بنگلورو 

کرناٹک کے نامزد وزیر اعلیٰ ڈی کے شیوکمار نے پیر کے روز کہا کہ کانگریس حکومت مصنوعی ذہانت (آرٹیفیشل انٹیلی جنس - اے آئی) کو شامل کر کے ’’تعلیم کو ایک نیا روپ‘‘ دے گی۔

بنگلورو میں صحافیوں سے گفتگو کرتے ہوئے شیوکمار نے اسکولی طلبہ کو مبارک باد پیش کی، کیونکہ آج کرناٹک میں نئے تعلیمی سال کا آغاز ہوا ہے۔کانگریس رہنما نے کہا کہ مجھے تعلیم سے بہت محبت ہے۔ نیا تعلیمی سال آج سے شروع ہو رہا ہے۔ ریاستِ کرناٹک کے طلبہ نے ملک کی ترقی میں اہم کردار ادا کیا ہے۔ ہمارے طلبہ دنیا بھر کی یونیورسٹیوں میں تعلیم حاصل کر رہے ہیں۔ ان کی بنیادی تعلیم کرناٹک میں ہی ہوئی ہے۔ وہ کرناٹک کے نقطۂ نظر سے ہندوستان کو دیکھتے ہیں۔

انہوں نے مزید کہا کہ اب ہم ایک نئے دور میں داخل ہو رہے ہیں۔ یہ آرٹیفیشل انٹیلی جنس کا دور ہے اور مستقبل میں ہم اسی ٹیکنالوجی کے ذریعے آگے بڑھیں گے۔ یہی ہماری پالیسی ہوگی۔ ہم آنے والے وقت میں تعلیم کو ایک نیا رخ دیں گے۔ اس لیے میں موجودہ حکومت اور مستقبل کی حکومت، دونوں کو مبارک باد دیتا ہوں۔

اس سے قبل آج ایکس (سابقہ ٹوئٹر) پر شائع کیے گئے اپنے ایک کھلے خط میں ڈی کے شیوکمار نے کہا کہ کرناٹک کی ترقی اور خوشحالی کا انحصار اس کے طلبہ کے ’’خیالات، کردار اور کامیابیوں‘‘ پر ہے۔انہوں نے لکھا کہ نئے تعلیمی سال کا آغاز ہمیشہ ایک خاص لمحہ ہوتا ہے، جو امید، جوش و خروش اور نئی امکانات سے بھرپور ہوتا ہے۔ اس موقع پر میں آپ سب کو دل کی گہرائیوں سے مبارک باد اور نیک تمنائیں پیش کرتا ہوں۔ یہ نئے مواقع، نئی دوستیوں، دلچسپ دریافتوں اور اپنے خوابوں کے مزید قریب پہنچنے کا وقت ہے۔

اسکول وہ جگہ ہے جہاں نوجوان ذہنوں کی تشکیل ہوتی ہے اور روشن مستقبل کی بنیاد رکھی جاتی ہے۔ یہ وہ مقام ہے جہاں آپ صرف کتابوں سے ہی نہیں سیکھتے بلکہ ہمدردی، نظم و ضبط، احترام اور ثابت قدمی جیسی اقدار بھی اپناتے ہیں۔ آج آپ جو اسباق اور تجربات حاصل کریں گے، وہ پوری زندگی آپ کی رہنمائی کریں گے۔

دریں اثنا، ڈی کے شیوکمار اور سبکدوش ہونے والے وزیر اعلیٰ سدارامیا آج نئی دہلی میں کانگریس قیادت کے ساتھ ایک اہم اجلاس کریں گے، جس میں 3 جون کو ہونے والی حلف برداری تقریب سے قبل کابینہ میں عہدوں کی تقسیم پر تبادلہ خیال کیا جائے گا۔

دونوں رہنما اس اجلاس کے لیے بنگلورو سے ایک ساتھ نئی دہلی روانہ ہوں گے۔اس کے علاوہ، سدارامیا کے بیٹے اور قانون ساز کونسل (ایم ایل سی) کے رکن یتیندر سدارامیا بھی اجلاس میں شرکت کے لیے نئی دہلی جا رہے ہیں۔

سیاسی حلقوں میں یہ قیاس آرائیاں کی جا رہی ہیں کہ یتیندر کو ڈی کے شیوکمار کی نئی کابینہ میں کوئی اہم ذمہ داری یا عہدہ دیا جا سکتا ہے۔