نئی دہلی/ آواز دی وائس

ہندوستانی محکمۂ موسمیات نے شمالی ہندوستان کے بڑے حصوں کے لیے آئندہ تین دنوں تک گھنے سے انتہائی گھنے کہرے، سرد لہر اور کولڈ ڈے کی وارننگ جاری کی ہے۔ خاص طور پر دہلی-این سی آر، اتر پردیش اور راجستھان میں موسم کی صورتحال چیلنجنگ بنی رہنے کا امکان ہے۔

محکمۂ موسمیات کے مطابق دہلی این سی آر میں کل جزوی طور پر بادل چھائے رہیں گے۔ صبح کے وقت کئی مقامات پر ہلکی اوس اور بعض جگہوں پر گھنا کوہرا رہے گا۔ دہلی میں زیادہ سے زیادہ درجۂ حرارت 21 سے 23 ڈگری سیلسیس اور کم سے کم درجۂ حرارت 7 سے 9 ڈگری سیلسیس کے درمیان رہنے کی توقع ہے۔

دہلی-این سی آر: کوہرا اور سردی سے معمولاتِ زندگی متاثر

دہلی اور اس کے آس پاس کے علاقوں میں 29 سے 31 دسمبر تک رات اور صبح کے اوقات میں درمیانے سے گھنے کہرے کے چھائے رہنے کا امکان ہے۔ محکمۂ موسمیات کے مطابق 30 اور 31 دسمبر کو صبح کے وقت بعض مقامات پر گھنا کوہرا حدِ نگاہ کو کافی حد تک کم کر سکتا ہے۔ یکم جنوری کو مغربی خلل کے اثر سے انتہائی ہلکی بارش کا بھی امکان ظاہر کیا گیا ہے، جس سے سردی میں مزید اضافہ ہو سکتا ہے۔

اتر پردیش: شیت دن اور انتہائی گھنا کوہرا

اتر پردیش میں موسم کا اثر اور بھی زیادہ سخت رہنے والا ہے۔ مغربی اتر پردیش میں 31 دسمبر تک انتہائی گھنے کہرے کی وارننگ دی گئی ہے، جبکہ مشرقی اتر پردیش میں یہ صورتحال یکم جنوری تک برقرار رہ سکتی ہے۔ آئی ایم ڈی نے کئی اضلاع کے لیے کولڈ ڈے سے لے کر شدید کولڈ ڈے کے امکانات ظاہر کیے ہیں۔ دن کے وقت بھی درجۂ حرارت معمول سے کافی نیچے رہ سکتا ہے، جس کے باعث دن میں بھی سردی کا احساس ہوگا۔ خاص طور پر صبح اور رات کے اوقات میں سڑک اور ریل ٹریفک متاثر ہونے کا اندیشہ ہے۔

راجستھان: سرد ہوائیں اور ہلکی بارش کے امکانات

راجستھان کے مغربی حصوں میں 29 اور 30 دسمبر کو ہلکی بارش کی توقع ہے، جبکہ شمالی اور مغربی راجستھان میں کم سے کم درجۂ حرارت 5 سے 10 ڈگری سیلسیس کے درمیان رہ سکتا ہے۔ ریاست کے کئی علاقوں میں صبح کے وقت گھنا کوہرا اور سرد ہوائیں چلنے کا امکان ہے۔ اگرچہ آئندہ تین دنوں میں کم سے کم درجۂ حرارت میں 3 سے 4 ڈگری کی بتدریج بڑھوتری ہو سکتی ہے، لیکن سردی سے مکمل راحت ملنے کی امید نہیں ہے۔