پٹنہ: پٹنہ کے انسپکٹر جنرل آف پولیس (آئی جی) جتیندر رانا نے بدھ کے روز راشٹریہ جنتا دل (آر جے ڈی) کے لوک بھون مارچ کے دوران طاقت کے استعمال کی تردید کرتے ہوئے کہا کہ مظاہرین کو آگے بڑھنے سے روکنے کے لیے واٹر کینن کا استعمال کیا گیا تھا۔ تیجسوی یادو نے آر جے ڈی کے رہنماؤں اور کارکنوں کے ساتھ پیدل مارچ کی قیادت کی۔ مظاہرین نے مبینہ امتحانی پرچہ لیک، بے روزگاری اور ریاست کے طلبہ و نوجوانوں کے مستقبل سے متعلق مسائل اٹھائے۔ صحافیوں سے بات کرتے ہوئے جتیندر رانا نے کہا، ’’گاندھی میدان سے شروع ہونے والا مارچ ختم ہو گیا ہے۔ ایک وفد لوک بھون جا رہا ہے۔

حراست میں لیے گئے کچھ افراد پہلے ہی لوک بھون کے لیے روانہ ہو چکے ہیں۔ پولیس نے طاقت کا استعمال نہیں کیا۔ ہجوم پر واٹر کینن کا استعمال کیا گیا۔‘‘ دریں اثنا، بہار اسمبلی میں قائد حزب اختلاف اور آر جے ڈی رہنما تیجسوی یادو کو کئی پارٹی کارکنوں کے ساتھ، جن میں آر جے ڈی کی رکن پارلیمنٹ میسا بھارتی بھی شامل تھیں، لوک بھون کی جانب احتجاجی مارچ کی قیادت کرتے ہوئے پولیس نے حراست میں لے لیا۔

احتجاج کے دوران کچھ مظاہرین اس بس پر چڑھ گئے، جس میں تیجسوی یادو اور دیگر مظاہرین کو پولیس لے جا رہی تھی۔ حراست میں لیے جانے کے بعد یادو نے کہا کہ حکومت نوجوانوں سے خوفزدہ ہے اور آر جے ڈی طلبہ اور بے روزگاری سے متعلق مسائل کو مسلسل اٹھاتی رہے گی۔ انہوں نے صحافیوں سے کہا، ’’حکومت نوجوانوں اور عوام سے خوفزدہ ہے۔ کوئی بھی حکومت مستقل نہیں ہوتی، ہر حکومت کو ایک دن جانا پڑتا ہے۔ ہمیں سب کی حمایت حاصل ہے۔ ہم اپنی لڑائی جاری رکھیں گے۔ ہم جیل جانے سے نہیں ڈرتے۔ ہم ہمیشہ طلبہ کے حقوق، بے روزگاری ختم کرنے، پرچہ لیک روکنے اور امتحانات میں شفافیت کے لیے آواز اٹھاتے رہیں گے۔‘‘

پولیس کے ہاتھوں حراست میں لی گئی آر جے ڈی رکن پارلیمنٹ میسا بھارتی نے کہا کہ بہار کے طلبہ جیل جانے کے لیے تیار ہیں، لیکن جب تک سیوان کے ضلع مجسٹریٹ کو معطل نہیں کیا جاتا، وہ اپنے مطالبات پر ڈٹے رہیں گے۔ انہوں نے صحافیوں سے کہا، ’’بہار کے طلبہ جیل جانے کے لیے تیار ہیں، لیکن سیوان کے ضلع مجسٹریٹ کی معطلی تک اپنے مطالبات پر مضبوطی سے قائم رہیں گے۔

آر جے ڈی اور بہار کے عوام نہیں رکیں گے۔ حکومت شاید چند دنوں میں گولیاں چلانے کا حکم بھی دے دے۔‘‘ یہ مارچ سیوان میں طلبہ کے احتجاج کے دوران اے کے-47 رائفل کے استعمال کو لے کر جاری تنازع کے درمیان نکالا گیا۔ بہار حکومت نے سپریم کورٹ کو بتایا ہے کہ ایک پولیس کانسٹیبل نے ہجوم میں پھنس جانے کے بعد اے کے-47 سے ہوا میں چار راؤنڈ فائر کیے تھے۔ حکومت کا کہنا ہے کہ فائرنگ سے کسی مظاہرین کو چوٹ نہیں آئی۔ مذکورہ کانسٹیبل کو معطل کر دیا گیا ہے۔