نئی دہلی : آواز دی وائس 

میں آپ کو دلی سلام پیش کرتا ہوں اور وطنِ عزیز کی دائمی امن، ترقی اور اتحاد کے لیے دعا گو ہوں۔

 وزیراعظم نریندرمودی کے نام یہ پیغام ہے کالی کٹ کے مفتی اعظم ہند شیخ ابوبکراحمد کا ۔ انہوں نے پی ایم مودی کے نام ایک پیغام میں ان کا شکریہ ادا کیا اور کہا کہ میں آپ کی جرات مندی کو سلام کرتا ہوں ۔  

اپنے پیغام میں انہوں نے کہا کہ ۔۔۔ اس نازک وقت میں، جب ہمارا ملک دہشت گردی اور انتہاپسندی جیسے مہلک خطرات کا جواں مردی سے مقابلہ کر رہا ہے، میں حکومتِ ہند کے واضح اور اصولی مؤقف اور ہماری مسلح افواج کی جرأت مندانہ کوششوں کی مکمل حمایت کا پُرزور اظہار کرتا ہوں، جو کہ ملک کی خودمختاری، اتحاد اور سلامتی کے تحفظ کے لیے کوشاں ہیں۔

 انہوں نے مزید کہا کہ ۔۔۔ دہشت گردی نہ صرف ملکی استحکام بلکہ عالمی امن اور انسانی وقار کے لیے بھی ایک سنگین خطرہ ہے۔ ان شدت پسند عناصر کی سرگرمیوں کو روکنے کے لیے خصوصاً شورش زدہ علاقوں جیسے کشمیر میں حکومتِ ہند کی بروقت اور فعال حکمت عملی بے گناہ انسانوں کی جانوں کے تحفظ اور انصاف و انسانیت کے اصولوں کی پاسداری کا مظہر ہے۔ یہ اقدامات نہ صرف قومی سالمیت کے لیے ضروری ہیں بلکہ علاقائی و بین الاقوامی امن میں بھی بھارت کا مؤثر کردار ادا کرتے ہیں۔

 پیغام میں انہوں نے مزید کہا کہ مجھے یقین ہے کہ بھارت کی اسٹریٹیجک مداخلت اور سفارتی قیادت جنوبی ایشیا میں انتہاپسند نظریات کے انسداد اور پائیدار امن کے فروغ میں ایک انقلابی کردار ادا کر سکتی ہے۔ اصولی سفارت کاری، پختہ عزم اور شمولیتی کوششوں کے ذریعے ہمارا ملک ایک پرآشوب دنیا میں استحکام کی علامت بن سکتا ہے۔

میں تمام شہریوں سے اپیل کرتا ہوں کہ وہ ان قومی کاوشوں میں مکمل یکجہتی اور حمایت کا مظاہرہ کریں۔ ہمیں، مذہب یا پس منظر سے قطع نظر، اُن قدروں کا امین بننا چاہیے جو ہمیں ایک کثیرالثقافتی مگر ہم آہنگ قوم کے طور پر جوڑتی ہیں۔

آخر میں شیخ ابوبکر احمد نے کہا کہ  میری دعا ہے کہ اللہ تعالیٰ ہماری قیادت کو اپنے عظیم مقصدِ امن و سلامتی میں مزید رہنمائی اور تقویت عطا فرمائے۔