ثاقب سلیم
اس سیاسی فضا میں یہ ماننا مشکل ہے کہ خلافت تحریک کے دور میں ہر جلسے کے آغاز پر ’’وندے ماترم‘‘ پڑھا جاتا تھا۔ خلافت تحریک خلافتِ عثمانیہ کے تحفظ کے لیے چلائی جانے والی وہ بڑی عوامی تحریک تھی جس میں ہندوستان کے مسلمانوں نے بڑھ چڑھ کر حصہ لیا۔ لیکن سرکاری ریکارڈ اس بات کی گواہی دیتے ہیں کہ اس تحریک کے بیشتر جلسوں میں مسلمان ہی اس قومی نغمے کو پڑھتے یا سننے کے لیے کھڑے ہوتے تھے۔
جنوری 1920 کی ایک سی آئی ڈی رپورٹ میں درج ہے کہ مہاتما گاندھی میرٹھ پہنچے تو استقبال کے بعد ایک بڑے اجتماع میں ’’بندے ماترم‘‘ چار بنگالیوں نے گایا۔ یہ جلسہ خلافت تحریک کا حصہ تھا اور اس میں اکثریت مسلمانوں کی تھی۔ ایسی ہی ایک اور رپورٹ اپریل 1920 میں شائع ہوئی جس میں مولانا شوکت علی کے جلسے کا ذکر ہے کہ وہاں بھی مذہبی نظموں کے ساتھ ’’بندے ماترم‘‘ پڑھا گیا اور اس کے بعد تقاریر مختلف زبانوں میں پیش کی گئیں۔ ایسے واقعات محض استثنا نہیں تھے بلکہ تحریک کے اکثر جلسوں کا معمول تھے۔ خود علی برادران اس نعرے کو بلند کرتے اور ہندو مسلم یکجہتی کی علامت سمجھتے تھے۔
بعد میں جب یہ دعویٰ کیا گیا کہ مسلمانوں کو ابتدا ہی سے ’’وندے ماترم‘‘ پر اعتراض تھا تو تاریخی دستاویزات اس کے برعکس تصویر پیش کرتی ہیں۔ بعض مؤرخین نے لکھا کہ 1923 کے کاکیناڈا کانگریس اجلاس میں مولانا محمد علی نے اسے ’’ہندو گیت‘‘ کہہ کر مسترد کیا۔ لیکن اس واقعے کا پس منظر مختلف تھا۔ مولانا صدرِ اجلاس تھے۔ مشہور گویے پنڈت وشنو دِگمبر پلسکر سے ’’وندے ماترم‘‘ کی درخواست کی گئی تو مولانا محمد علی نے موسیقی کو اپنے مذہبی اصولوں سے متصادم قرار دے کر اعتراض کیا۔ یہ اعتراض نغمے کے متن پر نہیں تھا۔ جب پلسکر نے انہیں قائل کیا تو مولانا نے باقی سب کی طرح کھڑے ہو کر اسے سنا۔ اگلے برس بھی جب بلگام کے اجلاس کا آغاز ’’وندے ماترم‘‘ سے ہوا تو مولانا، ان کے بھائی اور ان کی اہلیہ سمیت بڑی تعداد میں مسلمان شریک تھے جن میں مولانا ابوالکلام آزاد بھی شامل تھے۔
پھر یہ تنازعہ کب اور کیسے پیدا ہوا؟ 1935 میں ایک سرکاری ہدایت نامہ اخبارات تک جا پہنچا جس میں عوامی مقامات پر ’’وندے ماترم‘‘ کے استعمال پر قدغن لگانے کی بات تھی۔ برطانوی حکومت اس کی مقبولیت سے ناخوش تھی اور اسے روکنے کا غیر قانونی طریقہ چاہتی تھی۔ سرکاری اہلکاروں نے یہ خیال بھی پیش کیا کہ مسلمانوں میں یہ تاثر پھیلایا جائے کہ ناول ’’آنند مٹھ‘‘ جس میں یہ نغمہ شامل ہے مسلمانوں کے خلاف ہے حالانکہ سرکاری ریکارڈ کے مطابق نغمے کے ابتدائی بندوں میں کوئی قابل اعتراض بات نہ تھی۔ اسی دوران مسلم لیگ اور محمد علی جناح نے اسے ایک بڑے سیاسی مسئلے کی شکل دی۔ وائسرائے لینلتھگو نے اپنی ایک خفیہ رپورٹ میں لکھا کہ مسلمانوں کی طرف سے اٹھنے والا یہ دباؤ حکومت کے لیے مفید ہے کیونکہ وہ براہ راست مخالفت نہیں کرنا چاہتی۔
ادھر کانگریس کی ورکنگ کمیٹی نے مولانا آزاد کی شرکت سے ایک بیان جاری کیا جس میں واضح کیا گیا کہ ’’وندے ماترم‘‘ کے صرف پہلے دو بند استعمال ہوتے ہیں اور ان میں محض وطن کی خوبصورتی اور اس کے عطیوں کا ذکر ہے۔ ان میں ایسی کوئی بات نہیں جو کسی مذہبی نقطہ نظر سے قابل اعتراض ہو۔ پنڈت جواہر لال نہرو نے بھی کہا کہ ان بندوں پر اعتراض اسی وقت ہو سکتا ہے جب کوئی بدنیتی سے اعتراض کرنا چاہے۔
کانگریس کے رہنما رفیع احمد قدوائی نے یاد دلایا کہ جناح صاحب خود برسوں تک کانگریس کے اجلاسوں میں شریک رہتے تھے جہاں ہر سال آغاز ’’وندے ماترم‘‘ سے ہوتا تھا لیکن انہوں نے کبھی اعتراض نہیں کیا۔ ان کے مطابق اصل اختلاف سیاسی تھا نہ کہ مذہبی۔
ان تاریخی شواہد سے یہ بات واضح ہوتی ہے کہ ’’وندے ماترم‘‘ پر تنازعہ دراصل 1935 کے بعد اس وقت کھڑا کیا گیا جب برطانوی حکومت اس کی انقلابی علامت کو کمزور کرنا چاہتی تھی۔ مسلم لیگ نے اسے مذہبی رنگ دیا اور یوں یہ بحث پھیلتی چلی گئی۔ ورنہ خلافت تحریک سے لے کر کانگریس کی متعدد نشستوں تک بڑے بڑے مسلمان رہنما جیسے حکیم اجمل خان ایم اے انصاری مولانا ابوالکلام آزاد علی برادران امجدی بیگم بی اماں حسرت موہانی اور سیف الدین کچلو اس نغمے کی موجودگی میں جلسوں میں شریک رہے اور انہوں نے کبھی اس پر اعتراض نہیں کیا۔ تاریخ بتاتی ہے کہ ان کے لیے ’’وندے ماترم‘‘ وطن سے محبت کی علامت تھا نہ کہ کسی خاص مذہب کا اظہار۔
