کولم

 کیرال کی ایک عدالت نے سوشل میڈیا ایپ کے ذریعے دوستی کرنے کے بعد ایک کم عمر لڑکی کے ساتھ زیادتی کے جرم میں 20 سالہ نوجوان کو 21 سال قید کی سزا سنائی ہے۔خصوصی سرکاری وکیل این سی پریم چندرن نے بتایا کہ کرونگاپلی کی فاسٹ ٹریک خصوصی عدالت کے جج راجیون واچل نے مجرم نوجوان کو بچوں کو جنسی جرائم سے تحفظ دینے والے قانون (پوکسو ایکٹ) کی متعلقہ دفعات کے تحت سزا سنائی۔

استغاثہ کے مطابق عدالت نے نوجوان پر ایک لاکھ دس ہزار روپے کا جرمانہ بھی عائد کیا ہے۔

سرکاری وکیل کے مطابق یہ واقعہ 2024 میں پیش آیا تھا۔ نوجوان نے سوشل میڈیا ایپ کے ذریعے لڑکی سے دوستی کی اور بعد میں اسے اجیکل بیچ لے جانے کی پیشکش کی، لیکن ساحل پر لے جانے کے بجائے وہ اسے میاناگپلی کے سی ایچ سی اسپتال کے پیچھے ایک سنسان مقام پر لے گیا۔انہوں نے بتایا کہ واقعے کے بعد لڑکی نے خودکشی کی کوشش کی تھی، تاہم اسے بچا لیا گیا۔ بعد ازاں اس نے ڈاکٹروں کو پورے واقعے کی اطلاع دی۔پریم چندرن کے مطابق، صحت حکام کی جانب سے پولیس کو اطلاع دیے جانے کے بعد اس معاملے میں مقدمہ درج کیا گیا اور تحقیقات شروع کی گئیں۔

عدالتی کارروائی کے دوران ملزم کے جرم کو ثابت کرنے کے لیے عدالت کے سامنے سات گواہوں کے بیانات قلمبند کیے گئے جبکہ 20 اہم دستاویزات بھی پیش کی گئیں۔