جنوبی 24 پرگنہ (مغربی بنگال): مغربی بنگال کے ضلع جنوبی 24 پرگنہ کے بروئی پور علاقے میں 12 سالہ لڑکی کے مبینہ زیادتی اور قتل کیس کا مرکزی ملزم بدھ کی صبح پولیس انکاؤنٹر میں ہلاک ہو گیا۔پولیس کے مطابق بروئی پور کے سپرنٹنڈنٹ آف پولیس (ایس پی) نے بتایا کہ یہ واقعہ اس وقت پیش آیا جب پولیس ملزم کو جائے وقوعہ پر لے جا کر جرم کی بازسازی (Crime Scene Reconstruction) کر رہی تھی۔

ایس پی کے مطابق بازسازی کے دوران ملزم منڈل نے ایک پولیس اہلکار سے سرکاری اسلحہ چھیننے کی کوشش کی اور پولیس ٹیم پر فائرنگ کر دی۔ اس کے جواب میں پولیس نے جوابی کارروائی کی، جس میں ملزم شدید زخمی ہو گیا۔پولیس نے بتایا کہ زخمی ملزم کو فوری طور پر اسپتال منتقل کیا گیا، تاہم ڈاکٹروں نے اسے مردہ قرار دے دیا۔

متاثرہ 12 سالہ بچی گزشتہ ہفتے ہفتہ کے روز لاپتہ ہو گئی تھی۔ بعد ازاں اس کی لاش ایک تالاب سے برآمد ہوئی، جس کے بعد علاقے میں شدید غم و غصہ پھیل گیا اور احتجاجی مظاہرے شروع ہو گئے۔بروئی پور پولیس ڈسٹرکٹ کے مطابق اس کیس کی تحقیقات میں نمایاں پیش رفت ہوئی ہے اور نابالغ لڑکی کی موت کے سلسلے میں دو افراد کو گرفتار کیا جا چکا ہے۔ اس سے قبل جادوپور سے رکن پارلیمنٹ سایونی گھوش نے بتایا تھا کہ واقعے کی تحقیقات کے لیے خصوصی تحقیقاتی ٹیم (SIT) تشکیل دی گئی ہے۔

دریں اثنا، مغربی بنگال کے وزیر اعلیٰ سویندو ادھیکاری نے منگل کو کہا کہ حکومت اور پولیس ریاست میں امن و قانون کی صورتحال برقرار رکھنے اور ایسے واقعات کی روک تھام کے لیے تمام ضروری اقدامات کر رہی ہے۔

بروئی پور میں صحافیوں سے گفتگو کرتے ہوئے انہوں نے کہا، "یہ صرف بروئی پور کا واقعہ نہیں، بلکہ ہم پہلے دن سے پوری ریاست میں ایسے واقعات کی روک تھام کے لیے کام کر رہے ہیں۔ ہم نے پولیس کمشنر اور سپرنٹنڈنٹ آف پولیس سے بات کی ہے۔ حکومت اور پولیس ہر ممکن اقدام کر رہی ہیں اور متاثرہ خاندان سے بھی رابطہ کیا گیا ہے۔"

دوسری جانب، ترنمول کانگریس کی رہنماؤں، جن میں ممتا بنرجی بھی شامل تھیں، نے مبینہ زیادتی اور قتل کے خلاف شمع بردار مارچ (کینڈل لائٹ مارچ) نکالا۔ پارٹی رہنماؤں نے الزام لگایا کہ ممتا بنرجی کو متاثرہ خاندان سے ملاقات کرنے سے روکا گیا اور پولیس نے ان کی نقل و حرکت پر پابندیاں عائد کیں۔