بہرائچ: اتر پردیش کے ضلع بہرائچ میں دریائے گھاگھرا پر سیلاب سے بچاؤ اور آفات سے نمٹنے کی ایک معمول کی مشق (موک ڈرل) اس وقت حقیقی ریسکیو آپریشن میں تبدیل ہو گئی جب ایک خاتون نے دریا میں چھلانگ لگا دی اور امدادی کارکن ابتدا میں اسے مشق کا حصہ سمجھتے رہے۔

پولیس کے مطابق یہ واقعہ جمعرات کو دوپہر تقریباً دو بجے سنجے سیتو پل کے قریب پیش آیا، جہاں افسران، غوطہ خور اور کشتی بان آفات سے نمٹنے کی مشق میں مصروف تھے۔ 35 سالہ خاتون، جو جروال روڈ علاقے کی رہائشی ہے، مشق کے دوران اچانک دریا میں کود گئی۔ موقع پر موجود لوگوں نے ابتدا میں سمجھا کہ یہ بھی موک ڈرل کا حصہ ہے۔ تاہم امدادی کارکنوں کو جلد ہی احساس ہو گیا کہ خاتون مشق میں شامل نہیں بلکہ خودکشی کی کوشش کر رہی ہے۔

اس کے بعد غوطہ خوروں اور کشتی بانوں نے فوری کارروائی کرتے ہوئے خاتون کو دریا سے باہر نکالا اور کشتی کے ذریعے بحفاظت کنارے تک پہنچایا۔ بعد ازاں اسے طبی امداد کے لیے قریبی کمیونٹی ہیلتھ سینٹر میں داخل کرا دیا گیا۔ جروال روڈ تھانے کے انچارج سنتوش کمار سنگھ نے بتایا کہ ابتدائی تحقیقات سے معلوم ہوا ہے کہ خاتون نے خاندانی تنازع اور مبینہ ہراسانی سے تنگ آ کر یہ انتہائی قدم اٹھایا۔

پولیس کے مطابق خاتون نے بیان دیا کہ شادی کے بعد اس کا شوہر روزگار کے لیے سعودی عرب چلا گیا تھا۔ وقت گزرنے کے ساتھ اس نے رابطے کم کر دیے اور مالی مدد بھی بند کر دی۔ خاتون نے یہ بھی الزام لگایا کہ اس کے سسرال والوں نے اسے گھر سے نکال دیا۔

خاتون کی شکایت کی بنیاد پر پولیس نے اس کے شوہر اور سسر کے خلاف خواتین کو ہراساں کرنے سمیت متعلقہ دفعات کے تحت مقدمہ درج کر لیا ہے۔ حکام کے مطابق خاتون کا شوہر اس وقت بیرونِ ملک ہے، جبکہ اس کے سسر سے تفتیش کے سلسلے میں پوچھ گچھ کی جا چکی ہے۔