بوسٹن (امریکہ): فیفا ورلڈ کپ 2026 کے گروپ I کے آخری میچ میں فرانس نے عثمان ڈیمبیلے کی شاندار ہیٹ ٹرک کی بدولت ناروے کو 1-4 سے شکست دے کر گروپ میں پہلی پوزیشن حاصل کرلی۔

فرانس کے اسٹار فارورڈ عثمان ڈیمبیلے نے ساتویں، بیسویں اور بتیسویں منٹ میں شاندار ہیٹ ٹرک مکمل کی، جو فیفا ورلڈ کپ کی تاریخ کی دوسری تیز ترین ہیٹ ٹرک بھی بن گئی۔ فرانس کی جانب سے چوتھا گول ڈیزائرے دوئے نے انجری ٹائم میں کیا۔

ناروے کی جانب سے واحد گول تھیلو آسگارڈ نے اسکور کیا، جبکہ دوسرے ہاف میں ناروے کو پنالٹی بھی ملی، تاہم وہ اس سے فائدہ نہ اٹھا سکا۔ اس میچ میں ناروے کے کوچ نے اپنی ابتدائی الیون میں دس تبدیلیاں کی تھیں، جس کا اثر ٹیم کی کارکردگی پر واضح نظر آیا۔ فرانس نے اس کامیابی کے ساتھ گروپ میں پہلی پوزیشن مستحکم کر لی۔

دونوں ٹیمیں اپنے ابتدائی دو میچ جیت کر پہلے ہی ناک آؤٹ مرحلے کے لیے کوالیفائی کر چکی تھیں، تاہم گروپ میں سرفہرست رہنے کے لیے فرانس کو صرف ایک ڈرا درکار تھا۔ اس کے باوجود فرانسیسی ٹیم نے جارحانہ کھیل پیش کرتے ہوئے بڑی کامیابی اپنے نام کی۔

عثمان ڈیمبیلے نے میچ کے ساتویں منٹ میں پہلا گول کیا، پھر 20ویں منٹ میں باکس سے باہر سے شاندار شاٹ کے ذریعے دوسرا گول داغ دیا۔ ناروے نے 21ویں منٹ میں تھیلو آسگارڈ کے ذریعے ایک گول واپس کیا، لیکن ڈیمبیلے نے 32ویں منٹ میں تیسرا گول کر کے اپنی ہیٹ ٹرک مکمل کرتے ہوئے اسکور 1-3 کر دیا۔

ڈیمبیلے کی یہ ہیٹ ٹرک اکیسویں صدی کے فیفا ورلڈ کپ میں پہلے ہاف کے دوران ہونے والی پہلی ہیٹ ٹرک بھی بن گئی۔

دوسرے ہاف میں ناروے کو واپسی کا موقع ملا، لیکن اسٹرائیکر یورگن اسٹرینڈ لارسن پنالٹی ضائع کر بیٹھے، جس سے ٹیم کی امیدوں کو بڑا دھچکا لگا۔

اضافی وقت (94ویں منٹ) میں فرانس کے ونگر دیزیرے دوئے نے بریڈلی بارکولا کی عمدہ کراس پر شاندار ہیڈر کے ذریعے چوتھا گول کر کے فرانس کی فتح پر مہر ثبت کر دی۔

اس کامیابی کے ساتھ فرانس نے مسلسل چوتھے ورلڈ کپ میچ میں تین یا اس سے زیادہ گول کرنے کا کارنامہ انجام دیا، جو 1998 سے 2002 کے درمیان اسپین کے بعد کسی بھی ٹیم کی طویل ترین ایسی سیریز ہے۔

گروپ I میں دوسرے نمبر پر رہنے والی ناروے کی ٹیم اب راؤنڈ آف 32 میں ڈلاس میں آئیوری کوسٹ کا سامنا کرے گی، جبکہ فرانس مشرقی ساحل پر ہی تیسرے نمبر پر آنے والی کسی کوالیفائر ٹیم کے خلاف اپنا اگلا میچ کھیلے گا۔