ازٹیکا اسٹیڈیم میں کھیلے گئے اس مقابلے میں تقریباً ایک گھنٹے کی موسمی رکاوٹ بھی پیش آئی جبکہ دوسرے ہاف میں انگلینڈ کو ایک کھلاڑی کے اخراج کے بعد 10 کھلاڑیوں کے ساتھ کھیلنا پڑا۔ اس کے باوجود ٹیم نے اپنی برتری برقرار رکھتے ہوئے کامیابی حاصل کر لی۔1966 کے بعد اپنے پہلے عالمی خطاب کی تلاش میں موجود انگلینڈ اب سیمی فائنل میں جگہ بنانے کے لیے ہفتے کے روز میامی گارڈنز میں ناروے کا مقابلہ کرے گا۔ ناروے کی قیادت اسٹار اسٹرائیکر ایرلنگ ہالینڈ کر رہے ہیں۔
میکسیکو دو بار دو گول کے خسارے سے واپس آیا لیکن میچ برابر کرنے میں ناکام رہا۔ اس کے ساتھ ہی 1986 کے بعد پہلی بار ورلڈ کپ کوارٹر فائنل میں پہنچنے کا اس کا انتظار مزید طویل ہو گیا۔انگلینڈ کے مڈفیلڈر جوڈ بیلنگہم نے 36ویں اور 38ویں منٹ میں دو گول کر کے اپنی ٹیم کو مضبوط برتری دلائی۔ تاہم وقفے سے قبل 42ویں منٹ میں میکسیکو کے جولین کوئنونیس نے گول کر کے مقابلہ ایک بار پھر دلچسپ بنا دیا۔
دوسرے ہاف کے 54ویں منٹ میں وی اے آر جائزے کے بعد انگلینڈ کے دفاعی کھلاڑی جیرل کوانسہ کو جیسس گیارڈو پر سخت ٹیکل کرنے کے باعث سیدھا ریڈ کارڈ دکھا دیا گیا۔کوانسہ فیفا ورلڈ کپ کی تاریخ میں ریڈ کارڈ حاصل کرنے والے انگلینڈ کے چوتھے کھلاڑی بن گئے۔ ان سے قبل وین رونی، رے ولکنز اور ڈیوڈ بیکہم کو بھی ورلڈ کپ میں ریڈ کارڈ مل چکا ہے۔
ریڈ کارڈ کے بعد انگلینڈ کے کوچ تھامس ٹوخیل نے دفاع مضبوط کرنے کے لیے بوکایو ساکا کی جگہ جان اسٹونز کو میدان میں اتارا۔10 کھلاڑیوں کے ساتھ کھیلنے کے باوجود انگلینڈ نے 60ویں منٹ میں اپنی برتری 1-3 کر دی جب ہیری کین نے انتھونی گورڈن پر فاؤل ہونے کے بعد ملنے والی پنالٹی کو گول میں تبدیل کیا۔
میکسیکو نے 69ویں منٹ میں راؤل خیمنیز کی پنالٹی کے ذریعے دوسرا گول کر کے اسکور 2-3 کر دیا لیکن باقی وقت میں برابر کرنے میں ناکام رہا۔اعداد و شمار کے مطابق میکسیکو 1986 کے بعد آٹھویں مرتبہ ورلڈ کپ کے پری کوارٹر فائنل مرحلے سے باہر ہوا ہے۔ 1970 اور 1986 میں میزبان ہونے کے دوران ہی وہ آخری 16 کے مرحلے سے آگے بڑھنے میں کامیاب ہوا تھا۔
