ویانا۔:اقوام متحدہ کی انسانی حقوق کونسل کے 61ویں اجلاس میں جوبلی کیمپین کی نمائندہ ہلدا فہمی نے خصوصی مندوب برائے تشدد کے ساتھ مکالمے کے دوران مطالبہ کیا کہ غیر انسانی توہین مذہب اور ارتداد سے متعلق قوانین کو ترجیحی بنیادوں پر ختم کیا جائے۔ انہوں نے کہا کہ ان 11 ممالک میں بھی یہ قوانین منسوخ کیے جائیں جہاں حقیقی یا مبینہ ارتداد یا توہین مذہب پر سزائے موت دی جاتی ہے۔

انہوں نے ضمیر اور عقیدے کی بنیاد پر قید تمام مذہبی قیدیوں کی رہائی کا بھی مطالبہ کیا جن میں پاکستان کی مسیحی خاتون شگفتہ کرن کا نام بھی شامل ہے۔

ہلدا فہمی نے اپنی گفتگو میں کہا کہ متاثرین کی کہانیاں بہت کچھ سکھاتی ہیں۔ انہوں نے 2014 کا حوالہ دیتے ہوئے بتایا کہ سوڈان میں مریم ابراہیم کو اسلام سے ارتداد کے الزام میں سزائے موت اور ایک مسیحی شخص سے شادی کی بنیاد پر 100 کوڑوں کی سزا سنائی گئی کیونکہ حکام نے اس شادی کو کالعدم قرار دیا تھا۔

انہوں نے کہا کہ دوران حراست مریم ابراہیم کو اپنے ضمیر کے مطابق زندگی گزارنے کے انتخاب پر جسمانی اور ذہنی تشدد کا نشانہ بنایا گیا۔ ان کے مطابق عدالت میں سوال اٹھانے پر بھی انہیں سزا دی گئی۔ انہوں نے نقل کیا کہ مریم نے جج سے پوچھا کہ اگر وہ مسلمان لڑکی ہیں تو مسیحی مرد سے شادی کیوں نہیں کر سکتیں۔ اس سوال کے بعد انہیں تین دن تک ہاتھ پیچھے باندھ کر رکھا گیا حالانکہ وہ حاملہ تھیں اور اپنے بیٹے کی دیکھ بھال کی ذمہ داری بھی ان پر تھی۔

ہلدا فہمی نے زور دیا کہ توہین مذہب کے قوانین کو غیر انسانی سلوک کے لیے استعمال کیا جا رہا ہے۔ انہوں نے انسانی حقوق کونسل سے مطالبہ کیا کہ ایسے قوانین کو فوری طور پر ختم کرنے کو ترجیح دی جائے اور تمام مذہبی قیدیوں کو رہا کیا جائے جن میں نائجیریا کے صوفی گلوکار یحییٰ شریف امینو پاکستان کی شگفتہ کرن لیبیا کے دیا ویتنام کے ایونگ بوداپ اور سعید عبدالرزاق شامل ہیں۔

الجزیرہ کے مطابق ناقدین کا کہنا ہے کہ پاکستان میں توہین مذہب کا قانون اکثر اقلیتی برادریوں کے خلاف اور بعض اوقات ذاتی دشمنیوں کے لیے بھی استعمال ہوتا ہے۔

قانون کے مطابق رسول اکرم حضرت محمد صلی اللہ علیہ وسلم کے بارے میں کسی بھی قسم کے توہین آمیز الفاظ خواہ زبانی ہوں یا تحریری یا اشاروں کنایوں کے ذریعے براہ راست یا بالواسطہ کہے جائیں ان کی سزا موت یا عمر قید اور جرمانہ ہو سکتی ہے۔