احمد آباد:انٹرنیشنل کرکٹ کونسل (آئی سی سی) نے احمد آباد میں منعقدہ بورڈ اجلاس کے بعد کرکٹ کینیڈا کی رکنیت فوری طور پر معطل کر دی ہے۔ آئی سی سی کے مطابق یہ فیصلہ رکنیت سے متعلق ذمہ داریوں کی سنگین خلاف ورزیوں کے باعث کیا گیا۔

آئی سی سی نے واضح کیا کہ کینیڈین کھلاڑیوں کے مفادات کا تحفظ کیا جائے گا اور قومی گورننگ باڈی کے انتظامی مسائل کا اثر کھلاڑیوں پر نہیں پڑنے دیا جائے گا۔ اسی لیے کینیڈا کی قومی ٹیمیں معطلی کے دوران بھی آئی سی سی کے ایونٹس میں شرکت کی اہل رہیں گی۔

آئی سی سی نے یہ بھی اعلان کیا کہ کرکٹ کینیڈا کو محدود اور نگرانی والے نظام کے تحت فنڈز فراہم کیے جائیں گے تاکہ قومی ٹیموں کے منظور شدہ پروگرام جاری رہ سکیں۔ ادارے کی بحالی کے لیے آئی سی سی مخصوص شرائط بھی جاری کرے گا جن پر عمل درآمد کی نگرانی آئی سی سی نارملائزیشن کمیٹی کرے گی۔

بورڈ نے چیف ایگزیکٹوز کمیٹی کی متعدد سفارشات بھی منظور کیں۔ ان میں دونوں ٹیموں کی رضامندی سے ٹیسٹ میچوں میں گلابی گیند کے استعمال کا تجربہ شامل ہے تاکہ کم روشنی کی صورت میں زیادہ کھیل ممکن بنایا جا سکے۔

آئی سی سی اور میریلیبون کرکٹ کلب کم روشنی کے باعث ضائع ہونے والے کھیل کو کم کرنے کے لیے نئی لائٹنگ ٹیکنالوجی پر مشترکہ تحقیق بھی کریں گے۔ اس کے علاوہ امپائرز کو مشتبہ بولنگ ایکشن کے جائزے کے دوران ہاک آئی ڈیٹا تک رسائی دینے کی منظوری بھی دی گئی ہے۔

کھیل کے قوانین میں چند اہم تبدیلیاں بھی منظور کی گئی ہیں۔ اب مقررہ ڈرنکس وقفے کے دوران ہیڈ کوچ یا ان کے نمائندے کو ٹیم سے مشاورت کی اجازت ہوگی۔ ٹی ٹوئنٹی بین الاقوامی میچوں میں 15 منٹ کا وقفہ لازمی ہوگا اور بلے بازوں کو کھیل دوبارہ شروع ہونے پر فوراً تیار رہنا ہوگا۔

بورڈ نے لیگ سائیڈ وائیڈ کے تجرباتی قانون کو مستقل طور پر نافذ کرنے کی بھی منظوری دی۔ میریلیبون کرکٹ کلب کی جانب سے کرکٹ قوانین میں کی جانے والی دیگر تمام تبدیلیاں یکم اکتوبر 2026 سے نافذ ہوں گی۔

آئی سی سی ویمنز چیمپئنز ٹرافی 2027 کے شیڈول میں بھی تبدیلی کی گئی ہے۔ اب یہ ٹورنامنٹ جون جولائی کے بجائے 14 سے 28 فروری 2027 کے درمیان منعقد ہوگا۔

آئی سی سی نے 2026 میں 10 ٹیموں پر مشتمل ویمنز ایمرجنگ نیشنز ٹرافی کے انعقاد کی منظوری بھی دی ہے جس میں 5 مکمل رکن اور 5 ایسوسی ایٹ رکن ممالک شامل ہوں گے۔

مزید برآں پاکستان کرکٹ بورڈ کی میزبانی میں ہونے والے آئی سی سی ویمنز ٹی ٹوئنٹی ورلڈ کپ 2028 کے کوالیفکیشن نظام کی بھی توثیق کی گئی ہے۔ اس ٹورنامنٹ میں ہندوستان کے میچ غیر جانبدار مقام پر کھیلے جائیں گے۔

ایسوسی ایٹ ممالک کے لیے آئی سی سی نے مردوں کے ٹی ٹوئنٹی ورلڈ کپ کے لیے عالمی کوالیفائر متعارف کرانے کی سفارش منظور کر لی ہے۔ انتظامیہ کو 16 ٹیموں پر مشتمل اس کوالیفائر کے ڈھانچے اور کوالیفکیشن نظام کو حتمی شکل دینے کی ذمہ داری سونپی گئی ہے۔

آئی سی سی کے مطابق بورڈ کے دو نمائندے ڈاکٹر محمد موساجے اور تاوینگوا موکوہلانی بنگلہ دیش کا دورہ کریں گے تاکہ وہاں کی صورتحال اور بنگلہ دیش کرکٹ بورڈ کے انتخابی عمل کا جائزہ لیا جا سکے۔ دوسری جانب آئی سی سی کے نائب چیئرمین عمران خواجہ اور دیواجیت سیکیا نے سری لنکا کا دورہ کرکے متعلقہ فریقوں سے ملاقاتیں کی ہیں۔

بورڈ نے فرنچائز کرکٹ کے بڑھتے ہوئے دائرہ کار پر بھی تشویش ظاہر کی اور بین الاقوامی کرکٹ کیلنڈر کے ساتھ اس کے توازن کا جائزہ لینے کے لیے ایک کمیٹی تشکیل دینے کا فیصلہ کیا۔

آئی سی سی کے چیئرمین Jay Shah نے کہا کہ احمد آباد میں ہونے والے مباحثوں نے عالمی سطح پر کرکٹ کی ترقی۔ بہتر نظم و نسق اور شفاف انتظامیہ کے لیے آئی سی سی کے عزم کو مزید مضبوط کیا ہے۔ ان کے مطابق خواتین کی کرکٹ۔ ابھرتی ہوئی ٹیموں اور فرنچائز مقابلوں کے انتظام سے متعلق فیصلوں کا مقصد کرکٹ کو دنیا بھر کے شائقین کے لیے منصفانہ۔ مسابقتی اور دلچسپ بنانا ہے۔