کولکتہ
مغربی بنگال کی نئی منتخب حکومت نے بدھ کے روز سرکاری منظوری کے بغیر چلنے والے تمام ٹول گیٹ، ڈراپ گیٹ اور بیریکیڈ بند کرنے کی ہدایت جاری کی ہے۔مغربی بنگال کے چیف سکریٹری منوج کمار اگروال نے یہ احکامات جاری کرتے ہوئے ریاست بھر کے ضلعی انتظامیہ کے افسران سے کہا کہ وہ اپنے اپنے علاقوں میں غیر قانونی ٹول وصولی مراکز کی شناخت کریں اور انہیں ہٹانے کے لیے فوری کارروائی کریں۔
اس کے ساتھ ہی چیف سکریٹری نے مستقبل میں ایسے غیر قانونی وصولی مراکز کے قیام پر بھی نظر رکھنے کی ہدایت دی۔منوج کمار اگروال نے تمام قانونی اور غیر قانونی ٹول وصولی مراکز کی فہرست تیار کرکے 15 مئی کو دوپہر 12 بجے تک ڈپٹی سکریٹری کو پیش کرنے کو کہا ہے۔
مغربی بنگال کے چیف سکریٹری کے طور پر تقرری کے بعد یہ منوج کمار اگروال کا پہلا بڑا قدم ہے۔ان کی تقرری کو لے کر ریاست میں تنازع کھڑا ہو گیا ہے، کیونکہ حالیہ اسمبلی انتخابات کے دوران وہ ریاست کے چیف الیکشن آفیسر تھے۔
اپوزیشن رہنماؤں نے سوال اٹھایا ہے کہ کیا اسمبلی انتخابات میں بی جے پی کی کامیابی کے بعد منوج کمار اگروال کو "انعام" دیا گیا ہے۔ترنمول کانگریس (ٹی ایم سی) کے رکنِ پارلیمنٹ سوگت رائے نے کہا کہ اس اقدام میں شفافیت کی کمی ہے، خاص طور پر اس بات کو دیکھتے ہوئے کہ اگروال حال ہی میں ریاست میں انتخابی عمل کی نگرانی کر رہے تھے۔
اے این آئی سے گفتگو کرتے ہوئے سوگت رائے نے کہا، "مجھے ان سے ذاتی طور پر کوئی مسئلہ نہیں ہے، لیکن یہ حیران کن بات ہے کہ جس شخص پر انتخابات کرانے اور SIR کی نگرانی کی ذمہ داری تھی، اُسے چیف سکریٹری بنا دیا گیا۔ اس سے یہ سوال پیدا ہوتا ہے کہ کیا یہ بی جے پی کے حق میں انتخابات کرانے کا انعام ہے؟ حکومت کو اس بارے میں وضاحت دینی چاہیے۔"
لوک سبھا میں قائدِ حزبِ اختلاف راہل گاندھی نے بھی اس تقرری پر سخت تنقید کرتے ہوئے الیکشن کمیشن اور بی جے پی کے درمیان ملی بھگت کا الزام لگایا۔
راہل گاندھی نے لکھا کہ بی جے پی-ای سی کے ’چور بازار‘ میں — جتنی بڑی چوری، اتنا بڑا انعام۔2026 کے اسمبلی انتخابات کے نتائج نے بی جے پی کے حق میں واضح مینڈیٹ دیا، جس میں پارٹی کی نشستوں میں زبردست اضافہ دیکھنے میں آیا۔294 رکنی اسمبلی میں بی جے پی نے 206 نشستیں حاصل کیں، جو ایک بڑی تبدیلی سمجھی جا رہی ہے، کیونکہ گزشتہ انتخابات میں پارٹی کو صرف 77 نشستیں ملی تھیں۔
ترنمول کانگریس (ٹی ایم سی)، جس نے گزشتہ اسمبلی انتخابات میں 212 نشستیں جیتی تھیں، اس بار 80 نشستوں کے ساتھ دوسرے نمبر پر رہی۔اس کے ساتھ ہی ریاست میں ٹی ایم سی کا 15 سالہ اقتدار ختم ہو گیا، جبکہ کانگریس صرف دو نشستوں تک محدود رہ گئی۔
