نئی دہلی

عالمی سطح پر چیلنجز مسلسل بڑھتے جا رہے ہیں۔ پہلے روس اور یوکرین کے درمیان جنگ، اور اب ایران اور اسرائیل کے درمیان جاری تنازع کو دیکھتے ہوئے ڈرون کی اہمیت کافی بڑھ گئی ہے۔ اب وزیر دفاع  راجناتھ سنگھ نے بھی دونوں مقامات پر جاری لڑائی کے دوران ڈرون کی ضرورت پر زور دیتے ہوئے کہا ہے کہ ہندوستان کو ڈرون سازی کے لیے ایک مضبوط نظام تیار کرنا چاہیے۔ آئندہ چند برسوں میں ہمیں ڈرون تیاری کے میدان میں عالمی مرکز بننا ہوگا۔

دہلی میں منعقدہ قومی دفاعی صنعتی کانکلیو 2026 سے خطاب کرتے ہوئے وزیر دفاع راج ناتھ سنگھ نے جمعرات کو کہا کہ ان دونوں خطوں میں جاری تنازعات نے ڈرون اور انسدادِ ڈرون ٹیکنالوجی کی اہمیت کو ثابت کر دیا ہے۔ انہوں نے کہا کہ جیسے جیسے پوری دنیا روس اور یوکرین کے ساتھ ساتھ ایران اور اسرائیل کے درمیان جاری شدید تنازع کو دیکھ رہی ہے، ہم مستقبل کی جنگوں میں ڈرون اور انسدادِ ڈرون ٹیکنالوجی کے انتہائی اہم کردار کو واضح طور پر دیکھ سکتے ہیں۔

ایک مضبوط نظام کی ضرورت

ڈرون سازی کی اہمیت پر بات کرتے ہوئے وزیر دفاع نے کہا کہ تزویراتی خودمختاری، دفاعی تیاری اور خود انحصاری کے لیے مقامی سطح پر ڈرون کی تیاری کے لیے ایک مکمل نظام ضروری ہے۔ آج ہندوستان میں ایسا ڈرون سازی کا نظام قائم کرنے کی ضرورت ہے جس میں ہم مکمل طور پر خود کفیل ہوں۔اس دفاعی کانفرنس میں ملک کی بڑی دفاعی کمپنیوں کے اعلیٰ افسران کے ساتھ ساتھ دفاعی سرکاری اداروں کے نمائندوں نے بھی شرکت کی۔

راج ناتھ سنگھ نے کہا کہ موجودہ دور میں ہندوستان کی دفاعی تیاری اور تزویراتی خودمختاری کے لیے ضروری ہے کہ ملک ڈرون سازی میں مکمل خود کفالت حاصل کرے۔ انہوں نے ڈرون کے ساتھ ساتھ مصنوعی ذہانت، روبوٹکس اور دیگر جدید و اہم ٹیکنالوجیز کی بڑھتی ہوئی اہمیت پر بھی زور دیا۔

مصنوعی ذہانت سے صنعت میں تبدیلی:

انہوں نے کہا کہ آج کے دور میں خودکار نظام، مصنوعی ذہانت اور روبوٹکس جیسے جدید رجحانات پوری دنیا میں صنعتی شعبے کو بدل رہے ہیں۔ ان کے ساتھ ساتھ سیمولیشن ٹیکنالوجی بھی نئے مواقع پیدا کر رہی ہے۔وزیر دفاع نے صنعتی اداروں سے اپیل کی کہ وہ اپنی مصنوعات کے معیار کو تیزی سے بہتر بنانے پر توجہ دیں۔

دفاعی مصنوعات میں خود انحصاری کے حوالے سے انہوں نے کہا کہ یہ خود کفالت صرف مصنوعات تک محدود نہیں ہونی چاہیے بلکہ اس کے پرزہ جات کی سطح پر بھی ضروری ہے۔ یعنی ڈرون کے ڈھانچے سے لے کر اس کے سافٹ ویئر، انجن اور بیٹری تک، سب کچھ ہندوستان میں ہی تیار ہونا چاہیے۔تاہم انہوں نے یہ بھی تسلیم کیا کہ یہ کام آسان نہیں ہے، کیونکہ زیادہ تر ممالک جہاں ڈرون بنائے جاتے ہیں، وہاں کئی اہم پرزے کسی ایک مخصوص ملک سے درآمد کیے جاتے ہیں۔

معاشی ترقی میں چھوٹے اداروں کا کردار

انہوں نے مزید کہا کہ معاشی ترقی کو رفتار دینے میں چھوٹے اور درمیانے درجے کے صنعتیں بھی اہم کردار ادا کر رہی ہیں، اور "ترقی یافتہ ہندوستان" کے ہدف کو حاصل کرنے کے لیے نئی ٹیکنالوجی کو اپنانا ضروری ہے۔

اس موقع پر افتتاحی اجلاس کے دوران وزیر دفاع نے آئی ڈیکس فریم ورک کے تحت ڈیفنس انڈیا اسٹارٹ اپ چیلنج (ڈسک-14) کے چودہویں ایڈیشن اور اڈیٹی چیلنجز کے چوتھے ایڈیشن کا بھی آغاز کیا۔ مختلف شعبوں میں جدت کو فروغ دینے کے لیے دفاعی افواج، ہندوستانی ساحلی محافظ دستے اور دفاعی خلائی ایجنسی کی مجموعی طور پر 107 مسائل کی فہرست جاری کی گئی، جن میں ڈسک-14 کے تحت 82 اور اڈیٹی چیلنجز 4.0 کے تحت 25 مسائل شامل ہیں۔