ڈلاس : فیفا ورلڈ کپ 2026 کے پہلے سیمی فائنل میں اسپین نے شاندار کارکردگی کا مظاہرہ کرتے ہوئے دو مرتبہ کی عالمی چیمپئن فرانس کو 2-0 سے شکست دے کر 16 برس بعد ورلڈ کپ کے فائنل میں رسائی حاصل کر لی۔ ڈلاس اسٹیڈیم میں کھیلے گئے اس مقابلے میں اسپین نے ابتدا ہی سے کھیل پر مکمل گرفت برقرار رکھی اور فرانس کو زیادہ تر وقت دفاع پر مجبور رکھا۔ 

میچ کا پہلا گول 22ویں منٹ میں اس وقت سامنے آیا جب فرانسیسی ڈیفنڈر لوکاس ڈیگنے نے پینلٹی ایریا میں نوجوان اسٹار لامین یامال کو فاؤل کر دیا۔ ریفری نے ویڈیو اسسٹنٹ ریفری (VAR) سے تصدیق کے بعد اسپین کو پینلٹی دی، جسے مائیکل اویارزابال نے اعتماد کے ساتھ گول میں تبدیل کرکے اپنی ٹیم کو برتری دلا دی۔ 

Incase you miss France vs Spain match today

Here is the highlights pic.twitter.com/If8iZpjbh0

— Yakub (@Yakkubkk) July 14, 2026

اسپین نے آغاز ہی سے جارحانہ حکمت عملی اپنائی۔ 11ویں منٹ میں الیکس بائنا نے پنالٹی ایریا کے باہر سے زوردار شاٹ لگایا، تاہم گیند فرانسیسی دفاع سے ٹکرا کر باہر نکل گئی۔ اسپین کی مسلسل دباؤ والی حکمت عملی نے فرانس کے اسٹار کھلاڑیوں کیلیان ایمباپے، عثمان ڈیمبیلے اور مائیکل اولیزے کو کھل کر کھیلنے کا موقع نہیں دیا۔

فرانس نے 36ویں منٹ میں واپسی کی بہترین کوشش کی، جب عثمان ڈیمبیلے کے عمدہ پاس پر بریڈلی بارکولا نے طاقتور شاٹ لگایا، لیکن گیند گول پوسٹ سے معمولی فاصلے سے باہر چلی گئی۔

دوسرے ہاف میں بھی اسپین کا دباؤ برقرار رہا۔ 58ویں منٹ میں دانی اولمو کی خوبصورت پاس پر پیڈرو پورو نے گیند کو جال میں پہنچا کر برتری 2-0 کر دی اور فرانس کی واپسی کی امیدوں کو تقریباً ختم کر دیا۔ صرف تین منٹ بعد لامین یامال نے تیسرا گول بھی کر دیا، تاہم وی اے آر جائزے کے بعد ریفری نے اسے آف سائیڈ قرار دیتے ہوئے مسترد کر دیا۔ 

Pedro Porro goal in France vs Spain FIFA World Cup Semifinal game
pic.twitter.com/SawI4pyiWs

— Daily Foot Vibes (@dailyfootvibes) July 14, 2026

میچ کے آخری لمحات میں فرانس نے گول کا فرق کم کرنے کی بھرپور کوشش کی، لیکن اسپین کا منظم دفاع اور گول کیپر اونائی سیمون چٹان بن کر کھڑے رہے۔ پورے مقابلے میں اسپین نے فرانس کو بہت کم واضح مواقع فراہم کیے اور اپنی مضبوط دفاعی حکمت عملی کے باعث ٹورنامنٹ میں ایک اور کلین شیٹ اپنے نام کی۔

یہ کامیابی اسپین کے لیے تاریخی حیثیت رکھتی ہے۔ 2010 میں جنوبی افریقہ میں عالمی چیمپئن بننے کے بعد یہ پہلا موقع ہے کہ اسپین ورلڈ کپ کے فائنل میں پہنچا ہے۔ اس فتح کے ساتھ اسپین نے اپنی ناقابلِ شکست مہم کو بھی مزید آگے بڑھایا اور مسلسل عمدہ کارکردگی کا سلسلہ برقرار رکھا۔

یاد رہے کہ کوارٹر فائنل میں بیلجیئم کے خلاف کامیابی کے بعد نوجوان اسپینش اسٹار لامین یامال نے کہا تھا کہ "فرانس کو اسپین سے ڈرنا چاہیے۔ ہمیں بڑے مقابلے پسند ہیں اور ہم فائنل تک پہنچنے کی مکمل صلاحیت رکھتے ہیں۔" اسپین نے میدان میں اپنی کارکردگی سے یامال کے اس دعوے کو درست ثابت کر دیا۔

Spain fans celebrating their win over France in the FIFA World Cup by waving the PaIestinian flag and dancing in the streets. pic.twitter.com/5K4HxqH7rW

— 𝓙𝓲𝓶𝓶𝔂 𝓙 (@JimmyJ4thewin) July 14, 2026

اب اسپین کی نظریں اپنے دوسرے عالمی ٹائٹل پر ہیں۔ فیفا ورلڈ کپ 2026 کا دوسرا سیمی فائنل بدھ کو ارجنٹینا اور انگلینڈ کے درمیان کھیلا جائے گا، جس کی فاتح ٹیم اتوار کو ہونے والے فائنل میں اسپین کا مقابلہ کرے گی، جبکہ فرانس کو تیسری پوزیشن کے میچ میں شکست خوردہ ٹیم کا سامنا کرنا ہوگا۔

اسپین کے خلاف شکست اپنی غلطیوں سے ہوئی، اسپین یا ریفری سے نہیں: ریان چرکی

فرانس کے مڈفیلڈر ریان چرکی نے فیفا ورلڈ کپ کے سیمی فائنل میں اسپین کے ہاتھوں 2-0 کی شکست پر گہری مایوسی کا اظہار کرتے ہوئے کہا ہے کہ ٹیم کو اسپین نے نہیں بلکہ اپنی ہی کمزوریوں نے شکست دی۔

میچ کے بعد گفتگو کرتے ہوئے چرکی نے کہا کہ فرانسیسی ٹیم اپنے معیار کے مطابق کھیل پیش کرنے میں ناکام رہی اور شکست کی مکمل ذمہ داری خود ٹیم پر عائد ہوتی ہے۔

انہوں نے کہا، "یہ ہمارے لیے بہت بڑی مایوسی ہے۔ آج ہم اسپین سے نہیں بلکہ خود اپنے آپ سے ہارے ہیں۔ ہم نہ ریفری سے ہارے، نہ اسپین سے، بلکہ اپنی ہی غلطیوں سے شکست کھائی۔ سب جانتے تھے کہ دنیا کی ٹیمیں ہم سے خوفزدہ تھیں۔ ہمیں صرف ایک ہی ٹیم شکست دے سکتی تھی، اور وہ ہم خود تھے۔ آج کا دن ہمارے لیے انتہائی افسوسناک ہے۔"

جب ان سے پوچھا گیا کہ سیمی فائنل میں فرانس کس چیز میں پیچھے رہ گیا تو انہوں نے کہا کہ ٹیم ہر شعبے میں ناکام رہی۔

انہوں نے کہا، "ہر لحاظ سے ہم پیچھے رہے۔ تکنیکی اعتبار سے بھی، حکمت عملی میں بھی اور ایک کے مقابلے ایک مقابلوں میں بھی۔ یہ ہمارے لیے بہت بڑی مایوسی ہے۔"

دوسری جانب اسپین نے شاندار کھیل کا مظاہرہ کرتے ہوئے مضبوط دفاع اور مؤثر حملوں کی بدولت فرانس کو 2-0 سے شکست دے کر فائنل میں جگہ بنا لی۔اسپین کی جانب سے میکل اویارزابال نے لامین یامال پر لوکاس دینیے کی سخت ٹیکل کے بعد ملنے والی پنالٹی کو گول میں تبدیل کر کے برتری دلائی، جبکہ پیڈرو پورو نے دانی اولمو کے عمدہ پاس پر دوسرا گول کر کے کامیابی یقینی بنا دی۔

پیڈرو پورو کو شاندار کارکردگی پر میچ کا بہترین کھلاڑی قرار دیا گیا۔اس فتح کے ساتھ اسپین نے ورلڈ کپ کے فائنل میں جگہ بنا لی، جہاں اس کا مقابلہ اتوار کو انگلینڈ یا ارجنٹینا میں سے کسی ایک ٹیم سے ہوگا۔اسپین اس سے قبل صرف ایک مرتبہ ورلڈ کپ کا فائنل کھیل چکا ہے، جہاں اس نے 2010 میں جنوبی افریقہ میں نیدرلینڈز کو اضافی وقت میں آندریس انیئستا کے فیصلہ کن گول کی بدولت شکست دے کر عالمی اعزاز اپنے نام کیا تھا۔

میکل اویارزابال کی شاندار فارم بھی برقرار رہی۔ انہوں نے اسپین کے لیے اپنے آخری 20 میچوں میں 18واں گول کیا۔ اس پنالٹی گول کے ساتھ وہ اسپین کی قومی ٹیم کے لیے 30 بین الاقوامی گول کرنے والے صرف چھٹے کھلاڑی بن گئے۔ اس فہرست میں ڈیوڈ ویا، راؤل، فرنانڈو ٹوریس، الوارو موراتا اور ڈیوڈ سلوا بھی شامل ہیں۔

میچ کے آغاز میں فرانس نے کیلیان ایمباپے کے ذریعے دباؤ ڈالنے کی کوشش کی، تاہم اسپین نے جلد ہی پنالٹی کے ذریعے برتری حاصل کر لی۔ بعد ازاں فرانس نے ڈیزائر دوئے اور ریان چرکی کو میدان میں اتارا، لیکن اسپین نے کھیل پر اپنی گرفت برقرار رکھتے ہوئے فرانس کو واپسی کا کوئی موقع نہیں دیا۔اسپین کے گول کیپر اونائی سیمون نے کئی اہم بچاؤ کیے، جبکہ دفاعی کھلاڑی مارک کوکورییا نے ایمباپے کو گول کرنے سے روکنے کے لیے ایک فیصلہ کن ٹیکل کی۔

حتمی سیٹی بجتے ہی اسپین کے کھلاڑی جشن میں ڈوب گئے، جبکہ فرانس کو اب ہفتہ کے روز تیسرے نمبر کے پلے آف میچ میں شرکت کرنا ہوگی، جہاں کیلیان ایمباپے کے پاس گولڈن بوٹ کی دوڑ میں اپنے گولوں کی تعداد بڑھانے کا ایک اور موقع ہوگا۔