نئی دہلی: آل انڈیا انسٹی ٹیوٹ آف میڈیکل سائنسز (ایمس)، نئی دہلی کے محققین کی ایک تحقیق کے مطابق یوگا کی باقاعدہ مشق تمباکو استعمال کرنے والوں کے لیے اسے چھوڑنے کے امکانات میں نمایاں اضافہ کر سکتی ہے، جبکہ یہ بے چینی، ڈپریشن اور نشے سے وابستہ دیگر نفسیاتی مسائل کو کم کرنے میں بھی مددگار ثابت ہوتی ہے۔

سینٹر فار انٹیگریٹو میڈیسن اینڈ ریسرچ اور سینٹر فار کمیونٹی میڈیسن کے محققین کی جانب سے کی گئی اس سسٹیمیٹک ریویو اور میٹا اینالیسس کو سائنسی جریدے Nicotine & Tobacco Research میں شائع کیا گیا۔ یہ مقالہ 15 نومبر 2025 کو آن لائن دستیاب کیا گیا تھا۔

تحقیق میں معلوم ہوا کہ یوگا کرنے والے تمباکو استعمال کرنے والوں کے قلیل مدتی طور پر تمباکو چھوڑنے کے امکانات ان افراد کے مقابلے میں تقریباً 50 فیصد زیادہ تھے، جنہیں صرف روایتی علاج یا یوگا کے علاوہ دیگر طریقے فراہم کیے گئے تھے۔

محققین نے لکھا، "اس جائزے کے نتائج ظاہر کرتے ہیں کہ یوگا تمباکو نوشی ترک کرنے کے لیے ایک معتدل مگر مؤثر (تقریباً 50 فیصد) معاون طریقہ ثابت ہو سکتا ہے۔" یہ تحقیق ایمس، نئی دہلی کے ڈاکٹروں شروتی سنگھ، دھنلیکا، پارتھا ہلدار اور گوتم شرما نے انجام دی۔

انہوں نے امریکہ، ہندوستان اور تھائی لینڈ کے 629 شرکاء پر مشتمل سات بے ترتیب کنٹرولڈ مطالعات (Randomized Controlled Trials) کا جائزہ لیا، جن میں سے پانچ مطالعات کو میٹا اینالیسس میں شامل کیا گیا۔ تحقیق کے مطابق دنیا بھر میں تمباکو کا استعمال صحتِ عامہ کے لیے ایک بڑا چیلنج ہے اور ہر سال اس کی وجہ سے تقریباً 87 لاکھ افراد جان کی بازی ہار جاتے ہیں۔ اگرچہ بہت سے افراد تمباکو چھوڑنا چاہتے ہیں، لیکن روایتی علاج کے باوجود دوبارہ اس کی طرف لوٹنے کی شرح کافی زیادہ رہتی ہے

۔ یوگا کی افادیت جانچنے کے لیے محققین نے ہتھا یوگا، ونیاسا یوگا، آئینگر یوگا اور پرانایام (سانس کی یوگی مشقیں) سمیت مختلف اقسام کے یوگا پر مبنی مطالعات کا جائزہ لیا۔ مشترکہ تجزیے سے معلوم ہوا کہ یوگا کرنے والے شرکاء میں سات دن تک مسلسل تمباکو سے دور رہنے (Seven-Day Point Prevalence Abstinence) کی شرح زیادہ تھی، جو تمباکو چھوڑنے کی کامیابی کا ایک معیاری پیمانہ ہے۔ محققین نے کہا، "یہ جائزہ تمباکو نوشی ترک کرنے میں یوگا کی افادیت سے متعلق دستیاب بہترین شواہد کو یکجا کرتا ہے اور اس شعبے میں یوگا کے امید افزا کردار کو اجاگر کرتا ہے۔"

تحقیق سے یہ بھی معلوم ہوا کہ یوگا نفسیاتی فوائد فراہم کرتا ہے، جو دوبارہ تمباکو استعمال شروع کرنے کے خطرے کو کم کر سکتے ہیں۔ جائزے کے مطابق یوگا کرنے والے افراد میں ڈپریشن، بے چینی اور معیارِ زندگی میں بہتری دیکھی گئی۔ محققین کے مطابق ہتھا، ونیاسا اور آئینگر یوگا ذہنی دباؤ اور ڈپریشن کم کرکے تمباکو چھوڑنے میں مدد دیتے ہیں، جبکہ پرانایام تمباکو کی طلب اور اس سے دستبرداری کے دوران پیدا ہونے والے منفی جذبات کو کم کرنے میں مؤثر ثابت ہوتا ہے۔

اس تحقیق کی ایک اہم خصوصیت یہ تھی کہ اس میں ہندوستان کی ایک ایسی بے ترتیب کنٹرولڈ تحقیق بھی شامل تھی، جس میں سگریٹ نوش افراد کے ساتھ ساتھ بغیر دھوئیں والے تمباکو استعمال کرنے والوں کا بھی جائزہ لیا گیا، حالانکہ عالمی سطح پر اس موضوع پر نسبتاً کم تحقیق ہوئی ہے۔

تاہم محققین نے خبردار کیا کہ موجودہ شواہد ابھی محدود ہیں اور خاص طور پر کم اور متوسط آمدنی والے ممالک میں، جہاں تمباکو کا استعمال زیادہ ہے، بڑے پیمانے اور طویل مدتی مطالعات کی ضرورت ہے۔ ان کا کہنا تھا کہ اگر آئندہ تحقیقات معیاری طریقۂ کار کے ساتھ مختلف آبادیوں پر کی جائیں تو یوگا کو دنیا بھر میں تمباکو چھوڑنے کے پروگراموں کا ایک آسان، کم خرچ اور مؤثر حصہ بنایا جا سکتا ہے۔

ایمس، نئی دہلی کے شعبۂ امراضِ قلب کے پروفیسر اور سینٹر فار انٹیگریٹو میڈیسن اینڈ ریسرچ کے سربراہ ڈاکٹر گوتم شرما نے کہا، "یوگا جسم اور ذہن دونوں پر اثر انداز ہونے والا ایک مؤثر طریقہ ہے۔ یہ ذہنی دباؤ پر قابو پانے، جذباتی توازن برقرار رکھنے اور خود آگہی بڑھانے میں مدد دیتا ہے، جو تمباکو جیسے نشہ آور رویّوں پر قابو پانے کے لیے انتہائی اہم عوامل ہیں۔"