نئی دہلی
میزورم کی واحد راجیہ سبھا نشست کے انتخاب کے لیے جمعرات کو ووٹنگ جاری ہے، جس میں دو امیدوار میدان میں ہیں۔ ایک سرکاری افسر نے یہ معلومات دی ہیں۔برسرِ اقتدار زورم پیپلز موومنٹ نے پارٹی کے ترجمان کے لالٹلوانگکیما کو امیدوار بنایا ہے، جبکہ اہم اپوزیشن جماعت میزو نیشنل فرنٹنے وکیل اور مصنفہ جوتھانسانگی ہمار کو میدان میں اتارا ہے۔ بھارتیہ جنتا پارٹی (بی جے پی) اور کانگریس نے ووٹنگ سے دور رہنے کا فیصلہ کیا ہے۔
اسمبلی سیکریٹریٹ کے ایڈیشنل سیکریٹری لالتھانگماویا نے بتایا کہ اراکینِ اسمبلی کو صبح 9 بجے سے شام 4 بجے تک ووٹ ڈالنے کی اجازت دی گئی ہے، جبکہ ووٹوں کی گنتی شام 5 بجے شروع ہوگی۔
انہوں نے کہا کہ ووٹنگ کے لیے تمام تیاریاں اور سیکیورٹی انتظامات مکمل کر لیے گئے ہیں۔ ووٹوں کی گنتی اسمبلی عمارت میں کی جائے گی۔وزیرِ اعلیٰ لالدوہوما نے صبح 9 بج کر 43 منٹ پر اپنا ووٹ ڈالا اور اپوزیشن کے اس الزام کو مسترد کر دیا کہ حکمراں زیڈ پی ایم میں اندرونی اختلافات ہیں، جس کے باعث راجیہ سبھا انتخاب میں کراس ووٹنگ کا خدشہ ہے۔
وزیرِ اعلیٰ نے کہا کہ زیڈ پی ایم میں اندرونی اختلافات اور راجیہ سبھا انتخاب میں کراس ووٹنگ کا الزام عوام کی توجہ ہٹانے کے لیے اپوزیشن کی چال ہے۔ وہ شروع سے یہی کرتے آئے ہیں۔ کوئی کراس ووٹنگ نہیں ہوگی کیونکہ ووٹنگ کے دوران ہمارے اراکین متحد ہیں۔
لالدوہوما ووٹ ڈالنے والے پہلے رکنِ اسمبلی تھے، ان کے بعد باغبانی کے وزیر سی لالساؤی ونگا نے اپنا ووٹ ڈالا۔40 رکنی میزورم اسمبلی میں زیڈ پی ایم کے 27، ایم این ایف کے 10، بی جے پی کے 2 اور کانگریس کا 1 رکنِ اسمبلی ہے۔
ایم این ایف کے رکنِ اسمبلی اور قائدِ حزبِ اختلاف لالچھندما رالٹے نے الزام لگایا کہ زیڈ پی ایم میں اختلافات موجود ہیں۔ انہوں نے امید ظاہر کی کہ ایم این ایف کو حکمراں جماعت کے کسی رکن کا ایک ووٹ مل سکتا ہے۔کانگریس کے رکنِ اسمبلی سی نَگونلیانچُھنگا نے کہا کہ وہ پارٹی قیادت کی ہدایت کے مطابق ووٹ نہیں ڈالیں گے۔
بی جے پی کے میڈیا کوآرڈینیٹر جانی لالتھانپُوئیا نے بھی کہا کہ ان کی جماعت کے دونوں اراکینِ اسمبلی راجیہ سبھا انتخاب کی ووٹنگ میں حصہ نہیں لیں گے۔
