احمد آباد (گجرات) اسٹار بلے باز وراٹ کوہلی کی نصف سنچری کی بدولت رائل چیلنجرز بنگلورو (آر سی بی) نے تاریخ رقم کرتے ہوئے کامیابی کے ساتھ اپنے انڈین پریمیئر لیگ (آئی پی ایل) خطاب کا دفاع کیا اور مجموعی طور پر اپنا دوسرا آئی پی ایل ٹائٹل جیت لیا۔ آر سی بی نے اتوار کو احمد آباد کے نریندر مودی اسٹیڈیم میں کھیلے گئے فائنل میں گجرات ٹائٹنز (جی ٹی) کو پانچ وکٹوں سے شکست دی۔

آر سی بی کے کپتان راجت پاٹیدار نے ٹاس جیت کر پہلے گیندبازی کا فیصلہ کیا۔ پہلے بلے بازی کرتے ہوئے گجرات ٹائٹنز نے 20 اوورز میں 8 وکٹوں کے نقصان پر صرف 155 رنز بنائے۔ واشنگٹن سندر 37 گیندوں پر پانچ چوکوں کی مدد سے 50 رنز بنا کر ناٹ آؤٹ رہے جبکہ نشانت سندھو نے 18 گیندوں پر تین چوکوں کی مدد سے 20 رنز بنائے۔ ان دونوں کے علاوہ کوئی بھی بلے باز 20 رنز کا ہندسہ عبور نہ کر سکا۔ آر سی بی کی جانب سے راسخ دار سلام نے 27 رنز دے کر تین وکٹیں حاصل کیں جبکہ بھونیشور کمار نے 29 رنز دے کر دو اور جوش ہیزل ووڈ نے 37 رنز دے کر دو وکٹیں حاصل کیں۔

156 رنز کے ہدف کے تعاقب میں آر سی بی نے جارحانہ آغاز کیا۔ وینکٹیش آئیر نے دوسرے اوور میں کاگیسو ربادا کو تین چوکے اور ایک چھکا لگا کر 18 رنز بٹورے۔

اگلے اوور میں محمد سراج کے خلاف تین چوکے لگے جن میں سے دو وراٹ کوہلی کے بلے سے نکلے۔ اس کے بعد کے اوور میں ہندوستانی بیٹنگ آئیکون وراٹ کوہلی نے اپنے روایتی حریف ربادا کے خلاف جارحانہ انداز اپنایا اور تین چوکے اور ایک چھکا جڑ دیا۔ اس طرح آر سی بی نے صرف 3.4 اوورز میں 50 رنز مکمل کر لیے۔

پانچویں اوور میں سراج نے وینکٹیش آئیر کو آؤٹ کر کے آر سی بی کو پہلا جھٹکا دیا۔ آئیر نے 16 گیندوں پر چار چوکوں اور دو چھکوں کی مدد سے 32 رنز بنائے۔ ربادا نے مڈ آن پر ان کا کیچ لیا۔ اس وقت آر سی بی کا اسکور 4.3 اوورز میں 62 رنز پر ایک وکٹ تھا۔

اس کے فوراً بعد ربادا نے دیودت پڈیکل کو صرف ایک رن پر آؤٹ کر دیا اور آر سی بی کا اسکور 5.1 اوورز میں 63 رنز پر دو وکٹ ہو گیا۔وراٹ کوہلی نے وکٹ کے پیچھے ایک شاندار چھکا لگایا اور پاور پلے کے اختتام پر آر سی بی کا اسکور دو وکٹوں کے نقصان پر 70 رنز تھا۔ وراٹ 35 رنز پر ناٹ آؤٹ تھے جبکہ کپتان راجت پاٹیدار ایک رن کے ساتھ کریز پر موجود تھے۔

وراٹ اور پاٹیدار نے اننگز کو آگے بڑھاتے ہوئے ایک اور اہم شراکت قائم کی۔

تاہم راشد خان نے گجرات کو میچ میں واپسی کی امید دلائی۔ انہوں نے نویں اوور میں راجت پاٹیدار کو 15 رنز اور کرنال پانڈیا کو ایک رن پر آؤٹ کر کے آر سی بی کو 8.5 اوورز میں 91 رنز پر چار وکٹوں تک محدود کر دیا۔

آر سی بی نے 9.5 اوورز میں 100 رنز مکمل کر لیے۔

وراٹ کوہلی نے آئی پی ایل پلے آف میں دس سال بعد اپنی نصف سنچری مکمل کی۔ انہوں نے صرف 25 گیندوں پر اپنی ففٹی مکمل کی جو ان کے آئی پی ایل کیریئر کی تیز ترین نصف سنچری ثابت ہوئی۔ اس اننگز میں انہوں نے سات چوکے اور دو چھکے لگائے۔

ٹم ڈیوڈ اور وراٹ کوہلی نے مل کر شراکت داری قائم رکھی اور مطلوبہ ہدف کو تیزی سے قریب لے آئے۔ تاہم 43 رنز کی شراکت اس وقت ختم ہوئی جب ٹم ڈیوڈ 17 گیندوں پر تین چوکوں اور ایک چھکے کی مدد سے 24 رنز بنا کر آؤٹ ہو گئے۔ اس وقت آر سی بی کا اسکور 16 اوورز میں 132 رنز پر پانچ وکٹ تھا۔

آخرکار وراٹ کوہلی اور جیتیش شرما نے 18 اوورز میں ہدف حاصل کر کے اپنی ٹیم کو فتح دلائی۔

دفاعی چیمپئن رائل چیلنجرز بنگلورو نے آئی پی ایل 2026 کے فائنل میں گجرات ٹائٹنز کو 155 رنز پر محدود کر دیا تھا۔

پاور پلے میں شاندار گیندبازی۔ درمیانی اوورز میں مؤثر اسپن اور گجرات کے ٹاپ آرڈر کی ناکامی نے فائنل جیسے بڑے مقابلے میں ٹیم کو مشکلات سے دوچار کر دیا۔

کپتان راجت پاٹیدار کے ٹاس جیت کر پہلے گیندبازی کرنے کے فیصلے کے بعد آر سی بی کے تیز گیندبازوں نے ٹیسٹ میچ جیسی درست لائن اور لینتھ سے آغاز کیا۔ شبھمن گل نے ابتدا میں جوابی حملہ کرنے کی کوشش کی لیکن تیسرے اوور میں جوش ہیزل ووڈ کا شکار بن گئے۔ انہوں نے 10 رنز بنائے تھے۔ اس وقت گجرات کا اسکور 2.2 اوورز میں 22 رنز پر ایک وکٹ تھا۔

سائی سدرشن بھی زیادہ دیر نہ ٹھہر سکے اور جلد ہی پویلین لوٹ گئے۔ گجرات کا اسکور 3.4 اوورز میں 26 رنز پر دو وکٹ ہو گیا۔ بھونیشور کمار کے خلاف بڑا شاٹ کھیلنے کی کوشش میں سدرشن نے شارٹ گیند پر اوپری کنارہ دے دیا اور وکٹ کیپر جیتیش شرما نے آسان کیچ لے لیا۔ پاور پلے کے اختتام پر گجرات کی ٹیم دو وکٹوں کے نقصان پر صرف 45 رنز بنا سکی تھی جبکہ جوس بٹلر اور نشانت سندھو کریز پر موجود تھے۔

اسپن گیندبازی کے آغاز نے گجرات کی مشکلات مزید بڑھا دیں۔ کرنال پانڈیا نے ساتویں اوور میں صرف پانچ رنز دیے۔ دباؤ بڑھنے کے نتیجے میں نشانت سندھو بڑا شاٹ کھیلنے کی کوشش میں آؤٹ ہو گئے اور راسخ سلام دار نے اپنی پہلی وکٹ حاصل کی۔ سندھو نے 18 گیندوں پر 20 رنز بنائے۔ آٹھ اوورز میں گجرات کا اسکور 55 رنز پر تین وکٹ تھا۔

10 اوورز کے بعد گجرات کا اسکور 63 رنز پر تین وکٹ تھا اور واشنگٹن سندر چار جبکہ جوس بٹلر 15 رنز پر ناٹ آؤٹ تھے۔

آر سی بی کے گیندباز مسلسل دباؤ برقرار رکھنے میں کامیاب رہے اور گجرات 12 اوورز میں صرف 73 رنز تک پہنچ سکی۔

13ویں اوور میں کرنال پانڈیا نے جوس بٹلر کو 23 گیندوں پر 19 رنز بنا کر آؤٹ کیا۔ اس وقت گجرات کا اسکور 83 رنز پر چار وکٹ تھا۔

ارشد خان اور واشنگٹن سندر نے اننگز کو سنبھالنے کی کوشش کی اور 14ویں اوور میں 16 رنز حاصل کیے لیکن اگلے ہی اوور میں ہیزل ووڈ نے ارشد خان کو آؤٹ کر دیا۔ ارشد نے صرف چھ گیندوں پر 15 رنز بنائے۔ 14.1 اوورز میں گجرات کا اسکور 99 رنز پر پانچ وکٹ ہو گیا۔

15 اوورز کے اختتام پر گجرات ٹائٹنز کا اسکور 105 رنز پر پانچ وکٹ تھا اور واشنگٹن سندر کے ساتھ راہل تیواتیا کریز پر موجود تھے۔

آر سی بی نے گجرات کے بلے بازوں کو کسی بھی مرحلے پر کھل کر کھیلنے کا موقع نہیں دیا۔ راسخ سلام دار نے 17ویں اوور میں راہل تیواتیا کو پانچ گیندوں پر سات رنز بنا کر آؤٹ کر دیا۔ 17 اوورز کے بعد گجرات کا اسکور 121 رنز پر چھ وکٹ تھا۔

واشنگٹن سندر اور نئے بلے باز جیسن ہولڈر نے 18ویں اوور میں 16 رنز حاصل کیے اور ٹیم کو 150 کے قریب پہنچانے کی کوشش کی۔ 18 اوورز کے بعد گجرات کا اسکور 137 رنز پر چھ وکٹ تھا۔

بھونیشور کمار نے بھی اپنے دوسرے شکار کے طور پر جیسن ہولڈر کو آؤٹ کیا۔ ہولڈر نے پانچ گیندوں پر سات رنز بنائے۔ 19 اوورز کے بعد گجرات کا اسکور 145 رنز پر سات وکٹ تھا۔

راشد خان کریز پر آئے اور آخری اوور کی پہلی ہی گیند پر راسخ سلام دار کو چھکا لگا دیا لیکن گیندباز نے اگلی ہی گیند پر انہیں آؤٹ کر کے حساب برابر کر دیا۔ اس وقت گجرات کا اسکور 19.2 اوورز میں 151 رنز پر آٹھ وکٹ تھا۔

واشنگٹن سندر نے 37 گیندوں پر اپنی نصف سنچری مکمل کی جس میں پانچ چوکے شامل تھے لیکن آخری اوور میں گجرات صرف مزید چار رنز ہی جوڑ سکی اور مقررہ 20 اوورز میں 155 رنز پر آٹھ وکٹ حاصل کر سکی۔

دفاعی چیمپئن آر سی بی کی جانب سے راسخ سلام دار نے چار اوورز میں 27 رنز دے کر تین وکٹیں حاصل کیں جبکہ بھونیشور کمار نے چار اوورز میں 29 رنز دے کر دو اور جوش ہیزل ووڈ نے چار اوورز میں 37 رنز دے کر دو وکٹیں حاصل کیں۔ کرنال پانڈیا نے بھی ایک وکٹ اپنے نام کی۔

مختصر اسکور:

گجرات ٹائٹنز: 155/8، 20 اوورز۔
واشنگٹن سندر 50 ناٹ آؤٹ۔
نشانت سندھو 20۔
راسخ سلام دار 3/27۔

رائل چیلنجرز بنگلورو: 161/5، 18 اوورز۔
وراٹ کوہلی 75 ناٹ آؤٹ۔
وینکٹیش آئیر 32۔
راشد خان 2/25۔

نتیجہ: رائل چیلنجرز بنگلورو نے گجرات ٹائٹنز کو پانچ وکٹوں سے شکست دے کر آئی پی ایل 2026 کا خطاب اپنے نام کر لیا۔ (اے این آئی)