نئی دہلی:ہاکی انڈیا نے منگل کے روز نیوزی لینڈ کے شہر آکلینڈ میں 15 سے 21 جون تک منعقد ہونے والے ایف آئی ایچ ویمنز نیشنز کپ 2025-26 کے لیے ہندوستانی خواتین ہاکی ٹیم کا اعلان کر دیا ہے۔

سلیمہ ٹیٹے ٹورنامنٹ میں ایک بار پھر ٹیم کی قیادت کریں گی۔ گول کیپر کے طور پر سویتا اور بیچو دیوی کھریبام ٹیم کو تجربہ اور اعتماد فراہم کریں گی۔ دفاعی شعبے میں سشیلا چانو پکھرمبم۔ ایشیکا چودھری۔ نکی پردھان اور جیوتی اپنی بین الاقوامی تجربے کی بنیاد پر اہم کردار ادا کریں گی۔

دفاعی لائن میں للتھانتلوانگی اور شلپی داباس کو بھی شامل کیا گیا ہے۔ دونوں کھلاڑیوں نے حالیہ آسٹریلیا دورے کے دوران پہلی بار سینئر ٹیم میں جگہ بنائی تھی اور اب وہ اپنی صلاحیتوں کو مزید نکھارنے کے لیے پرعزم ہیں۔

مڈفیلڈ کی قیادت کپتان سلیمہ ٹیٹے کریں گی جبکہ ان کے ساتھ نہا۔ سنیلیتا ٹوپو۔ ساکشی رانا اور دیپیکا سورینگ موجود ہوں گی۔ دیپیکا نے آسٹریلیا کے خلاف دوستانہ سیریز میں متاثر کن کارکردگی کا مظاہرہ کیا تھا۔

اٹیک کی قیادت نوینت کور کریں گی جن سے ایک بار پھر گول اسکورنگ میں اہم کردار ادا کرنے کی توقع ہے۔ ان کا ساتھ دیپیکا۔ روتوجا داداسو پیسال۔ انو اور ایشیکا دیں گی جبکہ تجربہ کار اٹیکنگ مڈفیلڈر لالریمسیمی اور سونم بھی حملہ آور لائن کو مضبوط بنائیں گی۔

ہندوستانی ٹیم نیشنز کپ میں آسٹریلیا کے کامیاب دورے کے بعد شرکت کر رہی ہے جہاں اس نے پرتھ میں چار دوستانہ میچ کھیلے۔ اس سیریز نے ٹیم کو قیمتی تجربہ فراہم کیا اور ہیڈ کوچ شورد ماریئن کو مختلف کمبی نیشن آزمانے کا موقع دیا۔ چار مقابلوں کے بعد ہندوستان نے سیریز 2-2 سے برابر کی تھی۔

ٹورنامنٹ میں ہندوستان کو پول اے میں جاپان۔ امریکہ اور یوراگوئے کے ساتھ رکھا گیا ہے جبکہ پول بی میں میزبان نیوزی لینڈ۔ چلی۔ کوریا اور فرانس شامل ہیں۔

ہیڈ کوچ شورد ماریئن نے کہا کہ نیشنز کپ ٹیم کے لیے انتہائی اہم ٹورنامنٹ ہے۔ ان کے مطابق ٹیم نے ارجنٹینا اور آسٹریلیا کے دوروں سے اچھی تیاری حاصل کی ہے اور اب مقصد پورے ٹورنامنٹ میں مستقل مزاج کارکردگی دکھانا ہے۔

انہوں نے ٹیم کے انتخاب پر اظہار خیال کرتے ہوئے کہا کہ اسکواڈ میں تجربے اور نوجوان جوش کا بہترین امتزاج موجود ہے۔ سویتا۔ سشیلا۔ نکی اور نوینت جیسی کھلاڑیاں بڑے ٹورنامنٹس کا تجربہ رکھتی ہیں جبکہ نوجوان کھلاڑیوں کو بھی اپنی صلاحیتیں منوانے کا بہترین موقع ملے گا۔

ہندوستان اپنی مہم کا آغاز 15 جون کو امریکہ کے خلاف کرے گا۔ اس کے بعد 16 جون کو جاپان اور 18 جون کو یوراگوئے کا سامنا کرے گا۔ سیمی فائنل 20 جون جبکہ فائنل 21 جون کو کھیلا جائے گا۔

ہندوستانی خواتین ہاکی ٹیم

گول کیپرز: سویتا۔ بیچو دیوی کھریبام

ڈیفینڈرز: سشیلا چانو پکھرمبم۔ ایشیکا چودھری۔ للتھانتلوانگی۔ شلپی داباس۔ جیوتی۔ نکی پردھان

مڈفیلڈرز: سلیمہ ٹیٹے (کپتان)۔ نہا۔ سنیلیتا ٹوپو۔ ساکشی رانا۔ دیپیکا سورینگ۔ سونم۔ لالریمسیمی

فارورڈز: نوینت کور۔ دیپیکا۔ روتوجا داداسو پیسال۔ ایشیکا۔ انو۔