پٹنہ/ آواز دی وائس

جیسے جیسے بہار میں سیاسی سرگرمیاں تیز ہو رہی ہیں اور امکان ہے کہ مہاگٹھ بندھن اپنا منشور جاری کرے گا، مرکزی وزیر چراغ پاسوان نے منگل کے روز اس اقدام پر تنقید کرتے ہوئے کہا کہ اس میں کوئی “بڑی بات” نہیں کیونکہ اپوزیشن کو ویسے بھی ریاست میں اقتدار حاصل نہیں ہونے والا۔

اپوزیشن کی مختلف اعلانات کی بنیاد پر سوال اٹھاتے ہوئے پاسوان نے کہا کہ تقریباً ڈھائی کروڑ خاندانوں کو سرکاری نوکریاں دینے کے وعدے کو پورا کرنے کے لیے کم از کم سات لاکھ کروڑ روپے کی ضرورت ہوگی، جو بہار کے موجودہ تین لاکھ کروڑ روپے کے بجٹ سے کہیں زیادہ ہے۔

 پاسوان نے صحافیوں سے بات کرتے ہوئے کہا کہ  جب آپ کو معلوم ہے کہ آپ اقتدار میں نہیں آنے والے، تو اعلان کرنے میں کیا بڑی بات ہے؟ ان اعلانات کی بنیاد کیا ہے؟ ایک طرف آپ کہتے ہیں کہ ہمارا سب سے بڑا اعلان یہ ہے کہ ہم ہر خاندان کو سرکاری نوکری دیں گے۔ بہار کا بجٹ کیا ہے؟ تین لاکھ کروڑ روپے۔ اگر آپ کم سے کم تنخواہ بھی گنیں، تو ڈھائی کروڑ خاندانوں کو سرکاری نوکری دینے کے لیے کم از کم سات سے نو لاکھ کروڑ روپے درکار ہوں گے۔ یہ بجٹ کہاں سے آئے گا؟۔

لوک جن شکتی پارٹی (رام ولاس) کے سربراہ نے کہا کہ بہار کے اپوزیشن لیڈر تیجسوی یادو جانتے ہیں کہ چونکہ وہ اقتدار میں نہیں آنے والے، اس لیے جھوٹ بولنے میں کوئی نقصان نہیں۔ پاسوان نے مزید کہا کہ آپ نے جو دوسرے اعلانات کیے ہیں، انہیں کیسے پورا کریں گے؟ جب آپ منشور جاری کر رہے ہیں تو براہ کرم یہ بھی بتائیں کہ آگے کا راستہ کیا ہے؟ آپ ریاست کی آمدنی کیسے بڑھائیں گے؟ اپوزیشن لیڈر جانتے ہیں کہ جب اقتدار میں آنا ہی نہیں تو جھوٹ بولنے یا بڑے وعدے کرنے میں کیا حرج ہے؟

چراغ پاسوان نے آج صبح اپنے پٹنہ کے گھر پر چھٹھ پوجا کی رسومات ادا کیں اور کہا کہ چھٹھی مائی نے مجھے بنا مانگے ہی بہت کچھ دیا ہے۔ میری دعا ہے کہ چھٹھی مائی کی برکت بہار اور پورے ملک کے ہر شخص اور ہر خاندان پر رہے۔ چھٹھ کا یہ عظیم تہوار جاری ہے، اور اس کے ساتھ ہی جمہوریت کا عظیم تہوار بھی شروع ہو چکا ہے۔ آج جب ہم سورج دیوتا کو ارگھیہ پیش کر رہے ہیں، تو ایک تہوار اختتام کو پہنچ رہا ہے لیکن جمہوریت کا دوسرا عظیم تہوار اپنے عروج پر پہنچنے والا ہے۔ آج سے ہم بھرپور انتخابی مہم شروع کریں گے۔ نتیجہ کچھ بھی ہو، مجھے یقین ہے کہ یہ بہار کے عوام کے حق میں اور مثبت ہوگا۔

یہ بیان اُس وقت آیا ہے جب کانگریس کے رہنما اور لوک سبھا میں اپوزیشن لیڈر راہل گاندھی کی بہار میں انتخابی مہم ایک دن بعد شروع ہونے والی ہے۔ ذرائع کے مطابق، اپوزیشن مہاگٹھ بندھن آج پٹنہ میں بہار اسمبلی انتخابات کے لیے اپنا مشترکہ منشور جاری کرے گا۔ ذرائع نے یہ بھی بتایا کہ کانگریس کی ایم پی پرینکا گاندھی واڈرا اور کانگریس کے صدر ملکارجن کھڑگے بھی چھٹھ پوجا کے بعد بہار اسمبلی انتخابات کی مہم کا آغاز آج سے کریں گے۔

بہار اسمبلی کی 243 نشستوں کے لیے ووٹنگ دو مرحلوں میں 6 اور 11 نومبر کو ہوگی، جبکہ نتائج 14 نومبر کو اعلان کیے جائیں گے۔