نئی دہلی: سپریم کورٹ آف انڈیا نے ایک اہم سماعت کے دوران سوال اٹھایا ہے کہ جب خواتین فضائیہ میں رافیل جیسے جدید لڑاکا طیارے اڑا سکتی ہیں، تو پھر وہ فوج کی قانونی شاخ (جج ایڈووکیٹ جنرل) کے اعلیٰ عہدوں پر تقرری کی اہل کیوں نہیں ہو سکتیں؟ عدالت نے اس معاملے پر مرکزی حکومت سے وضاحت طلب کی ہے۔ یہ ریمارکس جسٹس دیپنکر دتہ اور جسٹس من موہن پر مشتمل بنچ نے آٹھ مئی کو دو خواتین افسران — اَرشَنور کور اور آستھا تیاگی — کی درخواستوں پر سماعت کے دوران دیے۔

بنچ نے سماعت مکمل ہونے کے بعد فیصلہ محفوظ کر لیا ہے، جو مرکز کے جواب کے بعد سنایا جائے گا۔ درخواست گزار خواتین نے عدالت کو بتایا کہ انہوں نے "جج ایڈووکیٹ جنرل" کے انتخابی امتحان میں بالترتیب چوتھی اور پانچویں پوزیشن حاصل کی تھی، مگر اس کے باوجود ان سے کم رینک حاصل کرنے والے مرد افسران کو منتخب کر لیا گیا۔ مزید یہ کہ کل چھ اسامیوں میں صرف تین کو خواتین کے لیے مختص کیا گیا تھا۔

جسٹس دیپنکر دتہ نے حکومت کے وکیل، ایڈیشنل سالیسٹر جنرل ایشوریا بھاٹی، سے سوال کیا: جب خواتین رافیل جیسے جنگی طیارے اڑا سکتی ہیں، تو فوج کے قانونی شعبے میں اعلیٰ عہدے پر ان کی تقرری میں کیا رکاوٹ ہے؟ عدالت نے حکم دیا کہ درخواست گزار ارشنور کور کو فوج کی قانونی شاخ میں شامل کیا جائے، جبکہ آستھا تیاگی نے بعد ازاں بھارتی بحریہ میں شمولیت اختیار کر لی تھی۔

ایشوریا بھاٹی نے حکومت کا دفاع کرتے ہوئے کہا کہ 2012 سے 2023 کے دوران مرد و خواتین افسران کی بھرتی کے لیے 70:30 یا 50:50 کا تناسب رکھا گیا ہے۔ اس کو غیر آئینی اور امتیازی قرار دینا نہ صرف غلط ہوگا، بلکہ یہ حکومت کے اس اختیار میں بھی مداخلت ہے جو وہ مسلح افواج میں بھرتیوں کے لیے استعمال کرتی ہے۔

سپریم کورٹ نے مرکز سے یہ بھی پوچھا کہ جب قانونی طور پر یہ عہدے "صنفی غیر جانب دار" ہیں، تو خواتین کے لیے کم نشستیں کیوں مقرر کی گئی ہیں؟ یہ مقدمہ نہ صرف خواتین کے مساوی حقوق کی بحث کو اجاگر کرتا ہے بلکہ مسلح افواج میں خواتین کی شمولیت کے دائرہ کار کو بھی نئے سرے سے پرکھنے کا موقع فراہم کرتا ہے۔ فیصلے کا انتظار اب شدت سے کیا جا رہا ہے، جو مستقبل میں دفاعی شعبے میں صنفی مساوات کی راہ متعین کر سکتا ہے۔