پٹنہ/ آواز دی وائس

بہار اسمبلی انتخابات کے پہلے مرحلے کی مہم کے آخری دن، مہاگٹھ بندھن کے وزیر اعلیٰ امیدوار اور راشٹریہ جنتا دل (آر جے ڈی) کے رہنما تیجسوی یادو نے 20 سال سے اقتدار میں قائم جنتا دل (یونائیٹڈ) کی قیادت والی قومی جنتانترک اتحاد (این ڈی اے) حکومت کو "اقتدار سے بے دخل" کرنے پر اعتماد ظاہر کیا اور اعلان کیا کہ اگر ان کی حکومت بنی تو مجوزہ ’مائی بہن مان یوجنا‘ کے تحت خواتین کے کھاتوں میں 30 ہزار روپے منتقل کیے جائیں گے۔

منگل کو ایک پریس کانفرنس سے خطاب کرتے ہوئے تیجسوی یادو نے کہا کہ کئی خواتین ’ماں بہن مان یوجنا‘ کے اعلان سے بہت پرجوش ہیں، کیونکہ مہنگائی کے اس دور میں انہیں معاشی راحت ملے گی۔ ہم یہ کہنا چاہتے ہیں کہ ہماری مائیں اور بہنیں ہی ہماری حکومت بنائیں گی۔ مکر سنکرانتی بھی قریب ہے، جو لوگوں کے لیے نئے سال کا موقع ہوتا ہے، یہ 14 جنوری کو منایا جاتا ہے۔ ہم 14 جنوری سے پہلے حکومت بنائیں گے اور ’ماں بہن مان یوجنا‘ کے تحت خواتین کے کھاتوں میں پورے سال کے لیے 30 ہزار روپے جمع کریں گے۔ آر جے ڈی رہنما نے کہا کہ یہ اسکیم مہنگائی کے دور میں خواتین کے لیے بڑی مدد ثابت ہوگی۔ ’’پانچ سالوں میں خواتین کو مجموعی طور پر 1.5 لاکھ روپے ملیں گے، یعنی ہر سال 30 ہزار روپے، جو 14 جنوری کو ادا کیے جائیں گے۔

تیجسوی یادو نے عالمی بینک کے تعاون سے چلنے والے بہار رورل لائیولیہوڈ پروجیکٹ (بی آر ایل پی) کے تحت کام کرنے والی جیویکا دیدیوں کے لیے بھی وعدے دہرائے — جن میں ماہانہ 2000 روپے وظیفہ، 5 لاکھ روپے کا بیمہ، اور خواتین کے لیے قرضوں پر سود معافی شامل ہے۔

انہوں نے کہا کہ ہم پہلے بھی کہہ چکے ہیں کہ جیویکا دیدیاں، جو حکومت کے احکامات پر دن رات کام کرتی ہیں مگر بدلے میں کچھ نہیں پاتیں، انہیں ہم 2000 روپے ماہانہ دیں گے۔ اس کے علاوہ خواتین کے قرضوں پر سود معاف کیا جائے گا اور 5 لاکھ روپے کا بیمہ بھی دیا جائے گا۔ یہ تمام وعدے مہاگٹھ بندھن کے منشور میں شامل ہیں، جن کا مقصد ریاست بھر میں خواتین کو معاشی سہارا اور فلاحی امداد فراہم کرنا ہے۔ سرکاری ملازمین کے لیے تیجسوی یادو نے وعدہ کیا کہ ان کی تعیناتی ان کے آبائی ضلع سے 70 کلومیٹر کے دائرے میں ہی کی جائے گی۔

جنتا دل (یونائیٹڈ) کی قیادت والی این ڈی اے حکومت پر تنقید کرتے ہوئے تیجسوی یادو نے کہا، ’’ہم پورے بہار میں مہم چلا رہے ہیں۔ یہ پہلے مرحلے کی مہم کا آخری دن ہے۔ عوام تبدیلی کے موڈ میں ہیں۔ اس بار بہار کے لوگ پچھلے 20 سال سے اقتدار میں بیٹھی حکومت کو جڑ سے اکھاڑ پھینکیں گے۔ انہوں نے مزید کہا کہ وہ 18 نومبر کو وزیر اعلیٰ کے عہدے کا حلف لیں گے۔ ہم جیت رہے ہیں، بہار کی عوام جیت رہی ہے۔ ہم 18 نومبر کو حلف لیں گے۔

مہاگٹھ بندھن، جس کی قیادت راشٹریہ جنتا دل (آر جے ڈی) اور کانگریس کر رہے ہیں، نے 28 اکتوبر کو اپنا منشور ’’بہار کا تیجسوی پرن‘‘ کے عنوان سے جاری کیا، جس میں انتخابات سے قبل اہم وعدے کیے گئے۔ اتحاد نے وعدہ کیا کہ حکومت بننے کے 20 دن کے اندر ایک قانون پاس کیا جائے گا، جس کے تحت ہر خاندان کے ایک رکن کو سرکاری نوکری دی جائے گی۔

منشور کے مطابق، ’مائی بہن مان یوجنا‘ کے تحت خواتین کو یکم دسمبر سے اگلے پانچ سال تک ہر ماہ 2500 روپے کی مالی امداد دی جائے گی۔ حزبِ اختلاف کے اتحاد نے پرانی پنشن اسکیم (او پی ایس) کو نافذ کرنے کا وعدہ بھی کیا ہے۔ او پی ایس کانگریس کے ایجنڈے کا حصہ رہی ہے، جسے ہماچل پردیش میں سکھیندر سنگھ سکھو کی حکومت نے اقتدار میں آتے ہی بحال کیا تھا۔ کانگریس نے اسے ہریانہ اسمبلی انتخابات کے منشور میں بھی شامل کیا ہے۔

مہاگٹھ بندھن نے وقف (ترمیمی) قانون کو روکنے اور وقف املاک کے انتظام کو ’’فلاحی اور شفاف‘‘ بنانے کا وعدہ بھی کیا ہے۔ یہ بل اس سال کے اوائل میں پارلیمنٹ میں تفصیلی بحث کے بعد پاس ہوا تھا، جس کی کئی حزبِ اختلاف جماعتوں نے مخالفت کی تھی، اور صدر نے 5 اپریل کو اسے منظوری دی تھی۔ 2025 کے انتخابات سے قبل بہار میں اصل مقابلہ این ڈی اے (بی جے پی، جے ڈی یو، ایچ اے ایم ایس، ایل جے پی (آر وی)) اور مہاگٹھ بندھن (آر جے ڈی، کانگریس، وی آئی پی، اور بائیں بازو کی جماعتوں) کے درمیان دیکھا جا رہا ہے۔

اس کے علاوہ پرشانت کشور کی ’’جن سوراج‘‘ پارٹی نے بھی ریاست کی تمام 243 نشستوں پر انتخاب لڑنے کا اعلان کیا ہے۔ اسمبلی انتخابات دو مرحلوں میں 6 اور 11 نومبر کو ہوں گے، جبکہ نتائج 14 نومبر کو جاری کیے جائیں گے۔