دبئی [متحدہ عرب امارات]، : پاکستان کے تیز گیند باز حارث رؤف نے ایشیا کپ میں روایتی حریف ہندوستان کے خلاف سپر فور کے میچ میں نہ صرف اپنی کارکردگی بلکہ میدان کے باہر ایک متنازع اشارے کی وجہ سے بھی شہ سرخیاں بٹوریں۔ اس میچ میں پاکستان کو چھ وکٹ سے بدترین شکست کا سامنا کرنا پڑا۔
میچ کی دوسری اننگز کے دوران، حارث رؤف جو باؤنڈری لائن کے قریب فیلڈنگ کر رہے تھے، بھارتی تماشائیوں کے جملوں کا جواب ایک اشارے سے دیا۔ انہوں نے اپنی انگلیوں سے "0-6" دکھایا، جو پاکستان کے ان بے بنیاد دعوؤں کی طرف اشارہ تھا کہ انہوں نے مئی میں "آپریشن سندور" کے بعد چار روزہ سرحدی جھڑپ کے دوران چھ بھارتی لڑاکا طیارے مار گرائے تھے۔
یہ ردعمل تیزی سے وائرل ہوگیا اور سوشل میڈیا پر اس کے ویڈیوز گردش کرنے لگے۔ 31 سالہ فاسٹ بولر کو اس حرکت پر بھارتی شائقین کی جانب سے سخت تنقید اور طنز کا سامنا کرنا پڑا۔ اس موقع پر بھارتی مداحوں نے انہیں "ویرات کوہلی" کے نعرے لگا کر چھیڑا۔
اگرچہ ویرات کوہلی اس میچ میں موجود نہیں تھے کیونکہ انہوں نے گزشتہ برس اس فارمیٹ سے ریٹائرمنٹ لے لی تھی، لیکن ان کا نام 2022 کے ٹی ٹوئنٹی ورلڈ کپ کے تاریخی میچ کی یاد تازہ کرنے کے لیے لیا گیا۔ اس وقت میلبرن کرکٹ گراؤنڈ پر ویرات کوہلی نے پاکستان کے خلاف شاندار "ایمپرر شاٹ" اور ایک اور چھکا لگا کر ہندوستان کی یادگار فتح میں کلیدی کردار ادا کیا تھا۔
باؤنڈری لائن پر ان کے ڈرامائی انداز کے علاوہ، حارث رؤف کی ہندوستان کے اوپنر ابھشیک شرما کے ساتھ بھی تلخ کلامی ہوئی۔ یہ واقعہ پانچویں اوور کی آخری گیند پر پیش آیا جب شبھمن گل نے ایک خوبصورت شارٹ آرم جیب کھیلا اور گیند کو باؤنڈری تک پہنچایا۔ اوور ختم ہونے کے بعد ابھشیک اور رؤف کے درمیان سخت جملوں کا تبادلہ ہوا، جس پر امپائر غازی سہیل کو مداخلت کرکے دونوں کو الگ کرنا پڑا۔
پاکستان کے ایک اور کھلاڑی کا جشن منانے کا انداز بھی زیرِ بحث آیا۔ بلے باز صاحبزادہ فرحان، جنہوں نے بھارتی باؤلنگ اٹیک کے خلاف مزاحمت دکھائی، اپنی نصف سنچری مکمل کرنے کے بعد بیٹ کو بندوق کی طرح لہراتے ہوئے خوشی منائی۔ اس اشارے نے بھی بھارتی مداحوں کو ناراض کیا، جنہوں نے پاکستانی ٹیم پر غیر ضروری ڈرامہ کرنے اور کھیل کی روح کے منافی رویہ اپنانے کا الزام لگایا۔
میچ کی بات کی جائے تو پاکستان نے پہلے بلے بازی کرتے ہوئے 171/5 کا اسکور بنایا، جو ہندوستان کے خلاف ٹی ٹوئنٹی میں ان کا سب سے بڑا اسکور ہے۔ تاہم جواب میں ابھشیک (74) اور شبھمن گل (47) نے 105 رنز کی شاندار اوپننگ شراکت قائم کر کے ہندوستان کو آسان فتح دلا دی۔
