سلہٹ بنگلہ دیش۔ افغانستان کے تجربہ کار کرکٹر محمد نبی اور ان کے بیٹے حسن عیسی خیل نے بنگلہ دیش پریمیئر لیگ میں ایک یادگار لمحہ رقم کیا۔ 41 سالہ محمد نبی اور 19 سالہ حسن عیسی خیل نے ایک ساتھ بیٹنگ کرتے ہوئے نصف سنچری شراکت قائم کی جو کرکٹ میں کم ہی دیکھنے کو ملتی ہے۔

ڈھاکہ کیپیٹلز اور نواکھالی ایکسپریس کے درمیان میچ میں باپ بیٹے کی اس جوڑی نے سلہٹ انٹرنیشنل کرکٹ اسٹیڈیم میں صرف 30 گیندوں پر 53 رنز کی شراکت قائم کی۔ یہ مقابلہ بی پی ایل 2025 26 سیزن کے دوران کھیلا گیا۔

حسن عیسی خیل نے نواکھالی ایکسپریس کی جانب سے شاندار 92 رنز کی اننگز کھیلی جو ان کی ٹیم کے لیے میچ وننگ ثابت ہوئی۔ یہ بی پی ایل میں حسن عیسی خیل کا پہلا میچ تھا۔ دوسری جانب محمد نبی نے 17 رنز کا اضافہ کیا۔ دونوں نے مل کر چوتھی وکٹ کے لیے 53 رنز جوڑے۔

بی پی ایل 2025 26 کے 22 ویں میچ میں نواکھالی ایکسپریس نے ڈھاکہ کیپیٹلز کو 41 رنز سے شکست دے دی۔ پہلے بیٹنگ کرتے ہوئے نواکھالی نے مقررہ 20 اوورز میں 7 وکٹ پر 184 رنز بنائے۔ اس اننگز کی بنیاد حسن عیسی خیل کے 60 گیندوں پر 92 رنز اور سومیا سرکار کے 25 گیندوں پر 48 رنز نے رکھی۔

ڈھاکہ کی جانب سے محمد سیف الدین اور تجول اسلام نے دو دو وکٹ حاصل کیں تاہم حسن عیسی خیل اور سومیا سرکار کے درمیان 101 رنز کی شراکت کو نہ روکا جا سکا۔

جواب میں ڈھاکہ کیپیٹلز کی ٹیم باقاعدہ وقفوں سے وکٹیں گنواتی رہی۔ محمد سیف الدین نے آخر میں 20 گیندوں پر 34 رنز بنا کر کچھ مزاحمت دکھائی مگر انہیں ٹاپ اور مڈل آرڈر سے خاطر خواہ تعاون نہ مل سکا۔

نواکھالی کی باؤلنگ یونٹ نے منظم کارکردگی کا مظاہرہ کیا۔ حسن محمود نے 3.2 اوورز میں 21 رنز دے کر 2 وکٹ حاصل کیں جبکہ محمد نبی نے 4 اوورز میں 23 رنز دے کر 2 کھلاڑیوں کو آؤٹ کیا۔ نواکھالی نے ڈھاکہ کو 18.2 اوورز میں 143 رنز پر ڈھیر کر دیا۔

یہ نواکھالی ایکسپریس کی مسلسل دوسری فتح تھی جو چھ میچوں کی شکست کے بعد حاصل ہوئی۔ اس کے باوجود ٹیم بدستور بی پی ایل 2025 26 پوائنٹس ٹیبل میں آخری نمبر پر موجود ہے۔