شملہ

ہماچل پردیش کے گورنر کویندر گپتا نے نوجوان سائنسدانوں سے اپیل کی کہ وہ تحقیق کے میدان میں نئی بلندیاں حاصل کریں تاکہ کسانوں کی معاشی حالت کو بہتر بنانے میں مدد مل سکے۔

انہوں نے طلبہ میں سائنسی مزاج پیدا کرنے کی ضرورت پر زور دیا اور کہا کہ اس سے نہ صرف کسان خود کفیل بن سکیں گے بلکہ زراعتی پیداوار کے ساتھ ساتھ ملک کی معیشت کو بھی مضبوطی ملے گی۔گورنر کویندر گپتا لوک بھون سے ورچوئل طریقے سے چودھری سروَن کمار ہماچل پردیش زرعی یونیورسٹی، پالَم پور کے 17ویں کانووکیشن سے خطاب کر رہے تھے۔

انہوں نے تمام ڈگری حاصل کرنے والے طلبہ اور گولڈ میڈلسٹ کو مبارکباد دیتے ہوئے کہا کہ کانووکیشن تقریب کسی بھی اعلیٰ تعلیمی ادارے کے لیے بے حد اہمیت رکھتی ہے۔انہوں نے کہا کہ یہ طلبہ کی زندگی کا ایک اہم مرحلہ ہوتا ہے، جب وہ اپنی رسمی تعلیم مکمل کر کے عملی زندگی میں قدم رکھتے ہیں اور اپنے علم کو عملی دنیا میں استعمال کرتے ہیں۔ انہوں نے اسے خود احتسابی کا دن بھی قرار دیا۔

انہوں نے مزید کہا کہ طلبہ پر سماج، ریاست اور ملک کے تئیں ایک بڑی ذمہ داری عائد ہوتی ہے، جسے انہیں پوری لگن اور ایمانداری کے ساتھ نبھانا چاہیے۔کویندر گپتا نے زرعی یونیورسٹی، پالَم پور کی شاندار تاریخ کا ذکر کرتے ہوئے کہا کہ یہاں سے فارغ التحصیل طلبہ ملک اور دنیا بھر میں مختلف شعبوں میں نمایاں خدمات انجام دے رہے ہیں۔ انہوں نے خوشی کا اظہار کیا کہ اس ادارے سے وابستہ سائنسدانوں اور طلبہ نے اپنی کامیابیوں کے ذریعے یونیورسٹی کی اہمیت کو ثابت کیا ہے۔

انہوں نے بتایا کہ ہماچل پردیش کی تقریباً 90 فیصد دیہی آبادی زراعت اور اس سے جڑے کاموں پر منحصر ہے، جبکہ ریاست کی تقریباً 62 فیصد افرادی قوت کو روزگار بھی اسی شعبے سے حاصل ہوتا ہے۔ انہوں نے مزید کہا کہ زراعت اور اس سے وابستہ شعبے ریاست کی مجموعی گھریلو پیداوار میں تقریباً 9.4 فیصد کا حصہ ڈالتے ہیں۔

گورنر نے یونیورسٹی کی کامیابیوں کی تعریف کرتے ہوئے کہا کہ یہ اس کی تحقیق، جدت، سائنسی سوچ اور دور اندیش قیادت کا ثبوت ہیں۔ انہوں نے کہا کہ یہ کامیابیاں دیہی ترقی، سماجی بہبود اور قوم کی تعمیر کے لیے یونیورسٹی کے عزم کی عکاسی کرتی ہیں۔

انہوں نے یقین ظاہر کیا کہ یہ یونیورسٹی آئندہ بھی علم، تحقیق اور جدت کے میدان میں نئے معیار قائم کرتے ہوئے ملک کی ترقی میں اہم کردار ادا کرتی رہے گی۔ انہوں نے زور دیا کہ سائنسدانوں کی تحقیق لیبارٹریوں سے نکل کر کسانوں کے کھیتوں تک پہنچنی چاہیے تاکہ وہ اس کے حقیقی فوائد حاصل کر سکیں۔