نئی دہلی۔ انڈین فٹ بال لیگ کے 2026-27 سیزن کا آغاز 30 اکتوبر سے ہوگا۔ آل انڈیا فٹ بال فیڈریشن کی ویب سائٹ کے مطابق آئندہ سیزن میں ناگالینڈ میں نئے مقامات پر بھی مقابلے منعقد ہوں گے۔انڈین فٹ بال لیگ کی گورننگ کونسل کا اجلاس منگل کو نئی دہلی کے فٹ بال ہاؤس میں ہوا۔ اجلاس میں لیگ میں حصہ لینے والے تمام 11 کلبوں کے نمائندے موجود تھے۔

گورننگ کونسل اور آل انڈیا فٹ بال فیڈریشن نے 2025-26 کے سیزن کا جائزہ لیا۔ اس دوران ناظرین کی تعداد اور مجموعی نشریاتی کارکردگی کو انتہائی حوصلہ افزا قرار دیا گیا۔ اجلاس میں بتایا گیا کہ انڈین فٹ بال لیگ کے ناظرین کی تعداد 2024-25 کے سیزن کے مقابلے میں 4 گنا زیادہ رہی۔گورننگ کونسل نے تصدیق کی کہ 2026-27 کا سیزن اب 30 اکتوبر 2026 سے شروع ہوگا۔

گورننگ کونسل نے آئندہ سیزن کے لیے ایک ضابطے کی بھی منظوری دی ہے جس کے تحت انڈین فٹ بال لیگ کے میچ کے دوران ایک وقت میں زیادہ سے زیادہ 3 غیر ملکی کھلاڑی میدان میں موجود رہ سکیں گے۔کونسل نے 2026-27 سیزن کے لیے ناگالینڈ اور اڈیشہ کو نئے مقامات کے طور پر شامل کرنے کا بھی خیر مقدم کیا۔ اس سے ملک بھر میں لیگ کا دائرہ مزید وسیع ہوگا۔

آئندہ سیزن کے لیے انڈین فٹ بال لیگ کے چارٹر کے ساتھ مجوزہ بجٹ اور اسپانسرشپ پیکیجز پر بھی تبادلہ خیال کیا گیا۔آل انڈیا فٹ بال فیڈریشن کے ڈپٹی سیکریٹری جنرل ایم ستیہ نارائن نے کہا کہ یہ ایک خوشگوار اجلاس تھا اور ہمیں خوشی ہے کہ انڈین فٹ بال لیگ کے سیزن کی نئی تاریخوں کی اب تصدیق ہو گئی ہے۔انہوں نے کہا کہ گزشتہ سیزن محدود مدت پر مشتمل ہونے کے باوجود لیگ نے کافی دلچسپی پیدا کی اور ناظرین کی تعداد بھی انتہائی حوصلہ افزا رہی۔ اب ہم مکمل ہوم اینڈ اوے سیزن کے منتظر ہیں۔

انہوں نے مزید کہا کہ نئے کلبوں اور نئے مقامات کے لیگ میں شامل ہونے سے آئندہ سیزن میں بہت کچھ دیکھنے کو ملے گا اور ان تمام اقدامات سے انڈین فٹ بال لیگ کے حوالے سے جوش و خروش میں اضافہ ہوگا۔

2026-27 سیزن کی تیاریوں کے سلسلے میں انڈین فٹ بال لیگ کے کلبوں کے نمائندوں اور آل انڈیا فٹ بال فیڈریشن کے ڈپٹی سیکریٹری جنرل ایم ستیہ نارائن نے پیر کو نئی دہلی میں پرسار بھارتی کے چیف ایگزیکٹو افسر گورو دویدی سے بھی ملاقات کی۔

ملاقات میں آئندہ سیزن کے نشریاتی معاہدے پر بات چیت ہوئی۔ دونوں فریقوں نے ایک اور کامیاب شراکت داری کی امید ظاہر کی۔