لکھنؤ: اتر پردیش کے وزیر اعلیٰ یوگی آدتیہ ناتھ نے منگل کے روز وزیر اعظم نریندر مودی کو اقتدار میں 12 سال مکمل ہونے پر مبارکباد دیتے ہوئے ان کی قیادت کو عوامی فلاح، بہتر حکمرانی اور ہمہ گیر ترقی کو ترجیح دینے والی قرار دیا۔ ایکس پر ایک پوسٹ میں آدتیہ ناتھ نے مودی کو ’’دنیا کے سب سے مقبول رہنما‘‘ قرار دیتے ہوئے کہا کہ ان کی قیادت میں گزشتہ 12 برسوں نے فلاحی اسکیموں اور عوامی شمولیت کو ’’اختیار سازی اور قوم کی تعمیر‘‘ کے مؤثر ذریعہ میں تبدیل کر دیا ہے۔

انہوں نے کہا، ’’مودی حکومت کے دوران غریبوں کی فلاح حکمرانی کی ترجیح بنی، جبکہ ’انتیودیہ‘ کا اصول خود انحصاری کی طاقت میں بدل گیا۔‘‘ آدتیہ ناتھ نے کہا کہ وزیر اعظم کے وژن نے ایک ’’نئے ہندوستان‘‘ کی تشکیل میں مدد کی، جہاں خواتین کو بااختیار بنانے، اختراع، اقتصادی ترقی اور ثقافتی احیا کو بیک وقت آگے بڑھایا جا رہا ہے۔

انہوں نے دعویٰ کیا، ’’مودی کی قیادت میں ہندوستان ایک مضبوط اور قابلِ اعتماد عالمی طاقت کے طور پر ابھرا ہے، جبکہ ملک سرحدی سلامتی کے معاملے میں مضبوط، دہشت گردی کے خلاف فیصلہ کن اور عالمی سطح پر پُراعتماد رہا ہے۔‘‘ ترقیاتی ایجنڈے کا ذکر کرتے ہوئے وزیر اعلیٰ نے کہا کہ ڈیجیٹل توسیع، آبادی کی طاقت اور جمہوریت کا امتزاج ’’وکست بھارت 2047‘‘ کے وژن کی طرف سفر کو تیز کر رہا ہے۔

انہوں نے پردھان منتری آواس یوجنا، جن دھن یوجنا، آیوشمان بھارت، اجولا اور سواندھی جیسی اہم اسکیموں کا ذکر کرتے ہوئے کہا کہ ان منصوبوں نے ترقی کے فوائد براہِ راست عوام تک پہنچا کر عوامی اعتماد کو مضبوط کیا ہے۔ انہوں نے کہا کہ ’’سب کا ساتھ، سب کا وکاس، سب کا وشواس، سب کا پریاس‘‘ کا حکومتی اصول انہی اقدامات کے ذریعے عملی شکل اختیار کر رہا ہے۔

آدتیہ ناتھ نے ’’نیشن فرسٹ‘‘ کے تصور اور ’’آتم نربھر بھارت‘‘ کے وژن کے تئیں مودی کے عزم کو بھی سراہتے ہوئے کہا کہ ان کی قیادت میں جاری یہ سفر تبدیلی لانے والا ثابت ہو رہا ہے۔