شنکر کمار

چین کو سمجھنا انتہائی پیچیدہ اور مشکل ہے۔ اس کی تاریخ، سیاست اور ثقافت کی تہوں سے گزرنے کے بعد بھی اس کی گہرائیوں کو کھولنا آسان نہیں ہے،یہ ایک ایسا چیلنج ہے جو مسلسل توجہ کا متقاضی ہے۔ یہی چیلنج ہے جسے سابق ہندوستانی سفیر برائے چین اشوک کے کانتھا کی مرتب کردہ کتاب "ڈی کوڈنگ چائنا—ہارڈ پرسپیکٹوز فرام انڈیا"حل کرنے کی کوشش کرتی ہے۔جمعرات کو نئی دہلی میں جاری کی گئی اس کتاب میں اکیس نمایاں سفارتکاروں، فوجی افسران اور ماہرین کے مضامین شامل ہیں، جنہوں نے صدر شی جن پنگ کے دور میں ‘چینی قوم کی تجدید’ کو قریب سے دیکھا ہے۔ کتاب ہندوستان کے لیے چین کی طرف سے پیدا کیے گئے چیلنجز کو پیش کرنے کی کوشش کرتی ہے۔

مثال کے طور پر اشوک کانتھا، جو جنوری 2014 سے جنوری 2016 تک بیجنگ میں دو سالہ سفارتی ذمہ داری پر فائز رہے، نے مشرقی لداخ میں حالیہ دنوں ہندوستان اور چین کے درمیان طے پانے والے انخلا کے حقائق کھلے عام بیان کرنے میں کوئی ہچکچاہٹ نہیں دکھائی۔انہوں نے کہا کہ مشرقی لداخ میں مئی 2020 میں چین کی دراندازی نے ایک بالکل مختلف صورتحال پیدا کر دی اور تعلقات میں ایک موڑ لے آیا۔ پچھلے تعطل والے واقعات کے برعکس، چینیوں نے اپریل 2020 کے اسٹیٹس کو بحال نہیں کیا، حالانکہ فوجیوں کے انخلا میں کچھ پیش رفت ضرور ہوئی ہے۔انہوں نے اس بات پر روشنی ڈالی کہ لائن آف ایکچوئل کنٹرول(LAC) اب بھی بھاری عسکریت کا شکار ہے۔

یہ چین کے ہندوستان کے ساتھ رویے کو ظاہر کرتا ہے، مگر زیادہ تشویش ناک بات یہ ہے کہ بیجنگ مسلسل جارحانہ عزائم کے تعاقب میں ہے۔ اشوک کانتھا نے اپنی تحریر میں کہا:
چین پورے ایل اے سی پر طویل مدتی تعیناتی کی صلاحیت کو نمایاں طور پر بڑھا رہا ہے۔ تبت میں نینگچی، یاڈونگ اور گیورونگ کی تین بڑی ریلوے منصوبے ہندوستان-چین سرحد کے قریب زیر تعمیر ہیں، جیسا کہ کئی شاہراہیں بھی، جن میں اکسائی چن میں جی695 شامل ہے۔ چینی ایل اے سی کے قریب مستقل فوجی موجودگی کے لیے تیار ہیں۔

اس کتاب کی ایک بڑی خوبی یہ ہے کہ یہ اپنی 400 سے زائد صفحات پر مبنی تحریر سے قاری کی دلچسپی کو برقرار رکھتی ہے۔ اس تناظر میں چین کے ممتاز ماہر جیدے وا راناڈے کی رائے قابلِ توجہ ہے۔ اپنی تحریر میں انہوں نے نشاندہی کی کہ یارلنگ سانگپو (برہم پتر) دریا پر چین جو میگا ڈیم بنانے کا منصوبہ بنا رہا ہے، وہ ہندوستان اور بنگلہ دیش جیسے زیریں سطح کے ممالک پر منفی اثر ڈالے گا۔البتہ انہوں نے کہا کہ

ڈیم کی تعمیر ہندوستان کے لیے فوجی مضمرات بھی رکھتی ہے۔

انہوں نے یہ واضح نہیں کیا کہ دنیا کے سب سے بڑے تھری گورجز ڈیم سے تین گنا بڑے اس ڈیم کا ہندوستان پر عسکری اثر کس طرح پڑے گا۔یہ حقیقت ہے کہ شی جن پنگ کی قیادت میں ہندوستان اور دنیا کو ہر طرح کے چیلنجز کے لیے تیار رہنا ہوگا۔ جیسا کہ جواہر لال نہرو یونیورسٹی کے پروفیسر برائے چین اسٹڈیز سری کانتھ کونڈاپلّی نے نشاندہی کی، یہ خدشات اسی دن سے بڑھنے لگے تھے جب 2012 میں شی جن پنگ نے کمیونسٹ پارٹی آف چائنا کی قیادت سنبھالی تھی۔ اس وقت انہوں نے اس بات پر زور دیا تھا کہ چین کے “بنیادی مفادات” کے تحفظ کو ترقیاتی ترجیحات پر فوقیت حاصل ہوگی۔

سری کانتھ کونڈاپلّی نے اپنی تحریر “چائنا کی خارجہ پالیسی شی جن پنگ کے تحت—تبدیلی اور مسائل”میں کہا کہ یہ بنیادی مفادات بنیادی طور پر چین کی قومی خودمختاری اور علاقائی سالمیت کے مسائل سے متعلق تھے۔

سری کانتھ کونڈاپلّی، جو چین پر گہری معلومات رکھتے ہیں، اس بات پر زور دیتے ہیں کہ شی جن پنگ کا توسیع پسندانہ ایجنڈا صرف جنوبی ایشیا، جنوبی بحیرہ چین، مشرقی بحیرہ چین یا تائیوان تک محدود نہیں ہے۔
انہوں نے مثال دی۔
مارچ 2023 میں ماسکو کے دورے سے ایک دن پہلے، چین نے سائبیریا کے مقامات، بشمول ولادی ووستوک، کے نام تبدیل کر کے چینی نام رکھ دیے، اور یوکرین جنگ کے بعد انحصار کرنے والے روس نے اس پر ایک لفظ بھی نہیں کہا۔

چین کی خارجہ پالیسی پر مزید روشنی ڈالتے ہوئے، وویکانند انٹرنیشنل فاؤنڈیشن کے ڈائریکٹر اروند گپتا نے کہا کہ چین کی خارجہ پالیسی اس کے خواب کو حقیقت میں بدلنے کے اسٹریٹجک ہدف کی تکمیل کے لیے ترتیب دی گئی ہے۔ اس کی کوشش یہ ہے کہ کوئی طاقت اس کے عروج کو روک نہ سکے۔اسی تناظر میں، لیفٹیننٹ جنرل (ر) گوتم بنرجی نے اپنی تحریر “انسٹرومنٹ آف دی چائنیز ڈریم”میں کہا کہ پیپلز لبریشن آرمی کی جدید کاری چین کی کلیدی قومی ترجیح ہے۔

انہوں نے لکھا یقینا  مضبوط فوجی طاقت کا حصول دنیا بھر میں سیاسی اور معاشی طاقت کو برقرار رکھنے کی بنیادی شرط ہے۔ مگر سوال یہ پیدا ہوتا ہے کہ آخر سی پی سی کیوں اتنی غیر متناسب حد تک طاقتور فوج تیار کرنے پر تلی ہوئی ہے، جب تک کہ وہ اپنے آئندہ کے منصوبوں کے خلاف شدید مزاحمت کے ابھرنے کی توقع نہ کر رہی ہو، جن میں موجودہ عالمی نظام کو اپنی بالادستی کے ایجنڈے کے مطابق دوبارہ ترتیب دینا شامل ہے۔

مجموعی طور پر یہ کتاب شی جن پنگ کے دور میں چین کے ارتقائی سفر پر ایک کثیر الجہتی نقطہ نظر فراہم کرتی ہے۔ تجربہ کار سفارتکاروں، فوجی افسران اور ماہرین کے تجزیوں سے یہ نہ صرف بیجنگ کی داخلی و خارجی پالیسیوں کو سمجھاتی ہے بلکہ ہندوستان کی سلامتی، سفارتکاری اور ترقی پر ان کے اثرات کو بھی اجاگر کرتی ہے۔ تجربات اور گہرے تجزیے کو یکجا کر کے،ڈی کوڈنگ چائنا—ہارڈ پرسپیکٹوز فرام انڈیا قارئین کو ایک بروقت اور متاثر کن تفہیم پیش کرتی ہے کہ ابھرتے ہوئے چین کے چیلنجز ہندوستان کے لیے کس قدر سنگین ہیں۔