نئی دہلی :ہندوستان نے شاندار کھیل پیش کیا لیکن بالآخر میزبان کویت کے خلاف ہمت ہار بیٹھا اور اے ایف سی فٹسال ایشین کپ 2026 کوالیفائرز کے گروپ اے کے اپنے پہلے میچ میں 1-4 سے شکست کھا گیا۔ یہ میچ اردیہ کے قشیعان المطیری ہال میں کھیلا گیا۔ آل انڈیا فٹبال فیڈریشن(AIFF) کی سرکاری ویب سائٹ کے مطابق، ہاف ٹائم تک کویت کو 2-1 کی برتری حاصل تھی۔

یہ ہندوستان کی اے ایف سی فٹسال ایشین کپ کوالیفائرز میں محض دوسری شرکت تھی۔ دنیا کی رینکنگ میں 135ویں نمبر پر موجود بھارتی ٹیم جانتی تھی کہ وہ ایک مضبوط حریف کا سامنا کر رہی ہے، کیونکہ کویت اس وقت عالمی رینکنگ میں 43ویں نمبر پر ہے۔ اس فرق کے باوجود، ایرانی ہیڈ کوچ رضا کردی کی قیادت میں ہندوستاننے جرات مندی اور حکمتِ عملی کے ساتھ کھیل کا مظاہرہ کیا۔

فٹسال ٹائیگرز نے ابتدا میں ہی اپنا دفاعی ڈھانچہ سخت رکھا، ہوشیاری سے پریس کیا اور جسمانی مقابلوں سے بھی نہیں کترائے۔ ہندوستان نے جارحانہ حکمت عملی اپنائی، ہر خلا بند کیا اور میزبان ٹیم کو مایوس کرنے کے لیے بار بار ٹیکل کیے۔ کویت کے ہر حملے کا جواب پرعزم دفاع سے دیا گیا۔ بھارتی کھلاڑیوں نے بار بار اپنے جسم ڈھال بنا کر شاٹس روکے اور جگہ نہیں دی۔

ان کی بہادری کا صلہ نویں منٹ میں ملا۔ لالسانگکیما نے کویت کی دفاعی لائن کو ایک شاندار پاس سے کاٹا، جسے ڈیوڈ لالٹلانسنگا نے سنبھالا اور زوردار شاٹ مار کر گول کیپر فواد الخواری کو مات دی۔ اس شاندار فِنش نے ہوم کراؤڈ کو حیران کر دیا اور ہندوستان کو برتری دلائی۔ یہ لالٹلانسنگا کا آٹھواں انٹرنیشنل گول تھا، جس کے ساتھ وہ بھارتی مرد فٹسال ٹیم کے آل ٹائم ٹاپ اسکورر کے طور پر اپنی برتری بڑھا گئے۔

کویت نے فوری جواب دیا۔ محض ایک منٹ بعد ناصر العبان نے ایک شاندار پاس دیا جسے صالح الفاضل نے پکڑ کر زوردار شاٹ کے ساتھ جال میں پہنچا دیا۔ اس کے بعد میچ میں تیزی آگئی اور دونوں ٹیموں نے مواقع بنائے۔ ہندوستانکے گول کیپر اوزن ویوین سلوا نے کئی اہم بچاؤ کرتے ہوئے اسکور برابر رکھا۔

لیکن 18ویں منٹ میں بھارتی دفاع دوبارہ ٹوٹ گیا، جب عبدالعزیز السراج نے جگہ بنا کر گیند کو جال میں پہنچا دیا اور وقفے تک کویت کو 1-2 کی برتری دلا دی۔

دوسرے ہاف میں ہندوستان نے واپسی کے عزم کے ساتھ آغاز کیا۔ 24ویں منٹ میں سنہری موقع آیا جب کے رولوہپوئیا نے ایک ڈھیلی گیند پر قبضہ کیا۔ کویت کے گول کیپر نے زاویہ بند کرنے کے لیے آگے بڑھ کر حملہ کیا، رولوہپوئیا نے اسے مہارت سے چکما دیا لیکن افسوس کہ ان کا شاٹ ہدف سے ذرا سا باہر نکل گیا۔

کویت نے فوراً اس کا فائدہ اٹھایا۔ 27ویں منٹ میں العَبان اور العباسی کے درمیان تیز پاسنگ نے بھارتی دفاع کو توڑ دیا اور محمد العجمی نے سامنے سے گول کرنے میں کوئی غلطی نہیں کی۔

ہندوستان نے مسلسل حملے جاری رکھے لیکن اس سے وہ کاؤنٹر اٹیک کے لیے کمزور ہوگئے۔ 37ویں منٹ میں نجیب علی کا شاٹ بلاک ہوا اور کویت نے تیز جوابی حملہ کیا، جسے العباسی نے سکون سے ختم کرتے ہوئے اسکور 1-4 کر دیا اور میزبان ٹیم نے شاندار فتح حاصل کی۔

اب ہندوستان22 ستمبر کو آسٹریلیا کے خلاف کھیلے گا، جہاں وہ دوبارہ منظم ہو کر کوالیفکیشن کی امیدیں زندہ رکھنے کی