نئی دہلی/ آواز دی وائس
پیرس اولمپکس کے بعد جب یہ سوال اٹھنے لگے کہ کیا یہ وینیش پھوگاٹ کے کیریئر کا آخری پڑاؤ تھا، تب وہ خود بھی کسی واضح نتیجے پر نہیں تھیں۔ میٹ سے دور اور ملک بھر کی توقعات سے ہٹ کر گزارا گیا وقت وینیش پھوگاٹ کو اپنی پوری جدوجہد کو ایک نئے زاویے سے سمجھنے کا موقع دے گیا وہ اتار چڑھاؤ، وہ قربانیاں اور وہ پہلو جنہیں دنیا کبھی نہیں جان پائی۔
اسی خود احتسابی کے دوران وینیش پھوگاٹ نے محسوس کیا کہ کھیل کے ساتھ ان کا تعلق اب بھی اتنا ہی گہرا ہے، اور مقابلہ کرنے کی خواہش آج بھی ویسی ہی مضبوط ہے۔ تھکن اور شور کے نیچے دبی ہوئی ان کی جذبے کی چنگاری پھر سے دہک اٹھی ہے۔ اب وہ ایک بار پھر واپسی کی طرف قدم بڑھا رہی ہیں—لاس اینجلس 2028 ( ایل اے 28) اولمپکس کی تیاری کے ساتھ۔
فرق صرف اتنا ہے کہ اس بار ان کے اس سفر میں ان کا ننھا بیٹا بھی شامل ہے—جو ان کی سب سے بڑی حوصلہ افزائی، ان کی قوت اور ان کا چھوٹا سا چیئرلیڈر بن کر ان کے ساتھ کھڑا ہے۔ وینیش پھوگاٹ نے اپنی واپسی کا اعلان ایک انسٹاگرام پوسٹ کے ذریعے کیا۔ ان کے مطابق نظم و ضبط، روزمرہ کی سختیاں اور جدوجہد ان کی شخصیت کا حصہ ہیں، اور میٹ سے دور رہنے کے باوجود ان کا ایک حصہ ہمیشہ وہیں جڑا رہا۔
پیرس کے بعد میرے پاس کوئی جواب نہیں تھا
اپنی انسٹاگرام پوسٹ میں وینیش پھوگاٹ نے لکھا کہ لوگ پوچھتے رہے کہ کیا پیرس میرا آخری مقابلہ تھا۔ طویل عرصے تک میرے پاس اس کا جواب نہیں تھا۔ مجھے میٹ سے، دباؤ سے، توقعات سے، بلکہ اپنے خوابوں سے بھی دور جانے کی ضرورت تھی۔ برسوں بعد پہلی بار میں نے خود کو سانس لینے دیا۔ میں نے وقت نکالا کہ اپنے سفر کے وزن کو سمجھ سکوں۔
وہ آگ کبھی بجھی ہی نہیں تھی
وینیش نے لکھا کہ اتار چڑھاؤ، ٹوٹا دل، قربانیاں… میرے وہ پہلو جنہیں دنیا نے کبھی نہیں دیکھا۔ اور اسی خاموش سوچ میں مجھے سچ ملا—کہ مجھے یہ کھیل اب بھی پسند ہے، میں اب بھی مقابلہ کرنا چاہتی ہوں۔ اسی خاموشی میں، مجھے یہ احساس ہوا کہ وہ ’آگ‘ کبھی بجھی ہی نہیں تھی۔ وہ بس تھکن اور شور کے نیچے دب گئی تھی۔
میرا بیٹا: میرا چھوٹا چیئرلیڈر
مزید لکھا کہ نظم، روٹین، لڑائی… یہ سب میرے نظام کا حصہ ہیں۔ میں چاہے جتنی بھی دور چلی جاؤں، میرا ایک حصہ ہمیشہ میٹ پر موجود رہتا ہے۔ …تو میں لوٹ آئی ہوں، ایل اے 28 کی طرف، ایک ایسے دل کے ساتھ جو بے خوف ہے، ایک ایسے حوصلے کے ساتھ جو جھکنے سے انکار کرتا ہے۔ اس بار میں اکیلی نہیں ہوں—میرا بیٹا میری ٹیم میں ہے، میری سب سے بڑی تحریک، ایل اے اولمپکس کے اس سفر میں میرا چھوٹا چیئرلیڈر۔
