بیونس آئرس۔ ارجنٹینا کے صدر خاویر میلی نے عالمی شہرت یافتہ فٹ بالر لیونل میسی کے بین الاقوامی فٹ بال سے ریٹائرمنٹ کے اعلان کے بعد ان کی شاندار کامیابیوں کو خراج تحسین پیش کیا ہے۔میسی نے پیر کے روز بین الاقوامی فٹ بال سے ریٹائرمنٹ کا اعلان کرتے ہوئے اپنے ایک عظیم الشان بین الاقوامی کیریئر کا اختتام کردیا۔ ان کے کیریئر میں ریکارڈز۔ دل توڑ دینے والی شکستیں۔ بے شمار گول اور آخرکار کامیابی اور سربلندی کے یادگار لمحات شامل رہے۔39 سالہ میسی نے ارجنٹینا کے 2026 کے فیفا ورلڈ کپ فائنل میں اسپین کے ہاتھوں 1-0 کی شکست کے ایک ماہ سے زائد عرصے بعد اپنی ریٹائرمنٹ کا اعلان کیا۔ یہ اعلان ان کے والد جارج میسی کے انتقال کے چند روز بعد سامنے آیا۔ میسی کے والد 8 اگست کو وسطی ارجنٹینا کے شہر روزاریو میں 68 برس کی عمر میں انتقال کرگئے تھے۔

ارجنٹینا کے صدر خاویر میلی نے اپنے انسٹاگرام پر میسی کو خراج تحسین پیش کرتے ہوئے ہسپانوی زبان میں لکھا کہ بہت بہت شکریہ ناممکن انسان۔433 کے مطابق میسی نے اپنے تحریری بیان میں کہا کہ فائنل کے بعد گزرنے والے اس تمام وقت اور بہت زیادہ غور و فکر کے بعد میں سب کو بتانا چاہتا ہوں کہ میں قومی ٹیم سے ریٹائر ہورہا ہوں۔ یہ ایک ایسا فیصلہ ہے جس نے مجھے تکلیف دی ہے اور اب بھی دل کی گہرائیوں میں درد دیتا ہے لیکن میں سمجھتا ہوں کہ یہی صحیح وقت ہے۔انہوں نے کہا کہ میں قسم کھا کر کہتا ہوں کہ میں نے ہمیشہ اپنا سب کچھ دیا۔ صرف گزشتہ چند برسوں میں نہیں جب ہم نے سب کچھ جیت لیا بلکہ اس سے پہلے بھی۔ میں نے ہمیشہ اس جرسی کے لیے جدوجہد کی اور اپنا سب کچھ دیا تاکہ آپ کو خوشی دے سکوں اور آپ کو فٹ بال کے ذریعے ارجنٹینا سے تعلق رکھنے پر فخر محسوس ہو۔

میسی نے اعتراف کیا کہ اپنے کیریئر کے اس باب کا اختتام انہیں بہت زیادہ تکلیف دے رہا ہے کیونکہ وہ اپنی تمام صلاحیتیں قومی ٹیم کے لیے صرف کرچکے ہیں اور اب ان کے پاس دینے کے لیے کچھ باقی نہیں ہے۔ انہوں نے ٹیم میں ابھرنے والے نوجوان کھلاڑیوں کا بھی ذکر کرتے ہوئے کہا کہ وہ قومی ٹیم میں جگہ کے مستحق ہیں۔انہوں نے کہا کہ اب زیادہ وقت باقی نہیں ہے اور زندگی کے مختلف ابواب اختتام کی طرف بڑھ رہے ہیں۔ یہ ایک ایسا باب ہے جس کا اختتام مجھے بہت زیادہ تکلیف دے رہا ہے۔ میں قومی ٹیم کا حصہ بننے سے محبت کرتا تھا۔ کرتا ہوں اور ہمیشہ کرتا رہوں گا۔ میں نے اپنا سب کچھ دیا اور اب میرے پاس دینے کے لیے کچھ باقی نہیں ہے۔ اس کے ساتھ ساتھ بہترین نوجوان کھلاڑی سامنے آرہے ہیں اور وہ یہاں ہونے کے مستحق ہیں۔

میسی نے گزشتہ دو دہائیوں کے دوران ملنے والی محبت پر اپنے مداحوں کا شکریہ ادا کیا۔ انہوں نے کہا کہ اب وہ میدان میں مداحوں کی حمایت کو یاد کریں گے لیکن آئندہ قومی ٹیم کے اچھے اور برے وقت میں خود بھی ایک مداح کی حیثیت سے اس کے ساتھ ہوں گے۔انہوں نے کہا کہ میں اپنے خاندان کا شکریہ ادا کرتا ہوں جو ہمیشہ میرے ساتھ رہا اور اس خوبصورت مگر مشکل سفر میں میرا ساتھ دیا۔ میں ہر اس کوچ۔ ساتھی کھلاڑی اور عہدیدار کا بھی شکریہ ادا کرتا ہوں جس کے ساتھ مجھے یہ سفر بانٹنے کا موقع ملا۔ میں اپنے ساتھ ناقابل فراموش یادیں اور لمحات لے کر جارہا ہوں۔

میسی نے مزید کہا کہ میں سکون اور فخر کے ساتھ رخصت ہورہا ہوں کیونکہ مجھے معلوم ہے کہ میں اور میرے ساتھیوں نے مل کر آپ کو وہ لمحات دیے جن کا ہم نے کبھی خواب دیکھا تھا۔ آپ سب کے ساتھ یہ سب کچھ جینا ایک ناقابل یقین تجربہ تھا۔ میں آپ سب سے محبت کرتا ہوں۔اپنے پیغام کے اختتام پر انہوں نے کہا کہ مجھے ارجنٹینا میں پیدا کرنے کے لیے میں خدا کا شکر گزار ہوں۔ ارجنٹینا زندہ باد۔ میں نے یہ الفاظ فائنل کے دو دن بعد 21 جولائی کو لکھے تھے۔ آج میرے والد کے ساتھ جو کچھ ہوا اس کے بعد میں پہلے سے بھی زیادہ اپنے اس فیصلے پر قائم اور مطمئن ہوں۔ارجنٹینا کے کپتان میسی اپنے ملک کی جانب سے سب سے زیادہ میچ کھیلنے والے اور سب سے زیادہ گول کرنے والے کھلاڑی ہیں۔ انہوں نے قومی ٹیم کے لیے 203 میچوں میں 124 گول کیے ہیں۔ وہ جنوبی امریکی فٹ بال کی تاریخ میں بھی سب سے زیادہ گول کرنے والے کھلاڑی ہیں۔

2022 میں برسوں کی ناکامیوں اور دل توڑ دینے والی شکستوں کے بعد میسی نے بالآخر فیفا ورلڈ کپ کا تاج اپنے سر سجایا۔ خاص طور پر 2014 کے ورلڈ کپ فائنل میں جرمنی کے ہاتھوں شکست کے بعد ان کا ورلڈ کپ جیتنے کا خواب مزید گہرا ہوگیا تھا۔ قطر میں انہوں نے کلیان ایمباپے کی قیادت والی فرانس کی ٹیم کو شکست دے کر ورلڈ کپ جیت لیا۔ یہ 36 برس بعد ارجنٹینا کا پہلا ورلڈ کپ ٹائٹل اور مجموعی طور پر تیسرا عالمی اعزاز تھا۔اس سے قبل میسی نے ارجنٹینا کے 28 سالہ اعزازات کے قحط کو ختم کرنے میں بھی اہم کردار ادا کیا تھا۔ انہوں نے 2021 میں کوپا امریکا کا خطاب جیتا اور ورلڈ کپ کی فتح کے بعد 2024 میں مسلسل دوسری مرتبہ کوپا امریکا کا اعزاز بھی اپنے نام کیا۔

میسی نے 2016 میں چلی کے خلاف کوپا امریکا کے فائنل میں شکست کے بعد بھی بین الاقوامی فٹ بال سے ریٹائرمنٹ کا اعلان کیا تھا۔ تاہم بعد میں انہوں نے اپنا فیصلہ واپس لے لیا اور چھ برس بعد قطر میں اپنی قوم کو ورلڈ کپ کا تاج پہنایا۔ فرانس کے خلاف فائنل میں میسی نے دو گول کیے اور پنالٹی شوٹ آؤٹ میں بھی اپنا پنالٹی گول میں تبدیل کیا۔ مقررہ اور اضافی وقت کے اختتام پر مقابلہ 3-3 سے برابر تھا جس کے بعد ارجنٹینا نے پنالٹی شوٹ آؤٹ میں 4-2 سے کامیابی حاصل کی۔

میسی نے 2006 سے 2026 تک چھ فیفا ورلڈ کپ مقابلوں میں شرکت کی اور 34 میچوں میں 21 گول کیے۔ وہ ورلڈ کپ کی تاریخ میں دوسرے سب سے زیادہ گول کرنے والے کھلاڑی ہیں جبکہ فرانس کے کلیان ایمباپے 22 گول کے ساتھ سرفہرست ہیں۔اس سال کے ورلڈ کپ میں میسی نے 8 گول کیے اور 4 گول میں مدد فراہم کی جس کے باعث وہ ٹورنامنٹ کے نمایاں ترین کھلاڑیوں میں شامل رہے۔ اس دوران انہوں نے الجزائر کے خلاف اپنے ورلڈ کپ کیریئر کی پہلی ہیٹ ٹرک بھی مکمل کی۔ انہوں نے جرمنی کے عظیم کھلاڑی میروسلاف کلوزے کا ورلڈ کپ میں سب سے زیادہ گول کرنے کا ریکارڈ توڑ دیا تھا لیکن بعد میں ایمباپے نے انہیں پیچھے چھوڑ کر پہلی پوزیشن حاصل کرلی۔تاہم میسی کلب فٹ بال سے ریٹائر نہیں ہوں گے اور میجر لیگ ساکر میں اپنے کلب انٹر میامی کے لیے کھیلتے رہیں گے۔ انٹر میامی اس وقت 12 فتوحات۔ 6 ڈرا اور 4 شکستوں کے ساتھ 42 پوائنٹس حاصل کرکے لیگ میں چوتھے نمبر پر ہے اور سرفہرست نیشویل سے 10 پوائنٹس پیچھے ہے۔