لکھیم پور کھیری (اتر پردیش): وزیر اعلیٰ اتر پردیش یوگی آدتیہ ناتھ ہفتہ کے روز ضلع لکھیم پور کھیری کی تحصیل محمدی کے علاقے میانپور پہنچے، جہاں انہوں نے میانپور کا نام تبدیل کر کے “رابندر نگر” رکھنے کا اعلان کیا۔ اپنے خطاب کے دوران وزیر اعلیٰ نے کہا کہ بھارت-پاکستان تقسیم کے وقت آباد ہونے والے ہندوؤں کو زمین کے مالکانہ حقوق دیے گئے ہیں اور حکومت کی طرف سے چلائی جانے والی فلاحی اسکیموں کا فائدہ بھی انہیں دیا جائے گا۔
وزیر اعلیٰ نے کہا کہ “آپ لوگوں کی شناخت چھپانے کے لیے اس گاؤں کا نام میانپور رکھا گیا تھا، جہاں ایک بھی مسلمان نہیں وہاں کا نام میانپور رکھ دیا گیا۔ لیکن اب اس کا نام میانپور نہیں رہے گا، بنگلہ دیش سے آئے ان بھائیوں کی بستی کا نام رابندر نگر ہوگا۔”
انہوں نے کہا کہ اس ملک کو قومی ترانہ دینے والے رابندر ناتھ ٹیگور کے نام پر اب اس علاقے کی شناخت ہوگی۔ انہوں نے یہ بھی کہا کہ بنگال کی سرزمین بھارت کی روحانیت اور ورثے کی زمین ہے۔ تقریب کے دوران وزیر اعلیٰ نے مستحقین کو زمین کے مالکانہ حقوق کے سرٹیفکیٹس بھی تقسیم کیے۔ اس موقع پر موجود لوگوں نے “یوگی-یوگی” کے نعرے لگائے۔
