نئی دہلی

ہندوستان میں آسٹریلیا کے ہائی کمشنر فلپ گرین نے کہا ہے کہ ان کا ملک ہندوستان کے مفادات کو سنجیدگی سے لیتا ہے اور اپنے ملک میں خالصتانی عناصر سے متعلق ہندوستان کی تشویشات پر توجہ دی ہے۔

اے این آئی سے گفتگو کرتے ہوئے فلپ گرین نے کہا کہ آسٹریلیا، ہندوستان کی علاقائی سالمیت کا اسی شکل میں احترام کرتا ہے جیسی وہ ہے۔ انہوں نے کہا کہ ہم نے یقیناً اس معاملے پر توجہ دی ہے۔ ہمارے کثیر ثقافتی، انٹیلی جنس، پولیس اور خارجہ پالیسی سے متعلق افسران باقاعدگی سے ملاقات کرتے ہیں اور اس موضوع پر تبادلۂ خیال کرتے ہیں۔ ہم ہندوستان کے مفادات کو سنجیدگی سے لیتے ہیں۔ میں یہ بالکل واضح کر دینا چاہتا ہوں کہ آسٹریلیا ہندوستان کی علاقائی سالمیت پر یقین رکھتا ہے، جیسی وہ ہے۔ ہمارا علیحدگی پسند عناصر سے کوئی تعلق نہیں ہے۔گرین نے مزید کہا کہ آسٹریلیا پرامن احتجاج کی اجازت دیتا ہے، لیکن کسی بھی قسم کی مجرمانہ سرگرمی کی اجازت نہیں دی جائے گی۔

انہوں نے کہا کہ ہمارے جمہوری نظام کی بنیادی خصوصیات میں سے ایک پرامن احتجاج کا حق ہے۔ لوگوں کو اپنے خیالات رکھنے، انہیں ظاہر کرنے اور قانون کے دائرے میں رہتے ہوئے پرامن طریقے سے احتجاج کرنے کا حق حاصل ہے۔ اس کی اجازت آئندہ بھی جاری رہے گی، لیکن کسی بھی قسم کی مجرمانہ سرگرمی کی اجازت نہیں ہوگی۔اے بی سی نیوز کے مطابق 10 جون 2023 کو آسٹریلیا میں سکھ اور ہندو برادریوں کے درمیان اس وقت کشیدگی بڑھ گئی تھی جب ہندوستان میں ایک آزاد سکھ ریاست قائم کرنے کے لیے سیاسی حمایت حاصل کرنے کے مقصد سے ایک متنازع ووٹنگ کا انعقاد کیا گیا تھا۔

رپورٹ کے مطابق اتوار کے روز سڈنی کے مغربی مضافاتی علاقے منچنبری میں واقع ایک تعمیراتی مقام پر سکھ برادری کے کچھ افراد جمع ہوئے تھے، جہاں انہوں نے پنجاب خطے میں "خالصتان" کے نام سے ایک نیا ملک بنانے کے حق میں اپنا تازہ "ریفرنڈم" منعقد کیا۔

آسٹریلیا سے حال ہی میں کچھ ہندوستانیوں کی واپسی (ڈی پورٹیشن) کے بارے میں پوچھے جانے پر گرین نے کہا کہ یہ چند ایک معاملات ہیں، کیونکہ گزشتہ سال 4,50,000 سے زائد ہندوستانیوں نے آسٹریلیا کا سفر کیا تھا۔

انہوں نے کہا کہ یہ الگ تھلگ واقعات ہیں۔ گزشتہ سال 4,50,000 ہندوستانی سیاحت کے لیے آسٹریلیا گئے تھے اور 50,000 دیگر طلبہ کے طور پر وہاں گئے تھے۔ جن لوگوں کا آپ ذکر کر رہے ہیں، ان کی تعداد بہت کم ہے۔ ہمارے ویزا نظام کے تحت لوگوں کو اپنی ویزا مدت ختم ہونے پر آسٹریلیا چھوڑنا ہوتا ہے، اور ہم ہمیشہ اس اصول پر عمل کریں گے۔30 اپریل کو پنجاب حکومت کے ایک وفد نے دہلی ہوائی اڈے پر آسٹریلیا سے واپس بھیجے گئے ہندوستانی شہریوں کا استقبال کیا۔ پنجاب کے وزیر اعلیٰ بھگوت مان کے مطابق آسٹریلیا سے 15 ہندوستانیوں کو واپس بھیجا جا رہا ہے، جن میں سے 11 پنجابی ہیں۔ ان میں ایک خاتون اور دس مرد شامل ہیں۔