ثاقب سلیم

"خود مہاراج بھی اس عجیب رسم میں شریک ہوتے ہیں اور پورے محرم کے دوران فقیر بنے رہتے ہیں۔"

1809 میں مراٹھا حکمران مہاراج دولت راؤ سندھیا کے دربار میں تعینات ایک انگریز افسر تھامس ڈوئیر بروٹن نے اپنے بھائی کے نام ایک خط میں یہ الفاظ تحریر کیے۔ اس اقتباس میں سب سے زیادہ توجہ طلب لفظ "عجیب" (Ridiculous) ہے۔ ایک طاقتور ہندو مراٹھا حکمران کا امام حسینؑ کی شہادت پر سوگ منانا ایک برطانوی افسر کو مضحکہ خیز محسوس ہوا۔ یہ دراصل مراٹھوں کے بارے میں کم اور خود اس انگریز افسر کی ذہنیت کے بارے میں زیادہ بتاتا ہے۔ بروٹن کے خطوط ہمارے لیے اس ہندوستان کی مشترکہ تہذیب کی ایک جھلک ہیں جسے نوآبادیاتی طاقتیں بتدریج ختم کرنے میں مصروف تھیں۔

اکثر یہ دعویٰ کیا جاتا ہے کہ محرم، جو نواسۂ رسول حضرت امام حسینؑ کی شہادت کی یاد میں منایا جاتا ہے، ہمیشہ سے صرف مسلمانوں یا خاص طور پر شیعہ مسلمانوں کا مذہبی تہوار رہا ہے۔ لیکن تاریخی دستاویزات، مردم شماری کے ریکارڈز اور یورپی افسروں کے نجی خطوط اس تصور کی تردید کرتے ہیں۔ یہ شواہد بتاتے ہیں کہ مراٹھا سردار صدیوں تک عزاداریِ حسینؑ میں نہایت عقیدت کے ساتھ شریک ہوتے رہے۔

بروٹن اس وقت راجستھان میں سندھیا اور ان کی فوج کے ہمراہ سفر کر رہا تھا جب اس نے یہ مناظر دیکھے۔ اس نے حیرت کے ساتھ لکھا کہ اس سال محرم اور ہولی ایک ہی زمانے میں آئے تھے، جنہیں اس نے "دو بالکل متضاد تہوار" قرار دیا۔ اس کی سمجھ میں نہیں آتا تھا کہ ہندو مراٹھے دونوں تہواروں کو یکساں خلوص کے ساتھ کیسے منا سکتے ہیں۔

مہاراج سندھیا سبز لباس پہن کر باہر نکلتے، شاہی جاہ و جلال کی تمام علامتیں ترک کر دیتے اور لشکر میں موجود ہر تعزیے کی زیارت کرتے۔ تعزیہ حضرت امام حسینؑ کے روضۂ مبارک کی علامتی یادگار سمجھا جاتا تھا، جس کے سامنے مرثیہ خوانی کی جاتی تھی۔ بروٹن نے سینہ زنی کے مناظر بھی دیکھے، جنہیں اس نے "انتہائی پرجوش" اور "بے حد مؤثر" قرار دیا۔

دسویں محرم کو تعزیوں کو ایک قریبی دریا تک لے جایا گیا۔ ہر جلوس سندھیا کے لشکر سے گزرتا تھا۔ بروٹن نے لکھا کہ:

"سو سے زیادہ تعزیے تھے، جن کے پیچھے فقرا کی طویل قطاریں تھیں۔ وہ مختلف انداز کے لباس پہنے ہوئے سینہ زنی کر رہے تھے اور بلند آواز سے رسولِ اکرمؐ اور ان کے نواسے کو یاد کر رہے تھے۔"

اس نے جلتی ہوئی مشعلوں، بندوقوں کی فائرنگ، ڈھول اور نقاروں کا ذکر کرتے ہوئے اسے "اپنی زندگی کا سب سے غیر معمولی منظر" قرار دیا۔

غیر برہمن مراٹھا سردار اپنے اپنے خیموں میں تعزیے تیار کرواتے اور ان پر بڑی رقم خرچ کرتے تھے۔ ہندو اور مسلمان دونوں عزاداروں کے لیے شربت کا انتظام کرتے تھے اور شاہی خاندان کی خواتین بھی ان تقریبات میں شریک ہوتی تھیں۔

علامہ سید سبط الحسن فاضل ہنسوی اپنی کتاب میں لکھتے ہیں کہ بروٹن نے یہ تمام مناظر اس وقت دیکھے جب سندھیا اور ان کی فوج جنگی مہم پر تھی۔ اگر دشمن علاقے میں سفر کے دوران عزاداری کا یہ عالم تھا تو امن کے زمانے میں ان کے دارالحکومتوں میں محرم کی شان و شوکت کا اندازہ بخوبی لگایا جا سکتا ہے۔

یہ روایت محض درباری رسم یا سیاسی مصلحت نہیں تھی بلکہ ذاتی عقیدت، منتوں اور خاندانی روایات سے جڑی ہوئی تھی۔ اس کی ایک نمایاں مثال حیدرآباد کے نظام کی فوج کے اعلیٰ کمانڈر راجہ راؤ رمبھا جیاونت بہادر نمبلکر کی زندگی میں ملتی ہے۔

1971 کی مردم شماری سے متعلق ایک مونوگراف میں درج ہے کہ راجہ راؤ رمبھا دسویں محرم کے جلوسوں اور مرثیہ خوانوں کے لیے مستقل وظیفہ مقرر کرتے تھے اور خود بھی جلوسوں میں شریک ہوتے تھے۔

چونکہ ان کے ہاں کوئی بیٹا نہیں تھا، اس لیے انہوں نے سات محرم کو منت مانی کہ اگر اللہ تعالیٰ انہیں بیٹا عطا کرے تو وہ حضرت امام حسینؑ کے نام پر نیاز دیں گے اور تعزیہ رکھیں گے۔ اگلے سال ان کے ہاں بیٹے کی ولادت ہوئی تو انہوں نے اپنے محل میں ایک عاشور خانہ تعمیر کروایا، جہاں محرم کے دوران علم اور تعزیے رکھے جاتے تھے۔

خاندان کے تمام افراد سبز لباس پہنتے، علموں کے سامنے فاتحہ خوانی کرتے اور غریبوں میں کھانا، مٹھائیاں، شربت اور دودھ تقسیم کیا جاتا تھا۔ سات محرم کا شبانہ جلوس راجہ راؤ رمبھا کی وفات کے بعد بھی ان کی اولاد کے ذریعے جاری رہا۔

اس روایت کی جڑیں اس سے بھی زیادہ قدیم ہیں۔ نمبلکر خاندان مہاراشٹر کے سورج بنسی کشتریہ خاندان سے تعلق رکھتا تھا۔ ان کے ایک بزرگ رمبھاجی باجی راؤ کو سیاسی سازشوں کے نتیجے میں مغل بادشاہ عالم شاہ نے دہلی کے لال قلعے میں قید کر دیا تھا۔

1929 میں شائع ہونے والی کتاب Pictorial Hyderabad میں کے۔ کرشنا سوامی مدی راج لکھتے ہیں کہ قید خانے کے قریب ایک امام باڑہ تھا جہاں علم نصب تھے۔ رمبھاجی باجی راؤ نے ان علموں کو دیکھ کر منت مانی کہ اگر وہ رہا ہو گئے تو ہندو ہونے کے باوجود ہر سال محرم منائیں گے۔

روایت کے مطابق اگلے ہی دن ان کی رہائی کا حکم صادر ہوا۔ گھر واپس آکر انہوں نے علم خریدے اور محرم کی تمام رسومات ادا کیں۔ تب سے نمبلکر خاندان ہر سال محرم مناتا رہا اور دس دنوں کے دوران روشنی، نیاز اور غریبوں کو کھانا کھلانے پر خطیر رقم خرچ کرتا رہا۔

آج محرم کو صرف مسلمانوں کا تہوار قرار دے کر پیش کیا جاتا ہے، گویا ہندوؤں کا اس سے کوئی تعلق کبھی رہا ہی نہیں۔ لیکن بروٹن کے خطوط، نمبلکر محل کے عاشور خانے اور مراٹھا فوجی کیمپوں میں نکلنے والے سینکڑوں تعزیے ایک مختلف ہندوستان کی کہانی سناتے ہیں۔

یہ وہ ہندوستان تھا جہاں ایک ہندو مراٹھا جرنیل اپنے محل میں عاشور خانہ تعمیر کرتا تھا اور ایک ہندو مراٹھا بادشاہ نواسۂ رسولؐ کے غم میں سبز لباس پہن کر عزاداری میں شریک ہوتا تھا۔ ایسے معاشرے کو مذہبی بنیادوں پر تقسیم کرنا آسان نہیں تھا۔

یہ تاریخ محض ماضی کا ایک باب نہیں بلکہ ہندوستان کی اس مشترکہ تہذیبی روایت کی یاد دہانی ہے جس میں عقیدت، احترام اور ثقافتی ہم آہنگی مذہبی سرحدوں سے کہیں زیادہ مضبوط تھی۔