کابلافغانستان کے تجربہ کار بلے باز ہاشمت اللہ شاہدی نے قومی ون ڈے ٹیم کی کپتانی سے استعفیٰ دے دیا ہے۔ اس کے ساتھ ہی 2022 کے آغاز میں شروع ہونے والی ان کی قیادت کا دور اختتام پذیر ہو گیا۔31 سالہ شاہدی نے سوشل میڈیا پر اپنے فیصلے کا اعلان کیا۔ ان کی قیادت میں افغانستان نے 2023 کے آئی سی سی مردوں کے ایک روزہ عالمی کپ اور 2025 کی آئی سی سی چیمپئنز ٹرافی میں شرکت کی۔

ہاشمت اللہ شاہدی کی کپتانی میں افغانستان نے ون ڈے کرکٹ میں کئی یادگار کامیابیاں حاصل کیں۔ 2023 کے عالمی کپ میں ٹیم نے انگلینڈ۔ پاکستان۔ سری لنکا اور نیدرلینڈز کو شکست دے کر شاندار کارکردگی کا مظاہرہ کیا۔ اگرچہ افغانستان ناک آؤٹ مرحلے تک رسائی حاصل نہ کر سکا لیکن ٹیم کی کارکردگی کو عالمی سطح پر سراہا گیا۔شاہدی نے 2025 کی آئی سی سی چیمپئنز ٹرافی میں بھی افغانستان کی قیادت کی اور اس دوران ٹیم نے بین الاقوامی کرکٹ میں مسلسل ترقی کا سفر جاری رکھا۔

انہوں نے اپنے استعفے کی کوئی خاص وجہ بیان نہیں کی۔ہاشمت اللہ شاہدی نے اپنے بیان میں کہا کہ میں پورے احترام اور اپنی ذاتی مرضی سے اپنی ٹیم کی کپتانی سے استعفیٰ دے رہا ہوں۔ میرے لیے یہ ایک بڑا اعزاز تھا کہ میں نے کپتان کی حیثیت سے اپنی ذمہ داری نبھائی۔ مجھے فخر ہے کہ میں نے اپنی ٹیم کے ساتھ دیانت داری۔ اتحاد اور عزم کے ساتھ خدمات انجام دیں۔

انہوں نے کہا کہ اللہ کے فضل سے حکام۔ کوچز اور کھلاڑیوں کی مشترکہ کوششوں سے ہم نے کئی اہم فتوحات حاصل کیں۔ بڑی ٹیموں کو شکست دی اور افغانستان کا نام بلند کیا۔شاہدی نے کہا کہ یہ کامیابیاں صرف میری نہیں بلکہ پوری ٹیم کی محنت۔ قربانی اور باہمی تعاون کا نتیجہ ہیں۔ انہوں نے تمام ساتھی کھلاڑیوں کا شکریہ ادا کرتے ہوئے کہا کہ ہر کامیابی اور ہر مشکل گھڑی میں ٹیم نے ان کا بھرپور ساتھ دیا۔انہوں نے افغانستان کرکٹ بورڈ کے حکام اور انتظامیہ کا بھی شکریہ ادا کیا جنہوں نے ان پر اعتماد کیا اور ہمیشہ تعاون فراہم کیا۔افغانستان کرکٹ بورڈ نے ابھی تک ون ڈے ٹیم کے نئے کپتان کے نام کا اعلان نہیں کیا ہے۔