈے سنچری اور روہت شرما و ویرات کوہلی کی دلکش نصف سنچریوں نے جنوبی افریقہ کو یکطرفہ انداز میں مات دے دی۔ ہندوستان نے دو سو اکہتر رنز کا ہدف صرف انتالیس اعشاریہ پانچ اوور میں ایک وکٹ کے نقصان پر حاصل کر کے سیریز دو ایک سے جیت لی۔ کوئنٹن ڈی کوک نے شاندار سنچری بناتے ہوئے جنوبی افریقہ کو دو سو ستر رنز تک پہنچایا تاہم ہندوستانی بولرز خصوصاً کلدیپ یادیو اور پرسدھ کرشنا نے چار چار وکٹیں لے کر حریف ٹیم کو بڑا مجموعہ بنانے سے روک دیا۔

ہدف کے تعاقب میں ہندوستانی اوپنرز نے بہترین آغاز فراہم کیا۔ پہلی اوور میں ہی جنوبی افریقہ کی ناہموار بولنگ نے اضافی رنز دیے۔ روہت اور جیسوال مسلسل گیندوں کو باؤنڈری کی راہ دکھاتے رہے اور دس اوور میں چھیالیس رنز بنا لیے۔ روہت شرما نے عمدہ بیٹنگ کے ساتھ نہ صرف اپنی ففٹی مکمل کی بلکہ بین الاقوامی کرکٹ میں بیس ہزار رنز مکمل کرنے والے چوتھے ہندوستانی بلے باز بھی بن گئے۔

جیسوال نے پچھتر گیندوں میں اپنی ففٹی مکمل کی اور پھر جارحانہ انداز اپناتے ہوئے تیزی سے اسکور بڑھایا۔ روہت جب ایک سو پچپن کے مجموعے پر چھپن رنز بنا کر آؤٹ ہوئے تو ویرات کوہلی میدان میں آئے۔ انہوں نے آتے ہی اپنے مخصوص ڈرائیوز اور پل شاٹس سے اسٹیڈیم میں جوش پیدا کیا اور جیسوال کو بھی اعتماد ملا۔ جیسوال نے اپنی سنچری ایک سو گیارہ گیندوں میں مکمل کی اور ہندوستان کے چھٹے ایسے بیٹر بنے جنہوں نے تینوں فارمیٹس میں سنچریاں بنائیں۔

ویرات نے بھی برق رفتار باؤنڈریز کے ساتھ اپنی نصف سنچری مکمل کی اور دونوں بلے بازوں نے سو رنز کی شراکت بنائی۔ آخر میں کوہلی نے دو خوبصورت چوکے لگا کر میچ ختم کیا۔ ہندوستان دو سو اکہتر پر ایک وکٹ کے نقصان پر فاتح رہا جبکہ جیسوال ایک سو سولہ اور ویرات پینسٹھ رنز پر ناٹ آؤٹ رہے۔

اس سے قبل جنوبی افریقہ نے پہلے بیٹنگ کرتے ہوئے خراب آغاز کیا۔ رائن ریکلٹن بغیر رنز کے آؤٹ ہو گئے۔ ڈی کوک اور ٹیمبا باووما نے دباؤ کم کرتے ہوئے ایک سو رنز کی شراکت قائم کی۔ باووما اٹھالیس رنز بنا کر آؤٹ ہوئے جبکہ ڈی کوک نے جارحانہ سنچری اسکور کی۔ تاہم درمیانی اوورز میں پرسدھ کرشنا اور کلدیپ یادیو کی تباہ کن بولنگ نے جنوبی افریقہ کی بیٹنگ لائن لپیٹ دی۔ پوری ٹیم سینتالیس اعشاریہ پانچ اوور میں دو سو ستر رنز بنا کر آؤٹ ہو گئی۔

ہندوستان کی جانب سے کلدیپ نے چار برسانو میں اکتالیس رنز دے کر چار وکٹیں لیں جبکہ پرسدھ کرشنا نے چھیاسٹھ رنز کے عوض چار وکٹیں حاصل کیں۔ عرشدیپ اور جدیجا نے ایک ایک وکٹ حاصل کی۔ اس شاندار کارکردگی کے ساتھ ہندوستان نے سیریز اپنے نام کی۔