کولکاتا : مغربی بنگال کے چیف الیکٹورل آفیسر منوج اگروال نے اسمبلی انتخابات میں بانوے اعشاریہ سینتالیس فیصد ووٹنگ کو غیر معمولی قرار دیتے ہوئے عوام کی بھرپور شرکت کو سراہا۔ الیکشن کمیشن آف انڈیا کے مطابق دوسرے مرحلے میں ووٹنگ کی شرح اکانوے اعشاریہ چھیاسٹھ فیصد رہی جبکہ تیئس اپریل کو پہلے مرحلے میں ترانوے اعشاریہ انیس فیصد ووٹنگ درج کی گئی تھی جس کے بعد دونوں مراحل کی مجموعی شرح بانوے اعشاریہ سینتالیس فیصد تک پہنچ گئی۔

پریس کانفرنس سے خطاب کرتے ہوئے انہوں نے کہا کہ کولکاتا میں تاریخی سطح پر ووٹنگ ہوئی اور کئی پولنگ بوتھس پر ریکارڈ ٹرن آؤٹ دیکھا گیا۔ انہوں نے بتایا کہ ایک بوتھ جہاں وہ خود ووٹ دینے گئے وہاں ووٹنگ اسی فیصد سے تجاوز کر گئی جو پہلے کبھی پچاس فیصد سے زیادہ نہیں رہی تھی۔ انہوں نے مزید کہا کہ آٹھ اضلاع کے ایک سو بیالیس اسمبلی حلقوں میں ووٹنگ ہوئی جہاں اکتالیس ہزار سے زائد پولنگ بوتھ قائم کیے گئے تھے۔

انہوں نے کہا کہ پولنگ مجموعی طور پر پرامن رہی اور معمولی واقعات کے علاوہ کوئی بڑا مسئلہ پیش نہیں آیا۔ کئی ایسے ووٹرز بھی سامنے آئے جو پہلے ووٹ نہیں ڈالتے تھے مگر اس بار انہوں نے اسے تہوار کے طور پر لیا اور بڑھ چڑھ کر حصہ لیا۔ خاص طور پر دیہی علاقوں اور کچی آبادیوں میں ووٹنگ فیصد میں نمایاں اضافہ دیکھا گیا۔

الیکشن کمیشن کے مطابق یہ ریاست کی آزادی کے بعد سب سے زیادہ ووٹنگ شرح ہے۔ خواتین ووٹرز نے بانوے اعشاریہ اٹھائیس فیصد کے ساتھ سبقت حاصل کی جبکہ مرد ووٹرز کی شرح اکانوے اعشاریہ صفر سات فیصد رہی۔

دوسری جانب مختلف ایگزٹ پولز میں بھارتیہ جنتا پارٹی کو برتری دی گئی ہے جبکہ ممتا بنرجی کی قیادت والی ترنمول کانگریس کو قریبی مقابلے میں دکھایا گیا ہے۔ تاہم حتمی نتائج کا اعلان چار مئی کو ووٹوں کی گنتی کے بعد کیا جائے گا۔