عامر خان 

ہم بہترین وقت میں بھی جی رہے ہیں اور بدترین میں بھی۔ آج کی دنیا ایک تضاد ہے: بظاہر اطمینان بخش، مگر اندر سے شدید غیر مستحکم۔ عالمی کشیدگیاں، پرتشدد تنازعات، اور سیاسی بکھراؤ ہمارے امن اور ترقی کے مشترکہ احساس کو چیلنج کرتے ہیں۔

”یہ دنیا میں کیا ہو رہا ہے؟“

یہ سوال ہمیں جھنجھوڑتا ہے جب ہم میزائلوں کو آسمان پر چمکتے دیکھتے ہیں، جو زندگیاں تباہ کر رہے ہیں۔ چاہے وہ اسرائیل اور ایران کے درمیان بڑھتی ہوئی کشیدگی ہو یا دنیا کے دیگر خطرناک مقامات، تنازع اکثر انسانی فتوحات کو پس منظر میں دھکیل دیتا ہے۔

بہتر تعلیم، بہتر صحت کی سہولیات، اور غربت میں کمی جیسے کارنامے جنگ اور انتشار کے شور میں گم ہو جاتے ہیں۔ایسے لمحات میں تاریخ خود کو دہراتی ہے۔ پچھلی جنگوں کے زخم اور تہذیبوں کی نازک میراث ہمیں یاد دلاتی ہے کہ امن کی سطح کتنی پتلی ہو سکتی ہے۔ جیسا کہ ایک پرانا مقولہ ہے، دنیا اتنی ہی اچھی یا بری ہے، جتنی ہم اسے دیکھنے کا انتخاب کرتے ہیں۔آج کے جیوپولیٹیکل ماحول میں، غلبہ قاعدہ بن گیا ہے، اور پرامن بقائے باہمی ایک نایاب استثنا۔ طاقت کا حصول — جو عدم تحفظ، بداعتمادی، اور مادی مفادات سے جڑا ہوا ہے — ایک نہ ختم ہونے والا چکر بن چکا ہے، جو حقیقی مکالمے اور تعاون کے مواقع کو دبائے جا رہا ہے۔اب وہ ’ویسٹرن لبرل ورلڈ آرڈر‘ جسے دوسری جنگ عظیم کے بعد اور سرد جنگ کے اختتام پر تشکیل دیا گیا تھا، بکھرتا دکھائی دے رہا ہے۔ تو اب کیا ہوگا؟ اور زیادہ اہم بات، بھارت کو آئندہ کے منظرنامے میں کیا کردار ادا کرنا چاہیے؟

یہ سوالات رام مادھو کی نئی کتاب "دی نیو ورلڈ: 21ویں صدی کا عالمی نظام اور بھارت" کے مرکز میں ہیں۔ رام مادھو، جو بھارت کی سیاسی دائیں بازو سے وابستہ سمجھے جاتے ہیں، اس کتاب میں بدلتی ہوئی عالمی سیاست اور بھارت کے ممکنہ راستوں پر ایک بروقت اور دقیق تجزیہ پیش کرتے ہیں۔

اس کتاب کو سراہا گیا ہے کہ یہ ناگزیر مگر تکلیف دہ سوالات کا سامنا کرتی ہے، اگر ویسٹرن لبرل آرڈر ختم ہونے کے قریب ہے، تو اس کی جگہ کیا لے گی؟ اور بھارت خود کو کیسے پوزیشن کرے؟

فرانسس فوکویاما، سیموئل ہنٹنگٹن، اور طارق علی جیسے مفکرین طویل عرصے سے عالمی تنازعات کی جڑوں ، چاہے وہ نظریہ، ثقافت یا مذہب ہو ، پر بحث کرتے آئے ہیں۔ مگر بہت کم افراد نے مفاہمت، اخلاقیات اور باہمی احترام پر مبنی نئے عالمی نظام کا مثبت وژن پیش کیا ہے۔ مادھو اس خلا کو پُر کرتے ہیں۔آئندہ عالمی نظام کو محض طاقت کے ڈھانچوں پر نہیں بلکہ انسانی قدروں پر قائم ہونا چاہیے۔ ماضی کی غلطیوں کو تسلیم اور درست کرنا ہوگا۔

تہذیبی ورثے کو محض نوادرات کے طور پر نہیں بلکہ زندہ روایت کے طور پر محفوظ رکھنا ہوگا جو دنیا کو غلبے کی نہیں بلکہ بقائے باہمی کی طرف لے جا سکے۔ ایک کثیر قطبی دنیا میں اگر جوہری ہتھیاروں سے لیس ایران وجودی خطرہ بن سکتا ہے تو پاکستان بھی بن سکتا ہے۔ جو اصول ایک کے لیے ہے وہ دوسرے کے لیے بھی ہونا چاہیے۔ آمریت ماضی کی بات بننی چاہیے۔اپنی کتاب میں مادھو لکھتے ہیں کہ بھارت کے مؤقف نے درجنوں ممالک کو اقوام متحدہ میں غیر جانب دار رہنے پر آمادہ کیا ہے ، جو مغربی طاقتوں کے لیے باعثِ تشویش ہے۔طاقتی بلاکس کا حصہ نہ بننا ایک خاموش لیکن طاقتور سفارتی تبدیلی کی علامت ہے، جو عالمی منظرنامے پر بھارت کے اعتماد میں اضافے کو ظاہر کرتا ہے۔

کتاب کی رونمائی کے موقع پر مادھو نے ایک نڈر اور مستقبل کی طرف دیکھنے والے قومی بیانیے کی تشکیل کی ضرورت پر زور دیا ، جسے وہ "برانڈ بھارت" کہتے ہیں۔ یہ صرف شبیہ سازی نہیں بلکہ بھارت کے لیے دنیا میں اپنے کردار کی ازسرنو وضاحت کی گہری پکار ہے۔آج، نجی کارپوریشنز کی طاقت کئی حکومتوں کے برابر یا اس سے بھی زیادہ ہو چکی ہے۔ قدامت پسندی دنیا بھر میں دوبارہ ابھر رہی ہے، اور غیر ریاستی عناصر نے بے مثال اختیار حاصل کر لیا ہے۔ ایسی دنیا میں پرانا امریکی غلبہ دوبارہ بحال نہیں ہو سکتا۔ کثیر قطبی دنیا ناگزیر ہی نہیں، وہ آ چکی ہے۔

لیکن مادھو کثیر قطبیت کو سادہ مفروضہ سمجھنے کے خلاف خبردار کرتے ہیں۔یہ مفروضہ کہ ہر قطب کے پاس برابر طاقت ہونی چاہیے، بنیادی طور پر ناقص ہے۔ مختلف ممالک مختلف صلاحیتیں رکھتے ہیں، اور بعض اوقات یہ عدم توازن روایتی سپر پاورز کو بھی غیر مؤثر بنا سکتا ہے۔وہ تجویز دیتے ہیں کہ بھارت برابری کی دوڑ میں شامل نہ ہو بلکہ اخلاقی حکمرانی کے ذریعے قیادت کرے،جسے وہ "دھرم کریسی" کہتے ہیں۔ مغربی بیوروکریسی کی سخت قواعد پر مبنی طرزِ حکمرانی کے برعکس، دھرم کریسی وہ ہے جو درست ہو، وہ کرےاور حکمرانی کو اخلاقی اور تہذیبی قدروں سے جوڑے۔

نائب صدر جگدیپ دھنکھڑ نے کتاب کی رونمائی پر اس نظریے کی تائید کی،کتاب لبرل نظام پر غور کرتی ہے اور اس شناخت پر جو بھارت کومحفوظ رکھنی چاہیے۔ بھارت کا عروج خیرخواہ ہے اور کسی کے لیے نقصان دہ نہیں۔ ہم نے خود کو خیر کی قوت ثابت کیا ہے۔“14 ابواب پر مشتمل یہ کتاب بھارت کی جگہ کے لیے ایک جامع فریم ورک پیش کرتی ہے , جس میں جیوپولیٹیکل حکمت عملی، معاشی مضبوطی، ماحولیاتی ذمے داری، اور معاشرتی تبدیلی شامل ہے۔

عالمی ابتری کے اس دور میں، مادھو ہمیں یاد دلاتے ہیں کہ مستقبل کو صرف پالیسیاں یا طاقت نہیں بلکہ اصول متعین کرتے ہیں۔ ان کا پیغام واضح ہے:اگر قوموں کے پاس اخلاقی قطب نما نہ ہو، تو وہ بے سمت رہتی ہیں، اور کوئی بھی عالمی نظام، چاہے وہ کیسا بھی ہو، ہمیشہ غیر مستحکم رہے گا۔ہم تاریخ کے ایک فیصلہ کن لمحے سے گزر رہے ہیں۔ جب پرانے ڈھانچے گر رہے ہیں، تو ایک نیا عالمی تصور جنم لینے کی جدوجہد کر رہا ہے۔"دی نیو ورلڈ" میں، رام مادھو نہ صرف تجزیہ کرتے ہیں بلکہ ایک خاکہ پیش کرتے ہیں، جو بھارت کو دعوت دیتا ہے کہ وہ اپنی اخلاقی میراث کو اپنائے، اپنی منفرد آواز کو بلند کرےاور ایسی دنیا کی تشکیل میں مدد دے جو غلبے نہیں بلکہ ہم آہنگی کو ترجیح دے۔اس بکھری ہوئی دنیا میں، شاید ہمیں کسی نئے عالمی نظام کی نہیں، بلکہ ایک نئے عالمی اخلاق کی ضرورت ہے۔