ثاقب سلیم

بندوقوں سے تم دہشت گردوں کو مار سکتے ہو، تعلیم سے تم دہشت گردی کو مار سکتے ہو۔

نوبل انعام یافتہ ملالہ یوسفزئی کا یہ اکثر دہرایا جانے والا بیان اس عام یقین کی بازگشت ہے کہ کم سطح کی تعلیم اور غربت پرتشدد انتہا پسندی یا دہشت گردی کی بنیادی وجہ ہیں۔ دہلی میں حالیہ دہشت گردانہ حملے کے بعد، جس میں کم از کم درجن بھر لوگ مارے گئے، تحقیقاتی ایجنسیوں نے کئی میڈیکل ڈاکٹروں اور دیگر اعلیٰ تعلیم یافتہ لوگوں کو بم دھماکہ کی سازش کے الزام میں گرفتار کیا ہے۔
کئی لوگوں نے ڈاکٹروں کی اس مبینہ شرکت پر حیرت کا اظہار کیا ہے، کیونکہ وہ سمجھتے ہیں کہ دہشت گردی کم پڑھ لکھے یا مدرسہ پڑھے لوگوں کا کام ہے۔ یہ یقین نہ تاریخی طور پر درست ہے اور نہ ہی ڈیٹا اس کی تائید کرتا ہے۔ ایلن کروگر اور جٹکا مالیکووا نے نیشنل بیورو آف اکنامک ریسرچ کے لیے اپنی تحقیق میں پایا کہ  دہشت گرد تنظیمیں کم تعلیم یافتہ افراد کی نسبت زیادہ تعلیم یافتہ افراد کو ترجیح دے سکتی ہیں، حتیٰ کہ ہومیسائیڈ سوسائیڈ بم حملوں کے لیے بھی۔ مزید یہ کہ تعلیم یافتہ، درمیانے یا اعلیٰ طبقے کے افراد بین الاقوامی دہشت گردی میں زیادہ موزوں ہوتے ہیں بجائے غریب ان پڑھوں کے، کیونکہ دہشت گردوں کو کامیاب ہونے کے لیے غیر ملکی ماحول میں گھل مل جانا ہوتا ہے۔ اس بات سے ظاہر ہوتا ہے کہ وہ دہشت گرد جو معاشی طور پر ترقی یافتہ ممالک کو نشانہ بناتے ہیں، نسبتاً خوشحال اور اعلیٰ تعلیم یافتہ لوگوں میں سے زیادہ نکلتے ہیں۔

 ڈیئیگو گیمبیٹا اور اسٹیفن ہیرٹوگ نے اپنی کتاب Engineers of Jihad میں دلیل دی کہ مشرقِ وسطیٰ کی حکومتیں جلد ہی یہ جان لیں گی کہ اعلیٰ تعلیم کو فروغ دینا سماجی اطاعت کو فروغ نہیں دیتا۔ اس کے برعکس، اعلیٰ تعلیم یافتہ لوگ معاشی گراوٹ میں سب سے زیادہ متاثر ہوتے ہیں، زیادہ سماجی طور پر بے چینی کا شکار ہوتے ہیں، اور کچھ کرنے کی بہتر صلاحیت رکھتے ہیں۔ 1970 کی دہائی کے پہلے نسل کے پرتشدد اسلام پسند انتہا پسندوں میں اعلیٰ تعلیم یافتہ افراد بھرے ہوئے تھے۔ اگرچہ بعد میں عام کارکنوں کی صفیں ایسے افراد سے بھر گئی جن کے پاس کھونے کو بہت کم تھا، لیکن ایک خطرناک اسلام پسند تحریک کے ابتدائی ظہور کا بڑا حصہ انہی ایلیٹ گریجویٹس کی وجہ سے تھا۔

اس کے برعکس، دنیا بھر کی حکومتوں نے دہشت گردی کے خاتمے کے لیے امداد اور تعلیمی معاونت بڑھانے کا مطالبہ کیا ہے۔ جبکہ شواہد موجود ہیں کہ اعلیٰ تعلیم یافتہ لوگ انتہا پسندی کی طرف زیادہ مائل ہو سکتے ہیں، یا کم از کم جب انتہا پسندی کا انتخاب کریں تو زیادہ مہلک ثابت ہو سکتے ہیں۔

یہ پہلا موقع نہیں تھا کہ ڈاکٹروں کو دہشت گردانہ حملوں میں گرفتار کیا گیا ہو۔ 2007 میں جب لندن اور گلاسگو میں بم دھماکے ہوئے، تو خبر آئی، آٹھ گرفتار شدہ افراد میں سے ساتھ ڈاکٹر ہیں، آٹھواں ایک میڈیکل ٹیکنیشن ہے، اور سب نے نیشنل ہیلتھ سروس (NHS) میں کام کیا تھا۔ دو مرکزی دہشت گردوں میں سے ایک بلال عبداللہ ڈاکٹر تھا جبکہ دوسرا کیفیل احمد ایک ہندوستانی انجینئر تھا۔رابرٹ سبلی نے گلاسگو بم دھماکوں کے بعد لکھا تھا کہ بن لادن کا نائب ایمن الظواہری، جارج حبش، جس نے پاپولر فرنٹ فار دی لبرریشن آف فلسطین کی بنیاد رکھی؛ فتحی شقاقی، فلسطینی اسلامی جہاد کے بانی۔یہ سب ڈاکٹر تھے۔

بہرحال ڈاکٹر بطور قاتل اسلام تک محدود نہیں۔ نازی جرمنی میں نسل کشی کے پروگرام چلانے کے لیے باآسانی ڈاکٹر موجود تھے۔ سوویت یونین میں بھی ‘ری ایجوکیشن’ مراکز میں ڈاکٹر موجود تھے۔ حال ہی میں ٹوکیو کے ایک ڈاکٹر کو زیرِ زمین ٹرین پر زہریلی گیس چھوڑنے کے جرم میں دہشت گردی کے الزام میں سزا ہوئی۔

 لادن کے پاس بھی انجینئرنگ کی ڈگری تھی اور وہ آکسفورڈ بھی گیا تھا۔ والٹر لیکر اپنی کتاب No End to War میں لکھتے ہیں، “ایک معاصر دہشت گرد جو اپنے ملک سے باہر کام کر رہا ہو اسے تعلیم یافتہ ہونا چاہیے، تکنیکی صلاحیت رکھنی چاہیے، اور اجنبی معاشروں میں بغیر توجہ کھینچے گھومنے کے قابل ہونا چاہیے۔ … 11 ستمبر کے واقعات میں شامل لوگ عرب افغان نہیں تھے بلکہ وہ ایک نئے گروہ سے تعلق رکھتے تھے جو یورپ میں عرب ڈائسپورا کا حصہ تھے یا یورپ و امریکہ میں تعلیم یافتہ تھے۔ … یورپ اور امریکہ میں کارروائیوں کے لیے پہلے سے مختلف پس منظر اور تربیت کی ضرورت تھی: اعلیٰ تعلیم، زبانوں کا کام چلانے لائق علم، اور اجنبی معاشروں میں برتاؤ کا تجربہ۔

کئی مطالعات نے نشاندہی کی ہے کہ دہشت گرد تنظیمیں زیادہ تعلیم یافتہ افراد کو بھرتی کرنے کی کوشش کرتی ہیں، تاکہ وہ ‘مرکزی دھارے’ کی آبادی میں گھل مل جائیں۔ ایک اور اہم بات یہ ہے کہ ڈاکٹر اور انجینئر دائیں بازو کی انتہا پسندی کی طرف زیادہ مائل پائے گئے ہیں۔

گیمبیٹا اور ہیرٹوگ نے اپنی ایک تحقیق میں لکھا، “اولیویے رائے، یہ سمجھانے کی کوشش میں کہ کئی اسلام پسند دانشور سائنسی یا تکنیکی تعلیم کیوں رکھتے ہیں، لکھتے ہیں کہ سائنسیں،ان کی سادہ فہم میں—‘کل کی ہم آہنگی، ایک (خدا) کی عقلیت’ کو ظاہر کرتی ہیں۔ القاعدہ کے اراکین کے لیے 1980 کی دہائی کے آخر میں جو دستور بنایا گیا، اس میں لکھا ہے کہ اراکین کے پاس مثالی طور پر کالج کی ڈگری ہونی چاہیے، اور جہادیوں کے ٹریننگ مینوئل میں ان خصوصیات کا ذکر ہے جو بھرتی کرنے والے ڈھونڈتے ہیں: ‘ضبط و اطاعت، صبر، ذہانت’، ‘احتیاط و دانشمندی’، اور مشاہدہ و تجزیہ کی صلاحیت۔”

یہ اتفاق نہیں کہ نازی جرمنی میں ڈاکٹروں نے حراستی کیمپوں میں نسل کشی انجام دی۔ ڈاکٹر ویسیلی، جو کنگز کالج لندن کے انسٹی ٹیوٹ آف سائیکاٹری میں نفسیات کے پروفیسر تھے، لکھتے ہیں، “بہت سے ڈاکٹر ایثار کے جذبے سے پناہ گزین کیمپوں، جنگی علاقوں، اور آفت زدہ بستیوں میں کام کرتے ہیں تاکہ اپنے سامنے موجود مریضوں کی مدد کر سکیں۔ لیکن یہی جذبہ بعض اوقات فرد کی مدد سے آگے بڑھ کر دنیا کی ‘بیماریوں’ کو ٹھیک کرنے کی خواہش میں بدل جاتا ہے۔ حد تب پار ہوتی ہے جب دنیا کو بہتر بنانے کی خواہش، دوسروں پر اس کے نتائج کی پروا کے بغیر، ‘انصاف’ کے نام پر تشدد کا جواز بنا دیتی ہے۔ … نازی نسل کشی کے ہر مرحلے کو طبی تشبیہوں سے جائز ٹھہرایا گیا۔ … الظواہری شاید یقین رکھتا ہو کہ اس کے اعمال طویل مدت میں اسلام کے لیے بہتر ہیں اور یہ یقین ہی اسے قتلِ عام کا جواز دیتا ہے۔ ڈاکٹر کارل برانڈٹ نیرمبرگ میں سزائے موت پانے سے پہلے بھی نادم نہ ہوئے اور سمجھتے رہے کہ ان کے اعمال ان لوگوں سے جرمنی کو بچانے کے لیے ضروری تھے جن کی زندگیاں ‘زندگی کے لائق نہ تھیں۔

دنیا خصوصاً ہندوستان کو ان گمراہ تعلیم یافتہ لوگوں سے خطرہ ہے جو دہشت گردی اختیار کر کے معصوموں کی جان لیتے ہیں۔ حکومتوں کو چاہیے کہ ان پالیسیوں پر دوبارہ غور کریں جو ایسے لوگوں کی پیدائش روک سکیں۔ اکثر کہا جاتا ہے کہ کم تعلیم یافتہ یا روایتی طور پر (یعنی مدرسہ) پڑھے لوگ دہشت گرد نظریات کے لیے زیادہ حساس ہوتے ہیں۔ لیکن شواہد بتاتے ہیں کہ چاہے لشکر طیبہ ہو جس کے بانی یونیورسٹی میں پڑھاتے تھے، یا القاعدہ یا کوئی اور انتہا پسند تنظیم،ان کے زیادہ تر بھرتی شدگان اعلیٰ مغربی تعلیم یافتہ اور مالی طور پر مستحکم گھرانوں سے آتے ہیں۔ ہندوستان کو دہشت گردی سے نمٹنے کے لیے نئی پالیسی کی ضرورت ہے۔ ہمیں انجینئرنگ اور میڈیکل کالجوں میں وہ قومی تعلیم دینی ہوگی جو بتائے کہ گوناگوں(syncretic) معاشروں میں کیسے جیا جاتا ہے۔