ثاقب سلیم

سال 1940 کی دہائی ہندوستان کی تاریخ کا ایک ہنگامہ خیز دور تھا۔ بنگال میں ایک انسان ساختہ قحط نے لاکھوں جانیں نگل لیں، تقسیم کے بعد لاکھوں افراد ہلاک یا بے گھر ہوئے، ملک مذہبی بنیادوں پر تقسیم ہوا، اور آزاد ہند فوج اور ’بھارت چھوڑو تحریک‘ کی قربانیوں نے برطانوی حکومت کے خاتمے کی راہ ہموار کی۔ ایسے پرآشوب دور میں آزاد ہندوستان کو نئے قومی ہیروز کی ضرورت تھی — نوجوانوں کو متاثر کرنے والے وہ افراد جو ان کے لیے مشعلِ راہ بنیں۔ یہاں 1940 کی دہائی کے پانچ ایسے نوجوان ہندوستانی ہیروز کا تذکرہ ہے جنہوں نے اس دور میں ایک مثال قائم کی۔

بریگیڈیئر محمد عثمان
ہندوستانی نوجوانوں کے لیے اس سے بہتر رول ماڈل اور کون ہو سکتا ہے کہ ایک مسلم فوجی افسر جس نے محمد علی جناح کی طرف سے پاکستان آرمی کا پہلا چیف آف اسٹاف بننے کی پیشکش کو ٹھکرا دیا، جس کے سر کی قیمت پاکستان نے 50 ہزار روپے رکھی، جس نے عہد کیا کہ دشمن کو شکست دیے بغیر بستر پر نہیں سوئے گا، جس نے بچوں کی ایک رضاکارانہ فوج قائم کی، اور جو میدانِ جنگ میں جان دے گیا مگر نوشہرہ جیت کر۔
بریگیڈیئر محمد عثمان نے 1947 کے اواخر اور 1948 کے آغاز میں کشمیر میں پاکستان کے خلاف بھارتی فوج کی قیادت کی اور 3 جولائی 1948 کو شہید ہوئے۔ ان کی شجاعت اور قیادت نے انہیں "نوشہرہ کا شیر" بنا دیا۔
6 فروری 1948 کو پاکستان نے نوشہرہ پر دو اطراف سے 11,000 سپاہیوں کے ساتھ حملہ کیا۔ بھارتی فوج تعداد میں کم مگر حوصلے میں بلند تھی۔ ’1 راجپوت‘ کے ’پکٹ 2‘ نے تا دمِ آخر مورچہ سنبھالے رکھا اور 27 میں سے 26 سپاہی شہید ہو گئے۔ نائک جادو ناتھ سنگھ کو اس بہادری پر بعد از مرگ پرم ویر چکر سے نوازا گیا۔ اس معرکے میں 2,000 پاکستانی فوجی مارے گئے جبکہ بھارتی فوج کے صرف 33 جوان شہید ہوئے۔
جب بریگیڈیئر عثمان دشمن کی گولہ باری سے شہید ہوئے تو ان کی نماز جنازہ میں وزیر اعظم، گورنر جنرل، وزیر دفاع، چیئرمین دستور ساز اسمبلی اور وزیر تعلیم شریک ہوئے اور ریاستی اعزاز کے ساتھ ان کی تدفین عمل میں آئی۔

ہومی جہانگیر بھابھا
اگرچہ سی وی رمن 1930 میں نوبل انعام پانے والے پہلے ہندوستانی سائنسدان تھے، مگر سائنسی ترقی کو قوم کا خواب بنانے کا سہرا ہومی جہانگیر بھابھا کے سر جاتا ہے۔ ان کی شخصیت میں صرف سائنسی ذہانت ہی نہیں، بلکہ ایک مخصوص جاذبیت اور تنظیمی صلاحیت بھی تھی۔
دوسری جنگ عظیم کے اختتام پر، بھابھا ہندوستانی تعلیم یافتہ نوجوانوں میں ایک مقبول نام بن چکے تھے۔ 32 برس کی عمر میں انہیں سی وی رمن نے ’لیونارڈو ڈاونچی کا جدید روپ‘ قرار دیا۔ 1943 میں، محض 34 برس کی عمر میں، انہوں نے جے آر ڈی ٹاٹا کو ہندوستان میں ایک تحقیقی ادارہ قائم کرنے کی تجویز دی جس کے نتیجے میں ٹاٹا انسٹیٹیوٹ آف فنڈامینٹل ریسرچ (TIFR) قائم ہوا اور ہندوستانی نیوکلیئر پروگرام کی بنیاد پڑی۔
آزادی کے فوراً بعد بھابھا نے نہرو کو ایٹامک انرجی کمیشن بنانے کی تجویز دی تاکہ ملک میں نیوکلیئر توانائی کو فروغ دیا جا سکے۔ بہت کم سائنسدان تھے جنہیں نوجوانوں میں ایسی مقبولیت حاصل ہوئی ہو۔

کیپٹن لکشمی سوامناتھن
ایک ایسے وقت میں جب ہندوستانی لڑکیوں کو اسکول جانے یا ملازمت کرنے کی بھی اجازت نہیں تھی، ایک نڈر خاتون فوجی افسر منظرِ عام پر آئیں جن کی بہادری کا موازنہ جھانسی کی رانی لکشمی بائی سے کیا گیا۔
1914 میں مالابار میں پیدا ہونے والی کیپٹن لکشمی نے 1938 میں میڈیکل کی تعلیم مکمل کی اور سنگاپور چلی گئیں۔ وہاں وہ جاپان کے ہاتھوں قید ہندوستانی سپاہیوں کی خدمت کرتی رہیں اور پھر سبھاش چندر بوس کی آزاد ہند فوج میں شامل ہو کر رانی جھانسی رجمنٹ کی کمان سنبھالی۔
جنگ کے بعد، جب آئی این اے کے سپاہیوں پر مقدمے چلے، تو کیپٹن لکشمی ان کی نمائندگی کرنے والی سب سے نمایاں شخصیت بن کر ابھریں۔ ان کے انٹرویوز اخبارات میں شائع ہوئے، وہ جلسوں سے خطاب کرتی رہیں، اور ان کی تصاویر جلوسوں میں لہرائی گئیں۔
بعد از جنگ وہ تعلیم یافتہ اور بہادر ہندوستانی خاتون کے خواب کی علامت بن گئیں۔

نوشاد
1946 کا سال تھا۔ ایک 23 سالہ نوجوان گلوکارہ، اوما دیوی عرف ٹن ٹن، اتر پردیش سے ممبئی آئی، اور اعلان کیا کہ وہ صرف ایک ہی موسیقار کے ساتھ گائے گی، اگر نہ گانے دیا گیا تو خودکشی کر لے گی۔ وہ موسیقار 26 سالہ نوشاد تھے۔
1944 میں ریلیز ہونے والی فلم ’رتن‘ کی زبردست کامیابی کے بعد نوشاد نوجوانوں کے دلوں کی دھڑکن بن چکے تھے۔ وہ ہندوستان کے پہلے ’سپر اسٹار‘ موسیقار بن گئے۔ ان کا معاوضہ فلم کے تمام اداکاروں سے زیادہ ہوتا۔
محمد رفیع جیسے نوجوان بھی نوشاد سے متاثر ہو کر پنجاب سے ممبئی آئے۔ 1940 کی دہائی میں اگر کوئی نوجوان موسیقی کے ذریعے شہرت، عزت اور انقلاب لانا چاہتا تھا تو اس کی نگاہیں نوشاد پر ٹکی ہوتیں۔

وجے  مر چنٹ
1930 کی دہائی میں وجے مرچنٹ نے ’بمبئی اسکول آف بیٹنگ‘ کی بنیاد رکھی، جس نے سنیل گاوسکر، دلیپ سردیسائی، اجیت واڈیکر، سچن ٹنڈولکر جیسے عظیم بیٹرز کو جنم دیا۔ ایک محبِ وطن شہری کی حیثیت سے انہوں نے 1932 میں انگلینڈ جانے والی پہلی ٹیسٹ ٹیم سے اپنا نام اس لیے واپس لے لیا کہ ملک میں گاندھی جی کی سول نافرمانی تحریک جاری تھی۔
ان کا فرسٹ کلاس کرکٹ میں بیٹنگ اوسط سر ڈان بریڈمین کے بعد دوسرے نمبر پر رہا۔ ان کا انداز، ان کی تکنیک، اور ان کا کردار نوجوانوں کو کرکٹ بیٹ تھامنے پر آمادہ کرتا تھا۔انہوں نے محض 10 ٹیسٹ میچز کھیلے، جن میں 47 سے زائد کی اوسط سے رنز بنائے، اور فرسٹ کلاس میں 11 ڈبل سنچریوں کا ہندوستانی ریکارڈ 60 سال تک قائم رہا۔یہ مرچنٹ ہی تھے جنہوں نے ہندوستانیوں میں بیٹنگ کو بولنگ پر فوقیت دلائی۔