چنئی: چنئی سپر کنگز کے ہیڈ کوچ اسٹیفن فلیمنگ نے انکشاف کیا ہے کہ ایم ایس دھونی ایک مسلسل پنڈلی کی انجری کا شکار ہیں جس کے باعث ان کی آئی پی ایل 2026 میں واپسی میں تاخیر ہو رہی ہے۔فلیمنگ کے مطابق یہ انجری نازک نوعیت کی ہے اور اگر دوبارہ چوٹ لگتی ہے تو دھونی پورے سیزن سے باہر ہو سکتے ہیں۔ اسی لیے وہ اس وقت مکمل طور پر ریکوری اور فٹنس بحال کرنے پر توجہ دے رہے ہیں۔

اگرچہ دھونی مارچ سے ٹیم کے ساتھ موجود ہیں اور پریکٹس سیشنز اور نیٹ میں بھی حصہ لیتے رہے ہیں، لیکن وہ اب تک آئی پی ایل 2026 کے آٹھ میچوں میں سے کسی میں بھی میدان میں نہیں اتر سکے۔اسٹیفن فلیمنگ نے کہا کہ دھونی کی انجری پیچیدہ ہے اور ایک وارم اپ میچ کے دوران ان کی پنڈلی دوبارہ متاثر ہوئی جس کے بعد انہیں آرام اور بحالی پر توجہ دینا پڑی۔

انہوں نے بتایا کہ دھونی فزیو تھراپی کے ساتھ سخت محنت کر رہے ہیں اور بتدریج بہتری دکھا رہے ہیں لیکن ابھی ان کی مکمل واپسی کا وقت طے نہیں ہے۔فلیمنگ کے مطابق دھونی نہ صرف اپنی فٹنس پر کام کر رہے ہیں بلکہ پریکٹس سیشنز میں نوجوان کھلاڑیوں کو بھی دیکھ رہے ہیں اور ان کی صلاحیتوں کا جائزہ لے رہے ہیں تاکہ ٹیم کی تیاری بہتر ہو سکے۔

انہوں نے کہا کہ دھونی کی واپسی کے حوالے سے کوئی حتمی تاریخ نہیں دی جا سکتی لیکن وہ مسلسل بہتری کی طرف بڑھ رہے ہیں اور ممکن ہے کہ جلد میدان میں واپس آ جائیں۔چنئی سپر کنگز اس وقت آٹھ میچوں کے بعد پوائنٹس ٹیبل پر چھٹے نمبر پر ہے جہاں اس نے تین میچ جیتے اور پانچ ہارے ہیں۔ ٹیم کے باقی چھ میچ باقی ہیں اور اگلا مقابلہ دو مئی کو ممبئی انڈینز کے خلاف ہوگا۔