یروشلم

اسرائیل کے وزیرِ اعظم بنیامین نیتن یاہو نے ایران کے نئے سپریم لیڈر آیت اللہ مجتبیٰ خامنہ ای کو براہِ راست وارننگ دیتے ہوئے اشارہ دیا ہے کہ اسرائیل انہیں بھی اسی طرح نشانہ بنا سکتا ہے جیسے ان کے والد کو بنایا گیا تھا۔

جب ان سے پوچھا گیا کہ کیا اسرائیل مجتبیٰ خامنہ ای کو بھی نشانہ بنا سکتا ہے، تو نیتن یاہو نے جواب دیا كہ میں دہشت گرد تنظیموں کے کسی بھی رہنما کے لیے زندگی کی ضمانت جاری نہیں کروں گا۔ یہ دہشت گردی کے سرپرست ہیں۔ اور میں یہاں اس بارے میں کوئی تفصیلی رپورٹ دینے کا ارادہ نہیں رکھتا کہ ہم کیا منصوبہ بنا رہے ہیں یا کیا کرنے والے ہیں۔نیتن یاہو نے مجتبیٰ خامنہ ای کو ایران کی پاسدارانِ انقلاب فورس کا “کٹھ پتلی” قرار دیتے ہوئے کہا کہ وہ عوام کے سامنے آنے کی ہمت نہیں رکھتے۔

ایک سخت بیان میں نیتن یاہو نے کہا کہ خطے میں ہونے والی حالیہ پیش رفت نے اسرائیل، ایران اور پورے مشرقِ وسطیٰ کے درمیان تزویراتی توازن کو بدل دیا ہے۔ انہوں نے یہ بھی اشارہ دیا کہ اسرائیل مستقبل میں ان گروہوں کے خلاف مزید کارروائیاں کر سکتا ہے جنہیں وہ دہشت گرد تنظیمیں قرار دیتا ہے۔

انہوں نے کہا كہ اب یقین کے ساتھ کہا جا سکتا ہے کہ یہ وہی ایران نہیں رہا، یہ وہی مشرقِ وسطیٰ نہیں رہا، اور یہ وہی اسرائیل بھی نہیں رہا۔ ہم انتظار نہیں کر رہے بلکہ پہل کر رہے ہیں، حملے کر رہے ہیں، اور ایسی طاقت کے ساتھ کر رہے ہیں جیسی پہلے کبھی نہیں دیکھی گئی۔اسرائیلی رہنما نے ایران کے اندرونی سیاسی حالات کا بھی ذکر کیا اور کہا کہ اسرائیل کی کارروائیوں کا مقصد ایسے حالات پیدا کرنا ہے جو ایران میں تبدیلی کی راہ ہموار کر سکیں۔ تاہم انہوں نے یہ بھی تسلیم کیا کہ ایسا ہونا بالآخر ایران کے عوام پر ہی منحصر ہوگا۔انہوں نے کہا كہ میں نے ایک اور مقصد بھی شامل کیا ہے، اور وہ یہ ہے کہ ایران کے عوام کے لیے ایسے حالات پیدا کیے جائیں تاکہ وہ اس ظالمانہ اور جابرانہ نظام کا خاتمہ کر سکیں۔ حالات پیدا کرنا اس بات کی ضمانت نہیں دیتا کہ ایسا ضرور ہوگا۔ میں نے ابھی بھی کہا کہ یہ آپ پر منحصر ہے، سب کچھ آپ پر ہی ہے۔

نیتن یاہو نے یہ بھی کہا کہ اسرائیل کی فوجی کارروائیاں ایران کی قیادت کو کمزور کر سکتی ہیں، لیکن حکومت کا مستقبل بالآخر ایران کے عوام ہی طے کریں گے۔انہوں نے کہا كہ آپ کسی کو پانی تک لے جا سکتے ہیں، لیکن اسے پانی پینے پر مجبور نہیں کر سکتے۔” اس جملے کے ذریعے انہوں نے اسلامی جمہوریہ ایران کے خلاف ممکنہ عوامی بغاوت کی طرف اشارہ کیا۔

یہ بیانات ایسے وقت میں سامنے آئے ہیں جب اسرائیل اور ایران کے درمیان کشیدگی انتہائی بڑھ چکی ہے اور دونوں ممالک ایک دوسرے پر مشرقِ وسطیٰ میں عدم استحکام پیدا کرنے والی سرگرمیوں کی حمایت کا الزام لگاتے رہے ہیں۔ اسرائیل کا الزام ہے کہ ایران لبنان، شام اور غزہ سمیت خطے کے مختلف علاقوں میں سرگرم مسلح گروہوں کی حمایت کرتا ہے، جبکہ تہران ان الزامات کو مسترد کرتا ہے اور خطے میں اسرائیل کی فوجی کارروائیوں پر تنقید کرتا رہا ہے۔

اسرائیل نے حالیہ برسوں میں پڑوسی ممالک میں ان اہداف پر کئی کارروائیاں کی ہیں جنہیں وہ ایران کا فوجی ڈھانچہ اور اس کے حامی مسلح گروہ قرار دیتا ہے۔ اسرائیلی حکومت کا کہنا ہے کہ یہ اقدامات ضروری ہیں تاکہ ایران کو اسرائیلی سرحدوں کے قریب اپنی فوجی موجودگی اور اثر و رسوخ بڑھانے سے روکا جا سکے۔