بنگلورو: رائل چیلنجرز بنگلورو نے آئی پی ایل 2026 کے ایک اہم میچ میں چنئی سپر کنگز کو 43 رنز سے شکست دے دی، جس کے ساتھ ہی چنئی کو مسلسل تیسری ناکامی کا سامنا کرنا پڑا۔

ایم چناسوامی اسٹیڈیم میں کھیلے گئے اس مقابلے میں آر سی بی نے پہلے بیٹنگ کرتے ہوئے 250 رنز کا بڑا اسکور بنایا۔ ٹیم کی جانب سے ٹم ڈیوڈ نے صرف 25 گیندوں پر شاندار 70 رنز کی ناقابل شکست اننگز کھیلی جبکہ دیودت پڈیکل اور کپتان راجت پٹیدار نے بھی نصف سنچریاں اسکور کیں۔

ہدف کے تعاقب میں چنئی سپر کنگز کی بیٹنگ ابتدا ہی سے دباؤ کا شکار رہی اور ابتدائی وکٹیں جلد گر گئیں۔ کپتان رتوراج گائیکواڑ اور سنجو سیمسن کم اسکور پر آؤٹ ہو گئے جس کے بعد ٹیم سنبھل نہ سکی۔

بعد میں سرفراز خان نے 25 گیندوں پر 50 رنز اور پرشانت ویر نے 43 رنز بنا کر مزاحمت کی کوشش کی جبکہ جیمی اوورٹن نے بھی 37 رنز کی اننگز کھیلی، مگر ٹیم 19.4 اوورز میں 207 رنز پر آل آؤٹ ہو گئی۔

بولنگ میں بھونیشور کمار نے تین وکٹیں حاصل کیں اور شاندار کارکردگی کا مظاہرہ کیا۔

اس جیت کے ساتھ آر سی بی پوائنٹس ٹیبل پر سرفہرست آ گئی ہے جبکہ چنئی سپر کنگز مسلسل تین شکستوں کے بعد آخری نمبر پر موجود ہے۔