نیویارک: ناروے کے اسٹار اسٹرائیکر ارلنگ ہالینڈ نے میچ کے آخری لمحات میں شاندار دو گول کرکے پانچ بار کی عالمی چیمپئن برازیل کو 2-1 سے شکست دے دی، جس کے ساتھ ہی ناروے نے اتوار کو میٹ لائف اسٹیڈیم میں کھیلے گئے فیفا ورلڈ کپ 2026 کے پری کوارٹر فائنل میں تاریخی کامیابی حاصل کرتے ہوئے پہلی بار کوارٹر فائنل میں جگہ بنا لی۔

ورلڈ کپ کی تاریخ میں اس سے قبل کبھی بھی راؤنڈ آف 16 سے آگے نہ بڑھنے والی ناروے کی ٹیم نے برازیل کے مسلسل دباؤ کا بھرپور مقابلہ کیا اور میچ کے آخری حصے میں ہالینڈ کے دو گولوں کی بدولت فتح اپنے نام کی۔ برازیل کے نیمار نے اضافی وقت میں پنالٹی پر ایک گول کرکے خسارہ کم کیا، لیکن یہ گول برازیل کو شکست سے نہ بچا سکا۔

میچ کے آغاز میں ناروے نے جارحانہ کھیل پیش کیا اور پیٹرک برگ نے الیگزینڈر سورلوتھ کے پاس پر گیند جال میں پہنچا دی، تاہم آف سائیڈ قرار دیے جانے کے باعث گول مسترد ہوگیا۔

اس کے بعد وی اے آر جائزے کے بعد کرسٹوفر آجر کی جانب سے ماتھیوس کونیا پر فاؤل کے نتیجے میں برازیل کو پنالٹی ملی، لیکن برونو گیماریش اس سنہری موقع سے فائدہ نہ اٹھا سکے اور ناروے کے گول کیپر اوریان نیلینڈ نے آسانی سے ان کی کک روک لی۔

برازیل نے اس کے بعد بھی گیند پر زیادہ کنٹرول رکھا اور متعدد مواقع پیدا کیے، مگر نیلینڈ نے شاندار گول کیپنگ کا مظاہرہ کرتے ہوئے گیبریل مارٹینیلی اور ونیشیئس جونیئر کی کوششیں ناکام بنا دیں۔ پہلے ہاف کے اختتام سے قبل مارٹن اوڈیگارڈ نے بھی برازیل کے گول کیپر ایلیسن بیکر کو آزمائش میں ڈالا، لیکن دونوں ٹیمیں بغیر کسی گول کے وقفے پر گئیں۔

دوسرے ہاف میں برازیل کے کوچ کارلو اینچیلوتی نے نوجوان فارورڈ اینڈرک کو میدان میں اتارا، جنہوں نے آتے ہی خطرناک حملہ کیا، تاہم وہ بہترین موقع ضائع کر بیٹھے۔ کچھ دیر بعد نیلینڈ نے رایان کی کوشش بھی ناکام بنا دی۔

ناروے نے رفتہ رفتہ کھیل پر گرفت مضبوط کی اور متبادل کھلاڑی آندریاس شیلڈروپ نے حملوں میں نئی جان ڈال دی۔ 79ویں منٹ میں انہی کے شاندار کراس پر ہالینڈ نے زبردست ہیڈر کے ذریعے گول کرکے ناروے کو برتری دلائی۔

برازیل نے برابری کی بھرپور کوشش کی، لیکن ہالینڈ نے ایک بار پھر دفاع کو چیرتے ہوئے باکس کے اندر گیند سنبھالی اور پرسکون انداز میں بائیں پاؤں سے دوسرا گول داغ دیا۔ اس کے ساتھ ہی وہ ٹورنامنٹ میں لیونل میسی اور کائلین ایمباپے کے ہمراہ سات گول کرکے گولڈن بوٹ کی دوڑ میں برابر آگئے۔

اضافی وقت میں لیو اوسٹیگارڈ کے فاؤل پر برازیل کو ایک اور پنالٹی ملی، جسے نیمار نے کامیابی سے گول میں تبدیل کیا، مگر یہ صرف شکست کا مارجن کم کرنے کے لیے کافی ثابت ہوا۔

اس تاریخی کامیابی کے ساتھ ناروے نے برازیل کے خلاف اپنی ناقابلِ شکست پانچ میچوں کی روایت برقرار رکھی اور پہلی مرتبہ ورلڈ کپ کے کوارٹر فائنل میں رسائی حاصل کرلی، جہاں اس کا مقابلہ میکسیکو یا انگلینڈ سے ہوگا۔ دوسری جانب برازیل کو یورپی ٹیموں کے خلاف مسلسل ساتویں ناک آؤٹ شکست کا سامنا کرنا پڑا، جس کے ساتھ ہی اس کی ایک اور مایوس کن ورلڈ کپ مہم اختتام پذیر ہوگئی۔